Kasuleanna Absalom dio mai Gesur sia kasikaeloanna ambe’na
1Iatonna issanmi Yoab, anakna Zeruya, kumua iatu penaanna datu ungkamali’mo Absalom,
2mesuami Yoab lako Tekoa, untambai dio mai tu misa’ baine malute, anna ma’kada lako nakua: La muangga’-angga’i ma’pote sia ma’pake sanda bolong, da muma’minna’ busarungngu’, sia la unna’ga susiko kalemu misa’ baine masaimo umpassanda bolongan to mate.
3La mennoloko lako datu ammu ma’kada susite. – Nalesangan simisa’mi Yoab tu kada lako.
4Iatonna mennolomo tu baine Tekoa lako datu, tukkumi rokko padang menomba anna ma’kada nakua: O puangku, tunduina’!
5Nakuami datu lako: Apara mupomasussa? Mebalimi nakua: Aku dikka’ te misa’ baine balu, belanna matemo tu muaneku.
6Den anakku da’dua muane, sipakkami dio lu padang, natae’ misa’ tau sae umpasisarakki, nalonga’mi tu misa’ namate.
7Pada bendanmi tu mintu’ pa’rapuanna la untingoi kaunanmi, nakua: Baai mai tu to umpatei siulu’na, angki patei sondana siulu’na tu mangka napatei sia angki sanggang dukai tu to la ma’mana’ iato. Nasusito la morai tu tau iato mai la urroto’i tu ruaya api torrokupa, naurunganni tae’mo nala umpatorroanni sanga tu muaneku sia bati’ dao kuli’na padang.
8Nakuami datu lako baine iato: Sulemoko lako banuammu, aku la untonganni tu kara-karamu.
9Nakuami tu baine Tekoa lako datu: O puangku, iatu sala iato lu lako kaleku sia lako rapungku, apa iatu datu sia kapayunganna tae’ ia naruai.
10Nakuami datu: Minda-minda unggagako, baai mai lako kaleku, manassa tae’mo nala urrosoko.
11Nakuami tu baine iato: La mikilalai tu PUANG, Kapenombammi, da namandu liu ma’kasanggang tu to mangala puli sia da nasabu’i tau iato mai tu anakku. Ma’kadami datu nakua: La lelukraka tuoNa PUANG, moi sanglamba’ beluakna anakmu tae’ nala rondon rokko padang.
12Nakuami tu baine iato: Messimanpa te kaunammi umpokada kada sangbuku lako puangku. Nakuami datu: Pokadami.
13Nakuami tu baine iato: Ma’apari mipalanri penaammi tu tangnga’ susite tu diona taunNa Puang Matua? Belanna iatommi mangkamo umpokadai te kada iate, puangku kalena tu butung to sala, belanna tae’ naeloranni puangku tu to ditibe sule sae.
14Inang la mate nasangki’ susito uai tibollo rokko padang, tu tae’ nadirampun. Apa tae’ Naalai Puang Matua tu katuoan, sangadinna Natangnga’, kumua anna iatu to ditibe, da natontong mambela dio mai Kalena.
15Ia sia kusae umpokadai te mintu’ kada iate lako puangku datu, belanna napakataku’na’ to buda; iamoto angku tangnga’i: Melo ke malena’ umpokadanni datu, lalo siai manii anna turu’i tu palakungku.
16Belanna la naperangii datu tu palakungku anna rampananna’ dio mai limanna to la ussabu’ina’ sola anakku dio mai mana’Na Puang Matua.
17Sia susite tu tangnga’ku, kukua: Iatu kadanna puangku datu la umparapa’ penaa, belanna susito misa’ malaeka’Na Puang Matua, susi dukamoto tu puangku datu la umperangii melo sia kadake. Na PUANG, Kapenombammimora urrondongkomi.
18Mebalimi datu nakua lako tu baine iato: Totemo da mubuni lako kaleku tu apa kupekutanan lako kalemu. Nakuami tu baine iato: Ma’kadamokomi, o puangku datu.
19Nakuami datu: Natamairaka Yoab tu mintu’na te? Mebalimi tu baine iato nakua: Tonganna tuo tu puangku, moi misa’ tau tae’ nakullei sepang lako kairi ba’tu kanan dio mai mintu’ kadanna puangku. Tonganna taummi Yoab ussuana’ sia ullesangan simisa’i taummi tu mintu’ kada iate.
20Iatu kara-kara iato disambenan susito, pa’pana’ta’na duka Yoab. Apa iatu puangku matarru’ susi misa’ malaeka’Na Puang Matua, naurunganni untandai tu mintu’na apa dadi dao kuli’na padang.
21Mangkato ma’kadami datu lako Yoab, nakua: Iate palaku iate kueloran. Malemoko musolanni sule tu Absalom, to mangura iato.
22Menombami tu Yoab tukku rokko padang anna palakuanni kamasakkean tu datu. Ma’kadami tu Yoab nakua: Allo ia duka te kuissan kumua miala masena’, o puangku datu, belanna natarimamo datu tu palakunna taunna.
23Ke’de’mi tu Yoab, namale lako Gesur, nasolanni tu Absalom lako Yerusalem.
24Apa nakua datu: Da’ito nalu lako banuanna, da napessitiroina’! Lu lakomi banuanna tu Absalom, tae’ nasitiro datu.
25Lan mintu’ tondok Israel moi misa’ tau tae’ kalelean kameloanna, susi Absalom; randuk diong mai pala’ lette’na sae langngan botto ulunna, tae’ sayuanna.
26Iake mangkai nagontingi tu beluakna –, ke upu’oi taun, nagontingioi tu beluakna, belanna magasamo nasa’ding iamoto nagontingi – napesuammi untimbangi tu beluakna, siduaratu’ sikele’ magasanna turu’ timbanganna datu.
27Dadimi tu anakna Absalom tallu muane na misa’ pia baine, disanga Tamar, iamo misa’ to maballo pantarisanna.
28Ganna’ duangtaun tu Absalom torro dio Yerusalem, tae’ nama’din sitiro datu.
29Iamoto namesua tu Absalom untambai Yoab, la nasua male mennolo lako datu, apa manoka tu Yoab sae. Mesua pole’omi untambai tonna ma’penduanna, apa manoka duka sae.
30Iamoto anna ma’kada Absalom lako mintu’ taunna, nakua: Iatu bela’na Yoab siamping bela’ku sia nanii dalle sisikan dio. Malekomi ammi ballai. Naballami taunna Absalom tu bela’ iato.
31Ke’de’mi tu Yoab male lako Absalom, tarru’ tama banuanna, anna ma’kada nakua: Ma’apai anna ballai kaunammi tu bela’ku?
32Mebalimi Absalom lako Yoab, nakua: Kupopetambaikomi la kusua male mennolo lako datu sia la ma’kada lako datu susite, kumua: Apara gai’ku sule dio mai Gesur? La’bi’ kengku dio bangora. Morai tonganmo’ totemo la untiro lindona puangku. Na iake denpi sala dio kaleku, melo ke napateina’ puangku.
33Malemi tu Yoab mennolo lako datu, naparampoi lako datu tu mintu’ kada iato. Natambaimi datu tu Absalom. Iatonna saemo, menombami dio olona datu; naudungmi datu tu Absalom.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel