Daud sitammu Ziba, taunna Mefiboset
1Iatonna solo’mo sidi’ tu Daud dao mai botto tanete, sitammumi Ziba, taunna Mefiboset, sibaa da’dua keledai dilapikki sia unteke’ roti duaratu’ sia deppa bua anggoro’ dirangkei saratu’ sia bua ara saratu’ sia anggoro’ sangkiriba’.
2Nakuami datu lako Ziba: La mupatumbai te mintu’ apa iate? Nakuami Ziba: Iate keledai iate la nasakei to lan tongkonan layukna puangku, na iate roti sia mintu’ bua la nakande mintu’ taunna puangku na uai anggoro’ iate la nairu’ tu to mata’ka’ dio lu padang pangallaran.
3Nakuami datu: Umbamira tu anakna puangmu? Mebalimi tu Ziba lako datu, nakua: Torro ia dio Yerusalem, belanna nakua: Allo ia bangsiamote anna pasulei to Israel tu kadatuanna ambe’ku lako kaleku.
4Nakuami datu lako Ziba: Mintu’na tu apanna Mefiboset, iko nasangmo umpoapai. Nakuami Ziba: tukkuna’ mengkaola lako datu; na puangkumora datu umpatiroanna’ kamaturu-turuanna.
Simei untampakki ropu Daud
5Iatonna rampomo tu datu Daud lako Bahurim, tassu’mi inde to dio mai tu misa’ bati’na pa’rapuanna Saul, disanga Simei anakna Gera, sae untampakki ropu datu.
6Sia nabatui tu Daud sia mintu’ taunna, moi anna mintu’ to buda sia pa’baraninna lumingka dio kananna sia kairinna.
7Susite tu kadanna Simei tonna marassan untampakki ropu nakua: Mallaiko, mallaiko, e pa’patibollo rara sia to bulituk!
8Napabala’imo PUANG lako kalemu tu rarana bati’na Saul tu musonda dadi datu, sia Nabenmo PUANG Absalom, anakmu tu kadatuan; manassa lanko kamandasan totemo, belanna misa’ko to pa’patibollo rara.
9Attu iato ma’kadami tu Abisai, anakna Zeruya lako datu nakua: Ma’apari natampakkira ropu puangku datu tinde asu mate? Da’ito kumale lian angku sembangi tu ulunna.
10Apa nakua datu: La siapariki’, e anakna Zeruya? Da’ito natampakkina’ ropu! Iake Nakuai PUANG lako: Tampakki ropu tu Daud, mindaopa la ma’kada kumua: Ma’apai mupogau’i to?
11Sia nakuapa Daud lako Abisai sia lako mintu’ taunna: Akkenna anakku kalena, tu sun dikaleku la ungka’tu sunga’ku, apa pole’pa tu to Benyamin iate. Da’ito natampakkina’ ropu, ke susii kadanNa PUANG lako kalena to.
12Den sia manii upa’ anNa tiroi PUANG tu kamaparrisangku anNa kamaseina’ kameloan la sondana tampak ropunna allo iate.
13Susito tarru’ bangmi tu Daud sola mintu’ taunna, na iatu Simei male urrundunan mennaa’na tanete tu nasipatuan lian, natampakki lolanan ropu sia nabatui sia nasambo’i barra’-barra’.
14Rampomi tu datu sola mintu’ to buda nasolan, anna melayo inde to dio, belanna mata’ka’.
Pa’timbanganna Ahitofel lako Absalom
15Iatu Absalom sia mintu’ to buda, iamotu to Israel saemo lako Yerusalem na iatu Ahitofel dio nasolan.
16Iatonna saemo tu Husai, to Arki, sangmanena Daud mennolo lako Absalom, nakuami, lako: Na maupa’mora tu puangku! Na maupa’mora tu puangku!
17Apa ma’kada Absalom lako Husai, nakua: Iamoraka te tu kamarurusammu lako sangmanemu? Ma’apai natae’ mumale sola sangmanemu?
18Ma’kadami tu Husai lako Absalom nakua: Tae’ nasusito, sangadinna minda-minda tu Natonno’ PUANG sia iate mintu’ to buda sia mintu’ to Israel, ia dukamoto tu la umpotauna’ sia ia dukamo la kunii torro.
19Naminda pole’o tu la kunii mengkaola, ke tae’i nalako anak datu? Susito dolona mengkaolana’ lako ambe’mi, susi duka totemo to lako kalemi.
20Ma’kadami Absalom lako Ahitofel, nakua: Pada la umpatassu’mokomi pa’timbangammi tu apa sipatu la tapogau’.
21Ma’kadami Ahitofel lako Absalom, nakua: Melo ke sangampa’i puangku tu mintu’ gundi’na ambe’mi tu napatorro ungkampai tongkonan layuk; susito la narangi mintu’ to Israel tu diona puangku, kumua mipakadake lelemo tu kalemi lako ambe’mi, sia salamatoto’-toto’na tu mintu’ to unturu’komi.
22Naballarammi misa’ tenda tau tu Absalom dao bubungan, anna sangampa’ Absalom tu mintu’ gundi’na ambe’na dio pentirona mintu’ to Israel.
23Attu iato iatu kada napokada Ahitofel butung to umpekutanan kadanNa Puang Matua; susimoto tu mintu’ pa’timbanganna Ahitofel naangga’ la Daud, la Absalom.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel