Alkitab Mobile SABDA
[VER] : [TORAJA]     [PL]  [PB] 
 <<  2 Samuel 18 >> 

Absalom ditalo sia dipatei

1Naparessami Daud tu mintu’ surodadu nasolan, naangka’i ba’tu pira-pira pangulu to sangsa’bu sia pangulu to saratu’.

2Mangkato napatallung torroanmi Daud tu mintu’ surodadu, sangtorroan napangului Yoab, sangtorroan napangului Abisai, anakna Zeruya, siulu’na Yoab, na sangtorroan napangului Itai, to Gat. Anna ma’kada tu datu lako mintu’ surodadu, nakua: Manassa la tassu’ dukana’ ussisolangkomi sola nasang.

3Apa nakua tu mintu’ surodadu: Da natassu’ tu puang ussisolangkanni; belanna moi angki mallai nasang, tae’ nadampangi, ondongpi iake matekan sesena, tae’ duka nadampangi; sangadinna puangkiri tu pada sangpulo sa’bu taummi. Ondongpi totemo mandu melo ia, ke mitundui lankanni mai kota.

4Nakuami datu: Iatu apa misanga melo, iamo la kuturu’. Ke’de’mi tu datu dio biring babangan kota tonna marassan tu mintu’ surodadu tassu’ sisaratu’-ratu’ sia sisangsa’bu-sa’bu.

5Ma’kadami tu datu lako Yoab sia Abisai sia Itai, nakua: Kanana’i tu Absalom, to mangura iato. Narangimi surodadu tu kadanna datu lako mintu’ kamandang diona Absalom.

6Tassu’mi tu surodadu lako padang umpessitammui tu to Israel, nasirari lan pangala’ Efraim.

7Iatu to Israel natalo surodadunna Daud; makambanmi kandean bassi inde to, namate tu tau duangpulo sa’bu.

8Sakerangan-rangannami tu rari dio lu mintu’ padang iato, naurungan allo iato mintu’ tu tau nasanggang pangala’ mandu buda na iatu to nakande pa’dang.

9Sitammumi surodadunna Daud tu Absalom; iatu Absalom ussakei bagala’. Ta’kala messurrukmi tu bagala’ diongna lu tangke marepe’na misa’ kayu tarpin, naurunganni mendoyang lan alla’na langi’ na lino, anna mallai tu bagala’ diong.

10Iatonna tiromi misa’ tau tu iannato, napokadami lako Yoab, nakua: Kutiro tu Absalom mendoyang dio kayu tarpin.

11Ma’kadami Yoab lako tu to umpokadanni tu iannato nakua: Mutiro tu iannato, ma’apai natae’ muba’tai inde to dio anna memassan rokko padang? Na aku ia umbenko salaka sangpulo batunna sikele’ sia salipi’ misa’.

12Apa nakua tu tau iato lako Yoab: Iake la morongannai angku timbang salaka sangsa’bu sikele’ dio limangku, manassa inang tae’ duka kula umpata’pai lima tu anakna datu, belanna kirangi sola nasang tu datu mepasan lako kalemi sia lako Abisai sia lako Itai, nakua: La mikanana’i tu Absalom, to mangura iato.

13Iakengku mangkamo umpatei punalai, manassa mintu’ tu apa iato tae’ nakabunian lako datu sia kamu duka la umpasalian kalemi dio mai iannato.

14Nakuami Yoab: Manokana’ murempai. Naalami tu doke bandangan tallu, anna rokki tama tu buana Absalom, tonna tuopa mendoyang dio kayu tarpin.

15Saemi tu sangpulo surodadu, pa’baraninna Yoab, untalimbungi, naba’tai tu Absalom.

16Mangkato umpannonimi napiri tanduk tu Yoab, anna sule tu mintu’ surodadu unnula’ to Israel, belanna morai Yoab la ungkaritutui tu to buda.

17Naangka’mi tau tu batang rabukna Absalom, napembuanganni rokko misa’ garuang kapua lan pangala’ iato, anna tombonni tu batu daona lu. Mallai nasangmi tu mintu’ to Israel pada sule lako tendana.

18Iatu Absalom tonna tuopa mangkamo unnala simbuang tu diong lombok Datu, napabendanan kalena, belanna nakua: Tae’ muane tu anakku, tu dinii ungkilalai sangangku. Nasangaimi sanga kalena tu simbuang iato; iamoto nasangai tau tu simbuang iato simbuangna Absalom sae lako allo iate.

19Nakuami Ahimaas, anakna Zadok: Eloranna’ kuma’dondo male umbaa kareba melo lako datu, kumua Nasanda tonganni PUANG tu datu dio mai ualinna!

20Apa nakua Yoab lako: Tae’na iko tu to sipatu la umbaa kareba allo iate. Na allo senga’opa mumane ma’din male umbaa kareba; belanna allo iate tae’ muma’din la umbaa kareba melo, belanna matemo tu anakna datu.

21Nakuami Yoab lako misa’ to Etiopia: Maleko, pokadai lako datu tu apa mangka mutiro. Tukkumi menomba dio olona Yoab tu to Etiopia iato, anna ma’dondo male.

22Apa natole napokada Ahimaas, anakna Zadok lako Yoab, nakua: Moi anna susito, eloran dukana’ undi urrundu’i tu to Etiopia. Nakuami Yoab: Apara gai’mu la male, e anakku? Tae’ naia tu kareba mubaa la umpamaupa’ko!

23(Nakuami): Moi nasusito, la ma’dondona’ male. Nakuami Yoab lako: Ma’dondomoko male. Ma’dondo-dondomi unnola lalan ma’palulako padang, anna doloi tu to Etiopia.

24Iatu Daud ma’dokko lan alla’na da’dua babangan kota, nakendek tu to ma’kampa langngan bubungan babangan kota, tarru’ langngan benteng tembo’. Iatonna bangunammo matanna, natiroi tu misa’ muane sae ma’dondo-dondo misa-misai.

25Metambami tu to ma’kampa umpokadanni datu. Nakuami datu: Iake misa-misari, den kareba melo nabaa. Iatonna samandappi’-dappi’namo sae,

26natiroomi to ma’kampa tu misa’ tau senga’ ma’dondo-dondo sae anna metamba lako to ma’kampa babangan, nakua: Tiroi den misa’ muane ma’dondo-dondo misa-misa sae. Ma’kadami tu datu nakua: Iatu tau iato umbaa duka kareba melo.

27Nakuami tu to ma’kampa: Iatu kutirona lako tu to dolo susito lingkana Ahimaas, anakna Zadok. Nakuami datu: To melo to, manassa sae umbaa kareba melo.

28Metambami tu Ahimaas lako datu nakua: Makarimman tu puangku! Saemi menomba lako datu tukku rokko padang, nakua: Mintu’ kadipudian lu lako PUANG, Kapenombammi, belanna nasorongmo tu mintu’ to pabali-bali lako puangku datu.

29Nakuami datu: tae’ siaraka namatumba-tumba tu Absalom, to mangura iato? Mebalimi Ahimaas nakua: Den kamaramban kapua tonna suai Yoab tu taunna datu, iamo taummi; apa tae’ kuissanni tu manassanna.

30Ma’kadami datu nakua: Soro’ko, bendanko inde te. Soro’mi anna torro bendan.

31Ta’kala rampomi tu to Etiopia. Ma’kadami tu to Etiopia iato nakua: Untarimakomi misa’ kareba melo, o puangku datu, belanna Nasanda tongannimokomi PUANG dio mai mintu’ tau unneakomi.

32Nakuami datu lako tu to Etiopia: tae’ siaraka namatumba-tumba tu Absalom, to mangura iato? Mebalimi tu to Etiopia nakua: Sipatu tu mintu’ ualinna puangku sia mintu’ to umpogau’ kakadakean unnea puangku, la susitu to mangura iato.

33Mandu bonnongmi penaanna tu datu, nakendek langngan bilik daona lu anna tumangi’. Iatonna marasan lumingka ma’kadami nakua: O anakku Absalom, anakku, anakku Absalom! Kenna akuora mate ussondako, Absalom, anakku, anakku!



 <<  2 Samuel 18 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel