Alkitab Mobile SABDA
[VER] : [TORAJA]     [PL]  [PB] 
 <<  2 Samuel 8 >> 

Kapataloanna Daud

1Mangkato natalomi Daud tu to Filistin, napalumbangi baka direngnge’; narampai dio mai to Filistin tu kakuasan lan kota.

2Sia natalo duka tu to Moab, sia nasua mamma’ tungara diong padang, nasuka’i ulang; iake naalaoi ulang pesuka’ sipenduan, iamo dipatei, na iatu ganna’na sipissan ulang pesuka’, iamo dipatuo. Susimoto tu to Moab mengkanorong lako Daud sia umbaya’ sima.

3Sia natalo Daud tu Hadadezer, anakna Rehob, datu Zoba, tonna male umpasule kuasanna sae lako salu Efrat.

4Narampami Daud sangsa’bu pituratu’ tu pakkanarang sia to lumingkana duangpulo sa’bu sia napesuan Daud ungka’ta’i tu mintu’ ura’ lette’na darang kareta, apa iatu saratu’ napopa’elo’na.

5Saemi tu to Aram dio mai Damsyik la untundui Hadadezer, datu Zoba, apa natalo Daud tu to Aram, anna mate duangpulo sa’bu.

6Sia napao’ko’imi Daud surodadu ma’kampa lan tu ba’tu pira-pira tondok dio Aram lili’na Damsyik, anna lumbang baka direngnge’ tu to Aram lako Daud sia umbaya’ sima. Susimoto tu PUANG ungkamasei Daud kapataloan umba-umba nanii male.

7Naalami Daud tu mintu’ balulang bulaan, tu dio mintu’ surodadunna Hadadezer, nabaai lako Yerusalem.

8Na lan mai Betah sia Berotai, kotana Hadadezer, nanii Daud unnala tambaga bu’dak.

9Iatonna rangimi Tou, datu Hamat, kumua natalomo Daud tu mintu’ surodadunna Hadadezer,

10nasuami Tou tu Yoram, anakna, mennolo lako datu Daud, la umpekutanan kamalaga’-lagaranna sia umparampo passalama’ lako kalena, belanna nararii tu Hadadezer sia natalo belanna iatu Hadadezer tontong bang sirari Tou –; nabaami Yoram tu ba’tu pira-pira pareanan salaka sia bulaan sia tambaga.

11Napamarimbangammi datu Daud tu iannato lako PUANG sola tu mintu’ bulaan sia salaka tu napamarimbangan dio mai mintu’ bangsa, tu mangka napalumbang baka direngnge’;

12iamotu dio mai to Aram sia to Moab sia to Amon sia to Filistin sia to Amalek sia dio mai pangrampa dio mai Hadadezer, anakna Rehob, datu Zoba.

13Kaleleammi tu sanganna Daud tonna sulemo untalo to Edom diong Lombok Ma’sin, namate tau sangpulo karua sa’bunna.

14Sia napao’ko’i surodadu ma’kampa lan tu Edom; lan mintu’ tondok Edom napao’ko’i surodadu ma’kampa, naurunganni lumbang baka direngnge’ tu mintu’ to Edom lako Daud. Susimoto tu PUANG ungkamasei Daud kapataloan umba-umba nanii male.

To naala parea Daud

15Iatonna datui Daud tu mintu’ to Israel, untoe katonganan sia kamaloloan lako mintu’ taunna.

16Iatu Yoab, anakna Zeruya, kamandang lompona surodadu sia Yosafat, anakna Ahilud, pa’paelean;

17sia Zadok, anakna Ahitub sia Ahimelekh, anakna Abyatar, to minaa sia Seraya iamo kapala to massura’;

18na iatu Benaya, anakna Yoyada, pangulunna to Kreti sia to Pleti sia iatu anakna muane Daud iamo to minaa.



 <<  2 Samuel 8 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2021
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran