Katipa’duanna kadatuan
1Ke’de’mi tu Rehabeam lako Sikhem, belanna sae nasangmo tu to Israel dio Sikhem la untokkoi dadi datu.
2Narangimi Yerobeam, anakna Nebat, tu iannate, tonna diopa Mesir tu nanii mallai lako dio mai olona Salomo, pakalan sulemi dio mai Mesir.
3Disuami tu tau lao untambai lako, anna sae tu Yerobeam sola mintu’ to Israel lako Rehabeam, anna ma’kada nakua:
4Napamatana’mo ambe’mi tu pamaangki sola nasang te; totemo la mipamaringngan tu pa’diaman magasanna ambe’mi sia pamaan matana’, tu napapassanangkan, anna kami te sola nasang mendadi taummi.
5Ma’kadami lako tau iato mai, nakua: Duang bongipa mimane sae pole’ lako kaleku. Malemi sule tu to buda.
6Ma’kombongammi tu datu Rehabeam sola mintu’ to matua-tua, tu naala parea Salomo, ambe’na, tonna tuo siapa, sia ma’kada nakua: Umbara susitu timbangammi la kubalianni te to buda?
7Ma’kadami tu tau iato mai lako, nakua: Iake mikasokanni te mai to buda, ammi pasiolai tu pa’poraianna sia ma’kada melokomi lako, manassa la dadi taummi tontong sae lakona tu tau iato mai.
8Apa natumpu tu timbangan napokada mintu’ to matua-tua lako kalena, anna male ma’kombongan sola to mangura, sangbara’na, tu naala parea.
9Nakuami lako tau iato mai: Umbara susitu timbangammi la tabalianni te to buda, tu ma’kada lako kaleku, nakua: La mipamaringngan tu pamaan mangka napapassanangkan ambe’mi?
10Ma’kadami tu mintu’ to mangura sangbara’na lako kalena, nakua: Susite tu la mikuanni te to buda, tu mangka ma’kada lako kalemi nakua: Napamatana’mo ambe’mi tu pamaangki, apa la mipamaringnganangkan, la mikua lako tau iato mai: Mandu kapua ia tu taruno kidi’ku anna iatu aakna ambe’ku.
11Iake susinna napamatana’i ambe’ku tu pamaammi, apa iatu aku la kupamatana’ pissan tu pamaammi; iake mangkakomi napa’dikki pebamba ambe’ku, apa aku la kupa’dikkikomi pebamba ma’duri bassi.
12Ma’tallung alloan to saemi tu Yerobeam sola to buda umpennoloi Rehabeam, susitu napokada datu nakua: Duang bongipa mimane sae pole’ lako kaleku.
13Mebali makarra’mi tu datu lako to buda, belanna iatu datu Rehabeam untumpu pa’timbangna to matua-tua,
14anna ma’kada lako tau iato mai susitu pa’timbanganna mintu’ to mangura, nakua: napamatana’mo ambe’ku tu pamaammi, apa iatu aku la kupamatana’ pissan; iake mangkakomi napa’dikki pebamba ambe’ku, apa aku la kupa’dikkikomi pebamba ma’duri bassi.
15Tae’mi napasiolai datu tu palakunna to buda, belanna susimo Nalampak Puang Matua to, la Napalanda’ PUANG tu apa mangka Napokada lako Yerobeam, anakna Nebat, nalopian Ahia, to Silo.
16Iatonna tiromi mintu’ to Israel tu diona datu tang napasiolamo tu palakunna mebalimi lako datu nakua: Tae’mo tasangbilangan tu Daud, sia tae’mo tasangmana’ tu anakna Isai! E, to Israel, pantan sulemokomi lako tendami! Karitutui kalenami tu tongkonammi, e Daud! Sulemi tu mintu’ to Israel lako to’ tendana.
17Apa iatu mintu’ to Israel tu torro lan mintu’ kota Yehuda, Rehabeam duka tu naangka’ datu.
18Nasuami datu Rehabeam tu Hadoram, kapala pa’diaman, apa natumbui batu mintu’ to Israel, namate; iatu datu Rehabeam sidi’mora natang kendek langngan kareta, la mallai lako Yerusalem.
19Susimoto tu to Israel randuk memboko’ dio mai bati’na Daud sae lako allo iate.
<< 2 Tawarikh 10 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel