1Iatonna rampomo tu Rehabeam lako Yerusalem, naarakmi tu mintu’ bati’na Yehuda sia bati’na Benyamin, den saratu’ karuapulona sa’bu, to mangura, tu manakka parari la urrarii to Israel, kumua anna pasulei tu kadatuan lako Rehabeam.
2Apa rampo tu kadanNa PUANG lako Semaya, taunNa Puang Matua, nakua:
3Pokadanni Rehabeam, anakna Salomo, datu Yehuda, sia mintu’ to Israel lan lili’na Yehuda sia Benyamin, kumua:
4Inde sia tu kadanNa PUANG: Da milaoi ba’tu urrarii tu mai sangsiulurammi. Sangadinna pantan la sulekomi lako to’ banuammi, belanna tete dio Aku anna dadi tu apa iate. Naturu’mi tau iato mai tu kadanNa PUANG, anna sule, sia tae’mo nalaoi tu Yerobeam.
Bunga’na Rehabeam ma’parenta
5Torromi tu Rehabeam dio Yerusalem sia nabangun tu ba’tu pira-pira kota ditambakuku lan Yehuda;
6nabangun tu Betlehem sia Etam sia Tekoa.
7Sia Bet-Zur sia Sokho sia Adulam,
8sia Gat sia Mares sia Zif,
9sia Adoraim sia Lakhis sia Azeka,
10sia Zora sia Ayalon na Hebron; mintu’nato iamo kota ditambakuku lan lili’na Yehuda sia Benyamin.
11Napematoto’imi tu mintu’ benteng, napalanni tu kamandang sia napannii kinallo sia minna’ sia uai anggoro’;
12senga’pi, ke misa’oi kota napalan duka tu ba’tu pira-pira balulang sia doke. Napematoto’i tongan tu kota iato. Nasusito iatu Yehuda sia Benyamin nalili’ parentana.
13Iatu mintu’ to minaa sia to Lewi tu dio lu mintu’ tondok Israel, ke’de’ dio mai mintu’ lili’ tondokna sirampun lako kalena.
14Iatu to Lewi natampe tu mintu’ padang kariuanna sia mintu’ barang apanna, anna male lako tondok Yehuda sia lako Yerusalem, belanna nasuale Yerobeam sia mintu’ anakna tu tau iato, naurunganni tae’mo nama’din untoe pentoean menomba lako PUANG.
15Belanna naangka’mo Yerobeam tu ba’tu pira-pira tau napotominaa la menomba dao inan madao sia menomba lako ampu padang sia lako anak sapi nagaragai.
16Undinnato dio mai mintu’ suku to Israel ba’tu pira-piramo tau unturu’ to Lewi, tu umpamatu’tunmo penaanna la umpennoloi PUANG, Kapenombanna to Israel, rampomo lako Yerusalem la memala’ lako PUANG, tu Kapenombanna nene’ to dolona.
17Napematoto’i tau iato mai tu kadatuan Yehuda sia umpamanda’ Rehabeam, anakna Salomo, lan tallung taun, belanna tallung taun nanii unturu’i tu bate lalanna Daud sola Salomo.
Diona bainena sia anakna Rehabeam
18Napobainemi Rehabeam tu Mahalat, anakna Yerimot, anakna muane Daud, ma’indo’ Abihail, anakna Eliab, anakna muane Isai.
19Napadadiammi pia muane iamotu Yeush, Semarya na Zaham.
20Undinnato umpobaineomi Maakha, anakna Absalom; nadadianni tu Abia, Atai, Ziza na Selomit.
21Napalosongammi penaa Rehabeam tu Maakha, anakna Absalom, mandu na iatu mintu’ bainena sia gundi’na, belanna iatu bainena sangpulo karua na iatu gundi’na annan pulona; na iatu anakna muane duangpulo ngkarua na iatu anakna baine annan pulona.
22Iatu Abia, anakna Maakha, natappu Rehabeam anna padadi pangulu, iamo arung dio lu mintu’ siulu’na, belanna iamo la naangka’ datu.
23Matarru’mi lan penggauranna tu datu sia natale’ tu mai anakna muane dio lu mintu’ lili’na Yehuda sia Benyamin, lan lu mintu’ kota ditambakuku; anna benni kande lendu’ budanna sia napakebaine sibuda.
<< 2 Tawarikh 11 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel