Diona kapalaoianna Sisak na kamateanna Rehabeam
1Iatonna pabantangmi Rehabeam tu kadatuanna sia matoto’mo, naboko’imi tu Sukaran alukNa PUANG sola mintu’ to Israel.
2Iamoto iatonna taun ma’pellimanna Rehabeam ma’parenta, saemi Sisak, datu Mesir, ullaoi tu Yerusalem, belanna tang maruru’mo tu tau iato mai lako PUANG,
3sibaa kareta parari sangsa’bu duaratu’ sia pakkanarang annan pulona sa’bu sia mintu’ surodadu tu nasisolan sae dio mai Mesir, tang dikemba’ diia’, iamotu to Libia, to Suki sia to Etiopia.
4Natalomi tu mintu’ kota ditambakuku tu nalili’ Yehuda, natarru’ lako Yerusalem.
5Attu iato saemi tu Nabi Semaya mennolo lako Rehabeam sia mintu’ pangulu to Yehuda, tu sirampun dio Yerusalem diona tu kasaeanna Sisak sia ma’kada lako tau iato mai nakua: Inde sia tu kadanNa PUANG: Belanna miboko’iMo’, iamoto Kuboko’i dukakomi sia la Kusorongkomi tama limanna Sisak.
6Attu iato umpamadiongammi kalena tu mintu’ pangulunna to Israel sia iatu datu, anna ma’kada nakua: Iatu PUANG malambu’.
7Iatonna tiromi PUANG kumua umpamadiongammo penaanna tu tau iato mai, saemi tu kadanNa PUANG lako Semaya nakua: Belanna umpamadiongammo penaanna tu tau iato mai, iamoto tae’mo Kula ummangsanni, sangadinna la Kukamasei kadirampanan madoi’, naurungan tae’mo Kula umbarrakan kasengkeangKu lako Yerusalem umpoparea limanna Sisak.
8Apa iatu tau iato mai la napotau Sisak, naurunganni untandai tu kasisengaranna kamengkaolan lako Kaleku na kamengkaolan lako mintu’ kadatuan iato.
9Ke’de’mi tu Sisak, datu Mesir, ullaoi Yerusalem, narampami tu mintu’ pareanan lan banuanNa PUANG sia mintu’ pareanan lan tongkonan layukna datu, napoli’ nasang. Naala duka tu mintu’ balulang bulaan tu nagaragai Salomo.
10Nagaragami Rehabeam tu ba’tu pira-pira balulang tambaga la sondana, anna patageranni kamandang to ma’kampa, tu ungkampai babangan tongkonan layukna datu.
11Iake maleoi tu datu lako banuanNa PUANG, naalaomi to ma’kampa tu balulang iato, undinna to napasuleomi tama bilikna to ma’kampa.
12Belanna umpamadiongammo penaanna, soro’mi tu kasengkeanNa PUANG dio mai kalena, iamoto natae’ sia Nasanggangi nasangi. Dio lu to Yehuda denpa tu ba’tu pira-pira apa melo.
13Iatu datu Rehabeam umpamatoto’ parentana dio Yerusalem. Patangpulomo mmisa taunna Rehabeam, tonna dadi datu, anna sangpulo pitu taunna ma’parenta dio Yerusalem, iamotu kota Napilei langsa’ PUANG dio lu mintu’ suku Israel, la Nanii umpatulangdan sanganNa. Iatu indo’na disanga Naama, to Amon.
14Napogau’ tu apa kadake, belanna tae’ natontong tu penaanna la undaka’ PUANG.
15Iatu mintu’ tuna’na Rehabeam, la iatu dolona la iatu undinna, tang tisura’moraka lan sura’ tuna’, nakarang nabi Semaya sia Ido, to patanda-tandan, unturu’ sura’ ossoranna? Tontong bang tu kasirarianna Rehabeam na Yerobeam.
16Mangkato malemi tama batu dilobang tu Rehabeam sola nene’ to dolona, anna dipeliang lan kotana Daud. Anna Abia, anakna muane, ussondai dadi datu.
<< 2 Tawarikh 12 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel