Asa sibasse datu Aram la urrarii to Israel. Kamateanna Asa
1Iatonna taun ma’pentallungpulo nnannan kadatuanna Asa, ke’de’mi tu Baesa, datu Israel ullaoi Yehuda sia napematoto’i tu Rama, la unnampangi lalan, kumua da naden misa’ tau tassu’ sia tama umpennoloi Asa, datu Yehuda.
2Attu iato naalami Asa tu salaka sia bulaan lan mai bilik pangnannan lan banuanNa PUANG sia lan mai banuanna datu, anna pakatui lako Benhadad, datu Aram, tu torro dio Damsyik, nakua:
3Den tu basse lan alla’ta, lan alla’na ambe’ku na ambe’mi. Iate salaka sola bulaan kupa’pea lako kalemi. Ammi pokai tu bassemi sola Baesa, datu Israel, anna soro’ dio mai kaleku.
4Napasiolami Benhadad tu kadanna datu Asa, anna suai tu pangulu rarinna ullaoi tu mai kota Israel; natalomi tu Iyon, Dan, Abel-Maim na mintu’ kota pa’palumpunan dio Naftali.
5Iatonna rangimi Baesa tu iannato, nasoro’imi umpematoto’i Rama, sia natorroi tu pengkaranganna.
6Naarakmi datu Asa tu mintu’ to Yehuda; iatu batu sia kayu napake Baesa umpematoto’i Rama, nabaa nasang tau iato; na apa iamoto tu napake Asa umpematoto’i Geba na Mizpa.
7Attu iato saemi Hanani, to patanda-tandan lako Asa, datu Yehuda, sia ma’kada lako nakua: Belanna umposande’komi datu Aram, natae’ miposande’ PUANG, Kapenombammi, iamoto na iatu surodadunna datu Aram tilendokmo dio mai limammi.
8Tang surodadu budaraka sia lendu’ budanna karetana sia pakkanarangna tu to Kusyi sia to Libia? Apa moi susito Nasorong PUANG tama limammi tu tau iato mai, belanna sande’komi lako Kalena.
9Belanna iatu matanNa PUANG ma’penunu tiku lao dao te kuli’na padang, la ungkamaseanni kamatotoran minda-minda tu lantuk penaanna lako Kalena. Kabagan tongan te mipogau’, iamoto randuk totemo tae’mo mila ka’tu dirarii.
10Re’dekmi ara’na tu Asa lako te to patanda-tandan, anna patamai pa’tarungkuan, belanna tarru’ sengke lako Hanani diona tu iannato. Sia ba’tu pira-pirapa tu pa’tondokan napa’dikki Asa attu iato.
11Manassa iatu mintu’ tuna’na Asa la dolona la undinna, tisura’mo lan sura’ diona mintu’ datu Yehuda sia Israel.
12Iatonna taun ma’pentallungpulo ngkasera kadatuanna Asa, kambang patomalimi tu lentekna, anna mandarra’ tongan tu sakinna. Apa moi masaki, tae’ nadaka’i Asa lako PUANG tu pa’tunduan, sangadinna lako to ma’dampi.
13Mangkato malemi tama batu dilobang tu Asa sola nene’ to dolona. Matemi tonna taun ma’pempatangpulo mmisa kadatuanna.
14Napeliangmi tau tama liangna, tu napa’peparan lan kotanna Daud. Napamamma’mi tau dao inan patindoan, tu naponnoi pebangki’ sia daun-daun busarungngu’, tu napasirau to pande ma’bangki’, sia napadukkuan tau misa’ api kapua tongan.
<< 2 Tawarikh 16 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel