1Apa iatonna taun ma’pempitu, mengkabatta’mi tu Yoyada, anna sibasse tu mai kamandangna saratu’ surodadu, iamotu Azarya, anakna Yeroham, Ismael, anakna Yohanan, Azarya, anakna Obed, Maaseya, anakna Adaya sia Elisafat, anakna Zikhri.
2Malemi tu tau iato mai ma’pasilamban-lamban lan Yehuda, napasirampunni tu mintu’ to Lewi lan mai mintu’ kota Yehuda sia ia duka tu mintu’ pangulu rapunna Israel, anna male lako Yerusalem.
3Attu iato untananmi basse tu mintu’ kombongan sola datu lan banuanNa Puang Matua, anna ma’kada (tu Yoyada) lako tau iato mai nakua: Manassa anakna datu la ma’parenta, susitu mangka Napokada PUANG diona bati’na Daud.
4La mipogau’ te apa iate: taa tallunnakomi, tu la mentoe ke allo katorroan, la to minaa la to Lewi la to ungkampai babangan;
5taa tallunna la dio tongkonan layuk kadatuan, na iatu taa tallunna la dio babangan Parandangan, sia mintu’ to buda dio tarampak banuanNa PUANG.
6Moi misa’ tau da natama banuanNa PUANG sangadinna to minaa sia to Lewi, tu mentoena; iatu tau iato mai ma’din tama, belanna masero. Apa iatu mintu’ to buda la ungkaritutui pa’pana’ta’Na PUANG.
7Iatu to Lewi la bendan untikui datu la pantan untangke pa’buno; minda-minda la tama banua kabusungan la dipatei. La mirondong tu datu ke malei tama sia iake tassu’i.
8Iatu mai to Lewi sia mintu’ to Yehuda napogau’mo tu mintu’ apa napasan to minaa Yoyada; pantan naalami tu taunna la ia tu to mentoe, ke allo katorroan, la ia tu to tang mentoe, ke allo katorroan, belanna tae’ naeloranni to minaa Yoyada melayo tu golongan iato.
9Napa’benganni to minaa Yoyada lako kamandangna saratu’ surodadu tu mai doke sia balulang la bitti’na la kapuana, tu apanna datu Daud dolona sia tu lan banuanNa Puang Matua.
10Napasirundunammi tu mintu’ to buda pantan untangke dokena, randuk dio mai rampe kananna sae lako rampe kairinna banua, sikandappi’ inan pemalaran sia banua, untikui datu.
11Nasolammi tau iato mai lako salian tu anakna muane datu, napasongko’i makota, nabenni Kasa’bian, sia naangka’ datu. Natokkomi Yoyada sola anakna muane, anna metamba nakua: Namaupa’mora tu datu.
12Iatonna rangi Atalya tu gamaranna to buda, tu sae sirampun sia unnarrak-arrak, untendeng datu, malemi tama banuanNa PUANG lako to’ to buda.
13Natiromi sia mangnga, belanna bendanmo tu datu dio to’ lentongna dio babangan; sia bendan tu mintu’ kamandang sitangke tarompe’ sikandappi’ datu, susi dukato tu mintu’ to buda lan lu tondok iato, siparannu-rannu umpannoni tarompe’, sia mintu’ to menani untangke oni-onian, tu pangala pa’pudi-pudian. Nase’bu-se’bumi Atalya tu tamangkalena sia metamba nakua: Denmo pa’tangnga’ leko’, denmo pa’tangnga’ leko’.
14Napesuammi to minaa Yoyada lako mintu’ kamandangna to saratu’, iamotu mai pangulu surodadu, tassu’ sia nakua lako: Solanni tassu’ lan mai tangnga-tangnga barisi’na surodadu sia minda-minda tu unturu’i patei pa’dang. Belanna mangkamo napokada to minaa, kumua: Da mipatei lan banuanNa PUANG.
15Natingkanmi tau iato mai, na iatonna rampo lako babangan Darang dio tongkonan layuk kadatuan, napateimi tau.
16Natananmi Yoyada tu misa’ basse lan alla’na, iamotu kalena na mintu’ to buda sola datu, kumua na iatu tau iato mai la dadi misa’ taunNa PUANG.
17Iatu mintu’ pa’tondokan male lako banua dinii umpenombai Baal, anna rondonni sia natesse tu mai inan pemalaranna sola rapang-rapang dipodeatanna sia napatei duka tu Matan, to minaanna Baal, dio tingo inan pemalaran.
18Napatage’imi Yoyada tu to minaa to Lewi la ungkaritutui tu mintu’na lan banuanNa PUANG, tu mangkamo naboronganni Daud la umpemalaran pemala’ ditunu pu’pu’ lako PUANG, susitu mangka tisura’ lan sukaran alukna Musa situang kaparannuan sia menani, susi atoranna Daud.
19Iatu mintu’ to ma’kampa babangan napadio babangan banuanNa PUANG, da natama misa’ tau, tu maruttak napobua’ misa’ apa.
20Nasolammi tu mintu’ kamandangna saratu’ surodadu sia to la’bi’ sia to umparenta to buda sia mintu’ to buda lan lu tondok, anna solanni tassu’ tu datu lan mai banuanNa PUANG. Malemi tu tau iato mai unnola babangan daona lu tama tongkonan layuk kadatuan, anna paunnisungi tu datu dao isungan kapayungan.
21Iatu mintu’ to buda lan lu tondok parannu-rannu, sia iatu kota marampa’ tonna mangkamo tau iato mai umpatei pa’dang tu Atalya.
<< 2 Tawarikh 23 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel