Kadatuanna Yotam
1Iatu Yotam duangpulomo llima taunna tonna dadi datu, anna ma’parenta sangpulo annan taunna dio Yerusalem. Iatu indo’na disanga Yerusa, anakna Zadok.
2Napogau’mi tu apa malolo dio pentiroNa PUANG susitu mintu’ napogau’ Uzia, ambe’na, apa tae’ natama banua kabusunganNa PUANG. Apa iatu to buda tontong bangpa ma’gau’ kadake.
3Iatu datu umbangun babangan Daona lu banuanNa PUANG, nabuda duka tu pengkarangan dio rinding tembo’ Ofel nabangun.
4Sia umbangun ba’tu pira-pira kota ditambakuku dao lu buntu Yehuda, sia umbangun duka benteng sia menara lan lu pangala’.
5Sirarimi datu to Amon, nataloi, naurunganni lan taun iato napennoloan to Amon tu salaka saratu’ talenta sia gandung sangpulo sa’bunna koro sia dalle sisikan sangpulo sa’bunna koro. Susi dukato tu napennoloan to Amon, tonna taun ma’penduan sia ma’pentallun.
6Susimoto tu Yotam umpaombo’ kuasanna belanna tontong malolo tu gau’na dio oloNa PUANG, Kapenombanna.
7Iatu tang dipokadannapa tu mintu’ tuna’na Yotam, sia mintu’ rarinna sia penggauranna, manassa iatu iannato tisura’mo lan sura’ diona mintu’ datu Israel sia Yehuda.
8Duangpulomo llima taunna tonna dadi datu, anna ma’parenta sangpulo annan taunna dio Yerusalem.
9Mangkato malemi tama batu dilobang tu Yotam sola nene’ to dolona, anna dipeliang lan kotana Daud. Anna Ahas, anakna muane, ussondai dadi datu.
<< 2 Tawarikh 27 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel