Diona tarompe’
1Ma’kadami tu PUANG lako Musa, Nakua:
2Garagangko kalemu da’dua tarompe’ salaka; panggaraga pa’kombong la mugaragai, anna apa iato la mupake untambai ma’misa tu kasirampunan sia la umpake’de’i dio mai to’ tenda.
3Iake napannonii tau tu da’dua tarompe’ pissan dipamurru’, la sangsaean tu mintu’ kasirampunan lako kalemu, dio to’ ba’ba Tenda Kasitammuan.
4Iake napannonii tau tu misa’ tarompe’ pissan dipamurru’, la sangsaean tu mintu’ arung lako kalemu, iamotu pangulu suku to Israel.
5Iake mupannonii misa’ tanda, la ke’de’ tu mintu’ tuntunan, tu dio rampe matallona to’ tenda iato.
6Iake mupannonii tu tanda ma’penduan, la ke’de’ tu mintu’ tuntunan, tu dio rampe lo’na lu to’ tenda iato. La napannoni tau tu misa’ tanda, ke la ke’de’mi.
7Apa ianna ditambai sirampun tu kombongan, pissanri dipamurru’, apa iatu tanda tae’ na la dipannoni.
8Iatu anakna Harun, iamotu to minaa la umpannonii tu tarompe’; iamote tu misa’ atoran dipondokangkomi misiosso’i.
9Sia iake lankomi tondokmi, milao sirari tu uali urrussunkomi, attu iato la mipannoni tu tarompe’ misa’ tanda; tanda iato la umpakilalakomi dio oloNa PUANG, Kapenombammi, ammi dilendokan dio mai ualimmi.
10Susi dukato ke allo kaparannuammi, ke pa’maruasammi sia ke allo bunga’ sombona bulanmi, la mipannoni tu tarompe’ pissan dipamurru’, ke umpogau’komi pemala’ ditunu pu’pu’ sia pemala’ kasalamaran; iatu iannato la umpakilalakomi dio oloNa Kapenombammi: Akumo tu PUANG, Kapenombammi.
Iatu to Israel ke’de’ dio mai Sinai
11Iatonna taun ma’penduan, lan bulan ma’penduan, tonna allo ma’duangpulona bulan iato, tiangka’mi tu gaun dao mai Kema Kasa’bian.
12Attu iato ke’de’mi tu to Israel dio mai padang pangallaran Sinai unturu’ atoran dipamanassa, na iatu gaun torro bang lan padang pangallaran Paran.
13Iamote tu pamulanna nanii ke’de’ tu tau iato mai unturu’ parentaNa PUANG nalopian Musa.
14Iatu dolona ke’de’ iamotu banderana to’ tenda to Yehuda situru’ tuntunanna; na iatu pangulu tuntunan surodadunna Yehuda iamotu Nahason, anakna Aminadab.
15Iatu pangulu tuntunan surodadunna suku to Isakhar iamotu Netaneel, anakna Zuar.
16Iatu pangulu tuntunan surodadunna suku to Zebulon iamotu Eliab, anakna Helon.
17Namane dirondonni tu Kema anna ke’de’ tu mintu’ to Gerson sia to Merari umbullei tu Kema.
18Mangkato ke’de’mi tu banderana to’ tenda Ruben situru’ tuntunanna; iatu pangulu tuntunan surodadunna Ruben iamotu Elizur anakna Syedeur.
19Iatu pangulu tuntunan surodadunna suku to Simeon iamotu Selumiel, anakna Zurisyadai.
20Iatu pangulu tuntunan surodadunna suku to Gad iamotu Elyasaf, anakna Rehuel.
21Namane ke’de’ tu to Kehat, tu umbulle pareanan maindan; dipabendanmi tu Kema, tonna tae’pa narampo tu tau iato.
22Mangkato ke’de’mi tu banderana to’ tenda to Efraim situru’ tuntunanna: iatu pangulu tuntunan surodadunna Efraim iamotu Elisama, anakna Amihud.
23Iatu pangulu tuntunan surodadunna suku to Manasye iamotu Gamaliel, anakna Pedazur.
24Iatu pangulu tuntunan surodadunna suku to Benyamin iamotu Abidan, anakna Gideoni.
25Iatu ma’katampakanna mintu’ to’ tenda ke’de’ iamotu banderana to’ tenda to Dan situru’ tuntunanna; iatu pangulu tuntunan surodadunna Dan iamotu Ahiezer, anakna Amisyadai.
26Iatu pangulu tuntunan surodadunna suku to Asyer iamotu Pagiel, anakna Okhran.
27Iatu pangulu tuntunan surodadunna suku to Naftali iamotu Ahira, anakna Enan.
28Susimoto tu atoran diona kake’deranna to Israel situru’ tuntunanna. Ke’de’mi tu tau iato mai.
29Ma’kadami tu Musa lako Hobab, anakna Rehuel to Midian, matusanna Musa, nakua: La malemokan lako to’ inan tu Napokadamo PUANG diona a’ganna susite kumua: Aku la ungkamaseangkomi; tamalemo sola, angki pogau’ kameloan lako kalemu, belanna PUANGmo umpokadai tu melona diona to Israel.
30Apa mebalimi nakua: Tae’ angku male sola, sangadinna la sulena’ lako tondokku sia lako sangdadiangku.
31Ma’kadami Musa nakua: Da’ mutampekanni, belanna mutandai umba tu melona la tanii ma’tenda lan te padang pangallaran, angki pomata lalanko.
32Iake sisolaki’ male, manassa iatu kameloan, tu Napogau’ PUANG lako kaleki, la kiparampo duka lako kalemu.
33Ke’de’mi tu tau dio mai buntunNa PUANG, anna male lan kalingkan tallung allo, na iatu patti basseNa PUANG dolo dio tingayona tau iato mai la undakaranni inan kapelayoan.
34Iatu gaunNa PUANG daona lu tau iato, ke masiangi, ke ke’de’i tu tau iato mai dio mai to’ tenda.
35Iake ke’de’mi tu patti, ma’kadami tu Musa nakua: Ke’de’mokomi, o PUANG, kumua na iatu mintu’ ualimMi tisambo’-sambo’ sia iatu to ungkabiri’Komi mallai dio mai oloMi.
36Na iake torromi, ma’kadami nakua: SulemoKomi, o PUANG, lako ma’pulo sa’bunna dio lu to Israel ma’sa’bu-sa’bu.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel