Diona pemala’ ditunu
1Ma’kadami tu PUANG lako Musa Nakua:
2Ma’kadako lako to Israel sia kuanni mukua: Iake saekomi tama tondok tu Kukamaseangkomi la minii ma’tondok,
3sia mipemalaran lako PUANG tu pemala’ pantunu, la pemala’ ditunu pu’pu’, la pemala’ pangrere’, la umpangallonni misa’ pangallonan, ba’tu pemala’ tanning inaa, ba’tu pemala’ allo kapuammi, la umpadenan PUANG misa’ bau busarungngu’ dio mai sapi ba’tu domba sia bembe’,
4attu iato iatu to umpennoloan pemala’na lako PUANG la umbaa pissan taa sangpulona epa ta’pung manisak, tu dipasigerok minna’ sangtaa a’pa’na hin la dipokande dipemalaran.
5Sia uai anggoro’ dipopemala’ pantedok; sangtaa a’pa’na hin la mukarang dio pemala’ ditunu pu’pu’ ba’tu pemala’ pangrere’, ke misa’oi domba birang.
6Iake misa’ domba laki la mupennoloan duang taan sangpulona epa ta’pung manisak, dipasigerok minna’ sangtaa tallunna hin dipokande dipemalaran,
7sia uai anggoro’, sangtaa tallunna hin dipopemala’ pantedok. La mipennoloan lako PUANG dipobau busarungngu’.
8Iake mupemalaranni tu misa’ sapi dipopemala’ ditunu pu’pu’, ba’tu la dipopemala’ pangrere’, la umpalesso’ misa’ pangallonan ba’tu dipopemala’ kasalamaran lako PUANG,
9manassa la nabaa tu tallung taan sangpulona epa ta’pung manisak, dipasigerok minna’ sangtangnga hin, dipasisola tu sapi dipokande dipemalaran.
10Sia uai anggoro’ la mubaa sangtangnga hin la dipopemala’ pantedok; mintu’nato la dipopemala’ pantunu la umpadenan PUANG misa’ bau busarungngu’.
11Susimoto la napogau’ tau, ke misa’oi sapi ba’tu misa’oi domba laki, ba’tu ke misa’oi patuoan bitti’, iamotu domba ba’tu bembe’.
12Pada tu bilanganna apa mipemalaran la mipogauran susito, ke misa’oi, unturu’ kabudanna.
13Mintu’ batang to Israel la umpogau’i susito, ke umpennoloanni pemala’ pantunu, la dipobau busarungngu’ lako PUANG.
14Sia, iake misa’ to mentiruran torro ussisolangkomi, ba’tu misa’ to sae tu siosso’mo dio lu kamu, sia iake umpennoloanni pemala’ pantunu, dipobau busarungngu’ lako PUANG, manassa la napogau’ susi kamu.
15Iatu mintu’ kombongan, misa’ri tu aluk dipondok la napeolai la kamu la iatu to sae torro dio lu kamu; iamotu misa’ aluk dipondok matontongan la naturu’ ossorammi; kamu sia to sae la pada bang dio oloNa PUANG.
16Misa’ri tu sukaran aluk sia misa’ri atoran la mituru’ la kamu la to sae torro dio lu kamu.
17Ma’kadami tu PUANG lako Musa, Nakua:
18Ma’kadako lako to Israel sia kuanni, kumua: Iake rampokomi tama tondok, tu Kunii la ussolangkomi,
19manassa iake mikandei tu kande lan tondok, la mipennoloan tu pa’duruk lako PUANG.
20Iatu bunga’ pealammi, iamotu ta’pung dalle sisikan, la digaragai pa’ranggina la dipennoloan dipopa’duruk susikomi umpennoloan pa’duruk lako kalemi dio mai panglullurammi, la susi dukato mipennoloan dipopa’duruk.
21Dio mai bunga’na pealammi, iamotu ta’pung dalle sisikan la mipennoloan pa’duruk lako PUANG misiosso’i.
Kasalan tang diangga’i
22Iake tae’ miangga’i tang unturu’i te misa’ pepasan tu mangka Napokada PUANG lako Musa,
23dio mai tu mintu’na apa Napepasanan PUANG lako kalemi nalopian Musa, randuk allo iato tu Nanii mepasan PUANG sia undinna, misiosso’i,
24iake tang naissanni sia tang naangga’i kasirampunan umpogau’i susito, manassa iatu mintu’ kasirampunan la umpennoloan misa’ anak sapi laki la dipopemala’ ditunu pu’pu’, dipobau busarungngu’ lako PUANG, sisola kande dipemalaran sia pemala’ pantedok unturu’ atoranna, sisola bembe’ laki la diposuru’ pengkalossoran.
25Attu iato to minaa la umpadenan kadiseroian kasalan mintu’ kasirampunan to Israel, anna dipagarri’ tu kasalanna, belanna tae’ naangga’i sia belanna napennoloan tu pamengan pemala’na lako PUANG dipopemala’ pantunu sola suru’ pengkalossoranna dio oloNa PUANG bannang dio kasalanna tu tae’ naangga’i.
26Manassa la dipagarri’ kasalanna tu mintu’ kasirampunan to Israel, susi duka to sae, tu torro dio lu kamu, belanna narampoi kasalan iato tu mintu’ bangsa, anna tae’ naangga’i.
27Iake den misa’ tau umpogau’ kasalan tang diangga’i, manassa la umpennoloan misa’ bembe’ birang sangtaunmo la diposuru’ pengkalossoran.
28Na to minaa la umpadenanni kadiseroian kasalan tu to umpogau’ kasalan tang naangga’i napobua’ penggauran tang naangga’i untengkai pepasanNa PUANG, anna dipagarri’ tu kasalanna.
29Misa’ri sukaran aluk la mituru’, la batang to Israel sia la to sae torro dio lu kamu, diona to umpogau’ misa’ kasalan tang diangga’i.
30Apa minda-minda tu unnangga’i umpogau’ kasalan, la batang to Israel, la to sae, iamo umpa’kada solangi PUANG, na tau iato mai la disabu’i dio mai bangsana,
31belanna umpamatuna kadanNa Puang sia untengkai pepasanNa; manassa la disabu’i, na iatu kakadakeanna napassan kalena.
Diona to untengkai allo katorroan
32Iatonna lan padang pangallaran tu to Israel, diapparammi tu misa’ tau marassan urruruk ranga’-ranga’ tonna allo katorroan.
33Iatu to unnapparanni tu tau iato marassan urruruk ranga’-ranga’, nasolammi lako Musa sola Harun sia mintu’ kasirampunan.
34Napatadangmi, belanna tae’pa nadipamanassa tu apa la digauranni.
35Attu iato ma’kadami tu PUANG lako Musa, Nakua: Manassa la dipatei tu tau iato sia mintu’ kasirampunan la umbatui dio salianna to’ tenda.
36Nasolammi mintu’ kasirampunan tu tau iato lako salianna to’ tenda, nabatui anna mate, susitu mangka Napepasanan PUANG lako Musa.
Rombe-rombe bayu lamba’ ma’pakilala
37Ma’kadami tu PUANG lako Musa, Nakua:
38Ma’kadako lako to Israel mukuanni, kumua la nagaragan kalena tu rombe-rombe dio biring bayu lamba’na, nasiosso’i sia la naampinni’ bannang lango-lango tu rombe-rombe ma’pakilala dio biring tamangkalena.
39Iatu iannato la miporombe-rombe; iake mitiroi lako, la umpakilalakomi tu mintu’ pepasanNa PUANG ammi karitutui tang unturu’ tangnga’ bu’tu lan penaammi ba’tu pa’poraianna matammi, da midinaran la pasandak salu lako rampanan kapa’,
40kumua ammi kilalai sia unturu’i tu pepasanKu, ammi masero dio oloNa Kapenombammi.
41Akumo tu PUANG, Kapenombammi, tu mangka ussolangkomi dio mai tondok Mesir, la dadi Kapenombammi. Akumo tu PUANG, Kapenombammi.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel