1Belanna natiro Bileam kumua melomo dio pentiroNa PUANG, ke dipassakkei tu to Israel, tae’mi nalao susitu bunga’na sia ma’penduanna undaka’ lalan, anna langdoi, sangadinna mempatu lu lako padang pangallaran.
2Iatonna bangunanni Bileam tu matanna, sia natiro tu to Israel ma’tenda unturu’ sukunna. Narampoimi PenaanNa Puang Matua.
3Naparandukmi umpokadai tu kada peada’na sia ma’kada nakua: Kada peada’na Bileam, anakna Beor, sia kada peada’na muane, tu millikmo matanna;
4kada peada’na tu to umperangiimo kadanNa Puang Matua, tu to untiromo patiroNa To umpoissan angge maritik, tonna matindo tibungka’ matanna.
5Lendu’ mala’bi’na tu tendamu, o Yakub, tu katorroammu, o Israel!
6Butung to lombok tiampa’; butung to pa’lak dio biring salu; butung to pondan daa Natanan PUANG; butung to kayu arasi’ dio to’ uai.
7Nalolongmora tu uai dio mai petimbana, nalempanmora tu uai pangambo’na; ondongpi natongloimira datunna tu Agag sia natarompo’mora tu kadatuanna.
8Puang Matua, tu ussolanni lan mai Mesir, Iamo napomatoto’ butung to tanduk sapi laki lampung. Mintu’ bangsa tu napouali naampello’mira, sia iatu mai bukunna nale’to-le’to, sia natarru’mira tinaran tu tau iato mai.
9Umbukku kalena, anna sumpandan susito singa laki, sia butung to misa’ singa birang; mindara la umpabendanni? Nadipassakkemora tu to umpassakkeko sia naditampakkimora ropu tu to untampakkiko ropu!
10Dukkumi tu kasengkeanna Balak lako Bileam, napasisala’pami tu limanna, anna ma’kada tu Balak lako Bileam nakua: Kutambaikomi la untampakki ropu ualingku, nakutiro pentallunmokomi situru’-turu’ umpassakkei tu tau iato.
11Totemo, pallaimokomi lako to’ inanmi; mangkamo kupokada kumua: La kusaroi la’da’komi, apa manassa Nadampa PUANG tu saromi.
12Apa ma’kada tu Bileam lako Balak nakua: Tang kupokadaraka lako mintu’ sumbungan pudukmi tu misua umpellambi’ina’, kumua:
13Moi nabenna’ Balak ponno banuanna tu salaka sia bulaan, tae’ duka kuma’din ullendai parentaNa PUANG la umpogau’ kalenai tu misa’ apa melo ba’tu kadake; apa tu Napokada PUANG, iamoto tu la kupokada.
14Na totemo tiromi, la ke’de’mo’ sule lako bangsaku, iamoto melo ke kupa’nubuarangkomi apa tu la naparampoanni bangsa iate tu bangsami.
15Naparandukmi Bileam umpokada kada peada’na, anna ma’kada, nakua: Kada peada’na Bileam, anakna Beor, sia kada peada’na muane, tu millikmo matanna;
16kada peada’na tu to umperangiimo kadanNa Puang Matua, sia to unnissan kapaissannanNa To patodoranna, tu to untiromo patiroNa To umpoissan angge maritik, tonna matindo tibungka’ matanna.
17Kutiro tu tau iato, apa tae’ natotemo, kupenunu tu tau iato, apa tae’ namandappi’; misa’ bintoen bu’tu lan mai Yakub, misa’ tekken kapayungan lan mai Israel, sia untesse pili’na Moab, sia umpipping mintu’ bati’na Set.
18Attu iato iatu Edom la dadimo lili’ ditalo, sia Seir la dadimo lili’ ditalo – iamotu ualinna. – Apa iatu to Israel la umpasombo kuasanna,
19sia lan mai Yakub nanii untoe kaparentan, sia la ussanggangi tu to mallai lan mai kota.
20Iatonna tiromi tu Amalek, naparandukmi umpokada kada peada’na, anna ma’kada nakua: Iatu pamulanna mintu’ bangsa iamotu Amalek, anna ma’katampakanna iamotu kasanggangan.
21Iatonna tiromi tu to Keni, naparandukmi umpokada kada peada’na, anna ma’kada nakua: Moi matoto’mo tu banuammu, digaragaimo tu serangmu dao buntu batu,
22apa la narampoi duka kasanggangan tu Keni; sangapapa masainna tu Asyur urrampako?
23Naparandukmi umpokada kada peada’na, anna ma’kada nakua: A’a! mindapara la tuo, ke Napogau’i Puang Matua te mintu’na te?
24Apa iatu mai kappala’ dio mai biring tasik to Kitim! Tau iato mai la umpatunduk Asyur sia umpatunduk Heber, apa la sanggang duka tu bangsa iato.
25Mangkato ke’de’mi tu Bileam anna sule lako inanna, sia iatu Balak sule dukamo.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel