Iatu to Israel umpenombaimo Baal-Peor
1Iatonna torromo tu to Israel dio Sitim, naparandukmi ma’gau’ sala sola baine to Moab.
2Belanna natambai tu bangsa iato lako to’ pemala’ pangrere’ dipemalaran deatanna, anna kumande dio tu bangsa iato, anna menomba lako deatanna baine iato.
3Iatu to Israel menturu’mo lako Baal-Peor, iamoto anna dukku tu kasengkeanNa PUANG ullaoi Israel,
4sia ma’kada tu PUANG lako Musa, Nakua: Alami tu mintu’ pangulunna bangsa iato, ammu toke’i dio tingayona to buda la umpamatande PUANG, kumua anna soro’ tu kare’dekan ara’Na PUANG dio mai Israel.
5Ma’kadami tu Musa lako mintu’ to ma’paolai salunna to Israel nakua: Pantan la mipatei dio lu taummi minda-minda tu menturu’mo lako Baal-Peor.
6Pakalan saemi misa’ to Israel umbaa misa’ baine to Midian lako siulu’na dio pentirona Musa sia mintu’ kasirampunan to Israel, tonna marassan tu tau sitangiran dio to’ ba’ba Tenda Kasitammuan.
7Iatonna tiromi Pinehas, anakna Eleazar, anakna to minaa Harun tu iannato, ke’de’mi lan mai tangngana kasirampunan, nasitetang misa’ doke.
8Attu iato undimi naula’ tu muane to Israel, anna lambi’i lan inan kamammaran, anna rokki tu tau sola duai la iatu muane Israel la iatu baine diong to’ banneanna. Attu iato ra’dami tu kasanggangan urrampoi to Israel.
9Iatu to mate belanna kasanggangan iato, den duang pulo nna’pa’ sa’bu.
10Ma’kadami tu PUANG lako Musa, Nakua:
11Iatu Pinehas, anakna Eleazar, anakna to minaa Harun, umpara’dai tu kare’dekan ara’Ku dio mai to Israel, belanna maparrang tongan dio lu tau iato mai umpakala’bi’Na’, iamoto natae’mo Kumaparrang ussabu’i tu to Israel.
12Iamoto pokadanni: Tonganna, la Kukamasei basse kasalamarangKu.
13Kumua anna ia sia mintu’ bati’na umpobassei tu diona katominaan matontongan, belanna maparrang umpakala’bi’ Kapenombanna sia umpadenan kadiseroian kasalan to Israel.
14Iatu to Israel tu dipatei sola baine to Midian, disanga Zimri, anakna Salu, iamotu pangulu rapunna to Simeon.
15Sia iatu baine to Midian tu dipatei, disanga Kozbi, iamotu anakna Zur; tu pangulu rapunna suku to Midian.
16Ma’kadami tu PUANG lako Musa, Nakua:
17La mipogau’ lako to Midian susito mipogau’ lako ualimmi sia patei,
18belanna iatu penggauranna lako kalemi susito uali untangnga’-tangnga’ kadake unneakomi diona Peor sia diona Kozbi, anak arungna to Midian, iamo siulu’na baine, tu dipatei tonna allo kasanggangan tete dio Peor.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel