Alkitab Mobile SABDA
[VER] : [TORAJA]     [PL]  [PB] 
 <<  Bilangan 27 >> 

Diona ba’gi sipatunna lako pia baine

1Sae mengkareke’ tu mai anakna baine Zelafehad, anakna Hefer, anakna Gilead, anakna Makhir, anakna Manasye, dio mai pa’rapuanna Manasye, anakna Yusuf – inde sia tu sanganna anakna baine, iamotu Mahla, Noa, Hogla, Milka sia Tirzs-

2anna bendan dio olona Musa sia to minaa Eleazar sia iatu mai arung, sia mintu’ kasirampunan dio to’ ba’ba Tenda Kasitammuan nama’kada, nakua:

3Iatu ambe’ki mate lan padang pangallaran, apa tangia iatu sangbilangan to massituru’ umbali PUANG, iamotu to massituru’ lan kapabali-balianna Korah, apa natumang ia kasalanna kalena, namate, anna tae’ tu anakna muane.

4Ma’apai na iatu sanganna ambe’ki la pa’de poto’ lan mai pa’rapuanna, belanna tae’ anakna muane? Benkan kami ba’gingki tu apa dio lu siulu’na ambe’ki.

5Naparampomi Musa tu pekutananna baine iate dio oloNa PUANG.

6Ma’kadami tu PUANG lako Musa, Nakua:

7Iatu anakna baine Zelafehad tonganna tu napokada; manassa la muben ba’ginna, tu apa dio lu siulu’na ambe’na, sia la mupalele tu taa mana’na ambe’na lako kalena.

8Lako to Israel la ma’kadako kumua: Iake den misa’ tau mate natae’ tu anakna muane, manassa iatu taa mana’na la mupalele lako anakna baine.

9Iake tae’i tu anakna baine, la muben tu taa mana’na lako siulu’na.

10Iake tae’i tu siulu’na, la muben tu taa mana’na lako pa’amberanna.

11Iake tae’i tu siulu’na ambe’na, manassa la muben tu taa mana’na lako sangdadian marengke’na dio mai pa’rapuanna, anna poapai. Iamote tu misa’ atoran dipondok lako to Israel, susitu Napepasanan PUANG lako Musa.

Passondana Musa

12Ma’kadami tu PUANG lako Musa, Nakua: Kendekko langngan buntu Abarim, ammu tiroi tu tondok, mangka Kukamasean to Israel.

13Iake mutiromi, la sisarak dukamoko angin dipudukmu sule lako nene’ to dolomu susi siulu’mu Harun.

14Belanna tonna pabali-bali tu kasirampunan lan padang pangallaran Zin, miea tu parentaKu tu Kukua: La mipakala’bi’Na’ dio pentirona tau iato mai dio to’ uai. Iamoto tu uainna Meriba sikandappi’ Kadesh dio padang pangallaran Zin.

15Ma’kadami Musa lako PUANG, nakua:

16Iatu PUANG, Kapenombanna penaanna mintu’ apa tuo, la unnangka’ misa’ muane umpangului tu kasirampunan,

17tu lu tama lu lan mai dio tingayona tau iato mai sia iatu ussolanni tassu’ sia ussolanni sule tu tau iato, kumua da nasusi to domba tae’ panglaana tu kasirampunanNa PUANG.

18Ma’kadami tu PUANG lako Musa Nakua: Alami tu Yosua, anakna Nun, tu misa’ muane, tu naponnoi penaa, muremme’i limammu,

19ammu popennoloi lako to minaa Eleazar sia lako mintu’ kasirampunan, sia pokadanni parentamu dio tingayona tau iato mai,

20sia soronganni pira tu kataromposammu, kumua anna rangii mintu’ kasirampunanna to Israel.

21La bendan dio olona to minaa Eleazar anna pekutananni to minaa Eleazar tu pangra’ta’na Urim dio oloNa PUANG. Anna tete dio parentaNa anna lu tama lu lan mai tu tau iato mai, la ia la iatu mintu’ to Israel nasisolan, sia mintu’ kasirampunan.

22Napogau’mi Musa, susitu Napasananni PUANG, nasolammi tu Yosua lako olona to minaa Eleazar sia dio tingayona mintu’ kasirampunan.

23Naremme’imi limanna sia napokadan parentana, susitu mangka Napokada PUANG nalopian Musa.



 <<  Bilangan 27 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel