Pangallonanna baine
1Ma’kadami tu Musa lako pangulunna suku to Israel nakua: Inde sia tu kada mangka Napepasanan PUANG.
2Iake den misa’ muane mangallonan lako PUANG, ba’tu umpalao sumpa la umpassan misa’ tanggungan, tae’ na la tang umpopembuai tu kada; mintu’ tu apa sun dipudukna la napopembua.
3Apa iake den misa’ baine mangallonan lako PUANG sia umpassan misa’ tanggungan lan banuanna ambe’na, tonna mangurapa,
4sia narangimo ambe’na tu pangallonanna sia iatu tanggungan napassan, apa napa’loko-lokoi ambe’na tu baine iato, manassa iatu mintu’ pangallonanna la dadi sia mintu’ tanggungan napassan la dadi.
5Iake tang napasituru’i ambe’na, tonna rangii, manassa tae’ na la dadi tu mintu’ pangallonan sia mintu’ tanggungan napassan; la Napagarri’ PUANG tu iannato, belanna tang napasituru’ ambe’na.
6Iake to kemuane, anna tontong bangsia umpassan pangallonanna ba’tu tanggunganna, tu naallu’, tu tae’ natangnga’ meloi,
7anna rangi muanena, apa napa’loko-lokoi bang tonna rangimi, manassa la dadi tu pangallonanna sia mintu’ tanggungan napassan la dadi duka.
8Apa iatonna rangimi muanena sia tang napasituru’, anna dampai tu pangallonan natanggung sia iatu tanggungan napassan, tu tang natangnga’ melo; la Napagarri’ PUANG tu iannato.
9Apa iatu pangallonanna baine balu ba’tu baine mangka ditantang, iatu mintu’ tanggungan napassan, la dadi lako kalena.
10Sia iake mangallonanni lan banuanna muanena ba’tu umpalao sumpa la umpassan misa’ tanggungan,
11sia narangi muanena, apa napa’loko-lokoi bang sia tae’ nama’kada kumua tang napasituru’, manassa la dadi mintu’ pangallonanna sia mintu’ tanggungan tu napassan la dadi.
12Apa iake nadampa tonganni muanena, ke narangii manassa tae’ misa’ apa tu tassu’ dio pudukna, tu pangallonanna sia iatu tanggunganna la dadi; nadampamo muanena, sia la Napagarri’ PUANG tu iannato.
13Mintu’ pangallonan sia mintu’ tanggungan napalaoan sumpa la umpamadiong kalena, ma’din la napadadi muanena sia ma’din la nadampa muanena.
14Iake napa’loko-lokoi muanena kiallo-kiallo, manassa napadadi tu mintu’ pangallonanna ba’tu tanggungan napassan; napadadi, belanna napa’loko-lokoi, ke narangimi.
15Apa iake nadampa tonganni, tonna rangimi, manassa la natanggung tu kakadakeanna.
16Iamote tu mintu’ aluk dipondok, tu Napepasanan PUANG lako Musa diona kakuasanna misa’ muane lako bainena sia kakuasanna misa’ ambe’ lako anakna baine, ke mangurapi, tu torro lan banuanna ambe’na.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel