Alkitab Mobile SABDA
[VER] : [TORAJA]     [PL]  [PB] 
 <<  Bilangan 31 >> 

Pa’pabala’na lako to Midian

1Ma’kadami tu PUANG lako Musa, Nakua:

2Alammi bala’ tu to Israel lako to Midian; mumane sisarak angin dipudukmu sule lako nene’ to dolomu.

3Ma’kadami tu Musa lako bangsa iato nakua: Suai tu muane pira sakka’ la lao parari, la ullaoi Midian, anna pogau’i tu pa’pabala’Na PUANG lako Midian.

4Lan mai simisa’ suku dio mai mintu’ suku to Israel la musua sangsa’bu tau lao parari.

5Susimoto dirampun dio mai tongkonan to Israel sisangsa’bu muane, ke simisa’o suku, iamotu sangpulo dua sa’bu tu to sakka’ lao parari.

6Nasuami Musa tu tau iato lao parari, sangsa’bu, ke misa’oi suku, tau iato sisola Pinehas, anakna to minaa Eleazar, lao parari, umbaa pareanan maindan sia tarompe’ dipannoni la umpa’bengan tanda.

7Laomi parari ullaoi Midian, susitu mangka Napepasanan PUANG lako Musa, anna patei tu mintu’ muane.

8Senga’ iatu to napatei, sia ia duka tu datunna Midian napatei; iamotu Ewi, Rekem, Zur, Hur na Reba, limai tu datu Midian; sia napatei duka pa’dang tu Bileam, anakna Beor.

9Sia narampa to Israel tu bainena to Midian, sia anakna; sia mintu’ patuoanna sia mintu’ apanna sia mintu’ iananna nalo’do’i nasang.

10Mintu’ tu mai kotana, tu nanii ma’tondok sia mintu’ tu to’ tendana naballa nasang api.

11Namane unnalai tu mintu’ pangrampa sia mintu’ tau sia patuoan tu dirampa,

12anna baai tu to dirampa, sia pangrampa sia barang apa dirampa lako Musa sia to minaa Eleazar sia kasirampunan to Israel tama to’ tenda, lako padangna Moab dio biring Yordan, sitingoan Yerikho.

13Malemi tu Musa sola to minaa Eleazar sia mintu’ pangulunna kasirampunan umpessitammui lako salianna to’ tenda.

14Re’dekmi tu kasengkeanna Musa lako pangulunna surodadu, iamotu kamandangna to sisangsa’bu sia kamandangna to sisaratu’, tu sule dio mai kasirarian.

15Anna ma’kada tu Musa lako tau iato nakua: Ma’apari mipatuopi tu mintu’ baine?

16Manassa iamote tu napobannang to Israel unturu’ pa’patudunna Bileam, anna tang maruru’ lako PUANG tu diona umpenombai Peor, naurungan rampo tu kamandasan dio lu kasirampunanNa PUANG.

17Iamoto pateimi tu mintu’ muane dio lu pia sia ia duka tu mintu’ baine tu mangkamo sangampa’ muane la mipatei.

18Apa iatu mintu’ pia dio lu baine, tu tae’pa nasangampa’ muane, la mipatuoan kalemi.

19Nakamu te torrokomi dio salianna to’ tenda pitung allo; minda-mindakomi tu umpatei misa’ tau, sia minda-mindakomi ungkaka’i tu to dipatei, sipatu la napamasero tu kalena dio mai sala ke allo ma’pentallun sia ke allo ma’pempitu, la kalemi la iatu to mirampa.

20Sia mintu’ pakean sia mintu’ pareanan balulang sia mintu’ panggaraga bulu bembe’ sia mintu’ pareanan kayu la dipamasero nasang dio mai maruttakna.

21Ma’kadami tu to minaa Eleazar lako mintu’ surodadu, tu malemo parari, nakua: Inde sia tu atoran sukaran aluk, tu mangka Napepasanan PUANG lako Musa, iamotu:

22Bulaan manna sia salaka, tambaga, bassi, tima pute sia tima lotong,

23mintu’ tu apa ma’din disa’po, la dipatama to’ api, anna masero; moi susito, la dipamasero duka uai ma’pamasero; sia mintu’ tu apa tae’ nama’din disa’po, la dipatama to’ uai.

24Sia iake allo ma’pempitu, la mibusukki tu pakeammi, ammi masero, mimane ma’din tama to’ tenda.

Diona pangrampa lan kasirarian

25Ma’kadami tu PUANG lako Musa, Nakua:

26Pamanassai tu bilanganna apa dirampa, iamotu tau sia iatu patuoan dirampa, iko sia to minaa Eleazar sia pangulu kasirampunan,

27sia la mitaa dua tu pangrampa, sangtaan lako to sitangke pa’buno, tu to lao parari, sia sangtaan lako mintu’ kasirampunan.

28Sia la mudurukan PUANG tu pa’duruk dio mai surodadu, tu lao parari, iamotu misa’, ke silima ratu’oi tau, la sapi la keledai la domba, susi dukato.

29Iatu iannato la muala dio mai sangsese, tu dipamanassan to parari, ammu sorongi lako to minaa Eleazar la dipopa’duruk lako PUANG.

30Apa iatu sangtaanna tu dipamanassan to Israel, la muala misa’ tu to dirampa, ke silimangpulooi tau, la sapi la keledai la domba, dio mai mintu’ patuoan, la susi dukato, sia la musorong lako to Lewi, tu ungkaritutui kemaNa PUANG.

31Napogau’mi Musa sola to minaa Eleazar, susi tu mangka Napepasanan PUANG lako Musa.

32Iatu pangrampa, tu torronapa, tu apa dirampa, tu narampa to parari, annan ratu’na pitungpulo llima sa’bu domba,

33sia pitungpulo ndua sa’bu sapi,

34sia annan pulona mmisa sa’bu keledai,

35sia tau, iamotu mai baine, tu tang sangampa’pa muane, den tallungpulo ndua sa’bu budanna.

36Iatu sangsesena, tu taana to lao parari, den talluratu’ tallungpulo mpitu sa’bu limaratu’ domba budanna.

37Sia iatu pa’duruk lako PUANG iamotu annan ratu’ pitungpulo llima domba.

38Anna sapi tallungpulo nnannan sa’bunna, na iatu didurukan PUANG pitungpulo.

39Iatu keledai den tallungpulo sa’bunna llimaratu’; na iatu didurukan PUANG annan pulona mmisa.

40Na iatu tau sangpulo annan sa’bu; na iatu didurukan PUANG tallungpulo ndua.

41Nasorongmi Musa tu pa’duruk, tu didurukan PUANG, lako to minaa Eleazar, susitu mangka Napepasanan PUANG lako Musa.

42Na iatu sangsesena, dipamanassammo to Israel, tu nasarakki Musa dio mai to lao parari,

43iamotu sangsesena dipamanassan kasirampunan, den talluratu’ ntallungpulo mpitu sa’bu llimaratu’ domba.

44Na tallungpulo nnannan sa’bunna tu sapi.

45Na tallungpulo sa’bunna llimaratu’ keledai,

46na sangpulo annan sa’bunna tu tau.

47Naalami Musa dio mai sangsesena, tu dipamanassan to Israel, misa’ tu to dirampa, ke silimangpulooi, la tau la patuoan, nasorongi lako to Lewi, tu ungkaritutui KemaNa PUANG, susitu mangka Napepasanan PUANG lako Musa.

48Undinnato mengkareke’mi lako Musa tu mintu’ pangulunna tu to sisangtuntunan, iamotu kamandangna to sangsa’bu sia kamandangna to saratu’, nama’kada lako nakua:

49Iatu taummi mangkamo unnia’i tu bilanganna to parari, tu kiparenta, na tau iato tae’ misa’ pa’de.

50Kami te kibaa tu pamengan dipennoloan lako PUANG, pantankanni ungkabu’tui tu ianan bulaan, iamotu gallang lentek, komba, sissin peca’, baba’ sia manikata, la umpadenan kadiseroian kasalan penaanta dio oloNa PUANG.

51Natarimami Musa sola to minaa Eleazar to bulaan dio mai tau iato, iamotu mintu’ pareanan pa’tampa.

52Na iatu mintu’ bulaan dio mai pa’duruk, tu naduruk dio mai kamandangna to sisangsa’bu sia to sisaratu’, tu dipennoloan lako PUANG, iamotu sangpulo annan sa’bunna mpituratu’ llimangpulo sikele’.

53Mintu’ to parari pantan unnalammo kalena pangrampa.

54Natarimami Musa sola to minaa Eleazar tu mintu’ bulaan dio mai kamandangna to sangsa’bu sia to saratu’, anna baai lako Tenda Kasitammuan, napotanda pengkilalan to Israel dio oloNa PUANG.



 <<  Bilangan 31 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel