Alkitab Mobile SABDA
[VER] : [TORAJA]     [PL]  [PB] 
 <<  Daniel 12 >> 

1Attu iato la bendan tu Mikhael, arung kapua, tu untundui mintu’ bati’na bangsamu; sia la den tu misa’ attu kadipandasan kapua, tu tae’ bangpa susinna dadi temponna den tu mai bangsa sae lako attu iate. Apa lan attu iato la tilendok tu bangsamu; iamotu mintu’ to diappa’ tisura’ lan Sura’ iato.

2Anna buda tu to matindomo lan lipu daenan, la malimbangun sule, den lu lako katuoan sae lakona, den lu lako kaditattan, iamotu apa megi’giran sae lakona.

3Iatu mintu’ to paissan la parrang susi arrangna batara, sia mintu’ to urrenden buda tau lako kamaloloan la parrang susi bintoen tontong sae lakona.

4Apa iko, e Daniel, nannai te mintu’ kada iate sia ca’i te Sura’ sae lako attu ma’katampakanna; buda tu tau la unnunnungi sia iatu kapaissanan la sakerangngan-rangnganna.

5Naaku te, Daniel, kutiro manassa denpa da’dua senga’na, iatu misa’ dio randan indena mai salu, na iatu misa’nao dio randan sambalinna lu salu.

6Ma’kadami tu misa’ lako tu tau ma’tamangkale lenang, tu bendan daona lu uai salu, nakua: Sangapapira namane ma’katampakanna te apa kalle-kallean iate?

7Kurangimi umpalao sumpa tu to ma’tamangkale lenang, tu bendan daona lu salu, unnangka’ lima kananna sia lima kairinna langngan langi’, sia ussa’bu’ sanganNa Totuo tontong sae lakona: Misa’ attu sia ba’tu pirang-pirang attu, na sangtangnga attu; na ianna lambi’mi katappuranna unnisak-nisak kuasanna bangsa masero, maneri diganna’i tu mintu’na apa iate.

8Kurangi sia tu iannato, apa tae’ kupebuyu’i angku ma’kada kukua: O puang, umbara la nakua kasundunanna te apa iate?

9Apa ma’kada nakua: Malemoko, e Daniel, belanna mintu’ apa iate la manda’ dibuni sia dica’ sae lako attu ma’katampakanna.

10Buda tu tau la dipamasero sia dipamatasak sia la disudi, apa iatu to tang mekaaluk la tontong lolang tang mekaaluk; moi misa’ tu to tang mekaaluk tae’ la untandai, apa iatu to unnampui tangnga’ kinaa la untandai tu iannato.

11Randuk dio mai pemala’ nenne’ bang kiallo-kiallo dipa’dei sia dipabendan tu apa megallian ma’kasanggang, den sangsa’bu dua ratu’ ngkasera pulona allona.

12Maupa’ tu to matangkin ma’peagi, anna lambi’i tu attu sangsa’bu talluratu’ tallungpulo llima allona.

13Apa iko, e Daniel, malemoko umpellambi’i lampakmu sia melayoko mumane malimbangun untimang dalle’mu, ke allo ma’katampakanna.



 <<  Daniel 12 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2021
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran