Haman la morai ussabu’i to Yahudi
1Iatonna mangkamo dadi te mintu’nate, napatarompo’mi datu Ahasweros tu Haman, anakna Hamedata, to Agag, sia napakala’bi’ sia mandu napamatande tu kao’koranna naiatu mintu’ arung nasolan.
2Mintu’ to diala pareana datu, tu lan babangan datu, malinguntu’ sia tukku menomba dio olona Haman, belanna susimo napasan datu, kumua la dipogau’ susito lako kalena. Apa iatu Mordekhai tae’ namorai malinguntu’ sia tukku menomba.
3Ma’kadami tu mintu’ to diala pareana datu, tu lan babangan datu, lako Mordekhai, nakua: Ma’apai ammu lendai tu parentana datu mala’bi’?
4Moi anna pokadanni tau kiallo-kiallo susito, tae’ duka naperangii, naurunganni tau iato umpokadanni Haman, la untiroi, kumua ba’tu la tontong siai tu a’ganna Mordekhai, belanna napokadamo, kumua ia misa’ to Yahudi.
5Iatonna tiromi Haman tu Mordekhai kumua tae’ namalinguntu’ sia tukku menomba dio olona, re’dekmi ara’na.
6Apa nasanga tangganna’pa ke Mordekhai manna napatei, belanna napokadamo tau lako tu bangsana Mordekhai; iamoto nadaka’ lalan tu Haman la ussanggangi tu mintu’ to Yahudi, bangsana Mordekhai, lan mintu’ kadatuanna Ahasweros.
7Iatonna bulan bunga’na, iamotu bulan Nisan, taun ma’pessangpulo duanna kadatuanna Ahasweros, nabuangmi tau tu Pur dio olona Haman – iamotu pa’loterei – la umpamanassa misa’ allo dio mai mintu’ allo sia misa’ bulan dio mai mintu’ bulan sae lako bulan ma’pessangpulo dua, iamo bulan Adar.
8Ma’kadami Haman lako datu Ahasweros nakua: Den misa’ bangsa tu tisambo’ sia umpamarimbangan kalena dio lu mintu’ bangsa lan mintu’ propinsi lan kadatuanna puang, sia iatu atoranna bangsa iato sisengaran atoranna mintu’ bangsa, sia iatu atoranna datu tae’ naturu’i, iamoto tae’ nasipatu la naeloran datu torro manaman.
9Iake nakalo’i penaanna datu melo ke dipatassuranni misa’ sura’ parenta la ussabu’i tu tau iato mai; na akumora untimbanganni sangpulo sa’bu talenta salaka tu to untoe toean la umpatamai pangrampunan doi’na datu.
10Naalami datu tu sissin peca’na lan mai rakka’na anna benni Haman, anakna Hamedata, to Agag, ualinna to Yahudi.
11Ma’kadami tu datu lako Haman, nakua: Iatu salaka iato dikamaseangko sia ia duka tu bangsa iato, ammu pogau’i lako tu musanganna melo.
12Ta’kala natambaimi tu mintu’ to massura’na datu tonna allo ma’pessangpulo tallunna bulan bunga’na, sia disura’ tu sura’ susi tu napasan Haman lako mintu’ to maraa lompona datu, sia mintu’ to maraa dio lu mintu’ propinsi sia arungna mintu’ bangsa, lako mintu’ propinsi umpake passura’na siamo sia lako mintu’ bangsa umpake basana siamo; iatu sura’ iato mai disura’ tete dio sanganna datu Ahasweros sia dica’ sissin peca’na datu.
13Napakatumi tu mintu’ sura’ iato nabaa ba’tu pira-pira to pambaa sura’ malinta’ lako mintu’ propinsinna datu kumua la nasanggangi tau, la napatei sia nasabu’i tu mintu’ to Yahudi randuk dio mai pia sae lako tomatua, moi pia’-pia’ sia baine, lan sangallo, iamotu allo ma’pessangpulo tallunna bulan ma’pessangpulo dua – iamotu bulan Adar – sia kumua anna rampai tau tu iananna tau iato mai.
14Iatu pallemba’na sura’ iato la dipaissanan tau lan mintu’ propinsi butung misa’ atoran lako mintu’ bangsa, kumua nama’parandan tu tau iato mai sae lako allo iato.
15Male nasangmi tu mintu’ pambaa sura’ malinta’ lumingka umpakasia’ tonganni unturu’ parentana datu, sia dipa’peissanan lan kota benteng Susan tu atoran iato. Sia iatonna marassan tu datu sola Haman ma’dokko mangiru’, narampoimi kamaramban tu kota Susan.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel