Ester mennolo lako datu
1Iatonna allo ma’pentallun umpakemi pakean kadatuan tu Ester, namale bendan lako tingayo bilik lanna lu tongkonan layukna datu sitingoan bilik datu, tonna unnisung tu datu dao isungan kapayunganna lan bilik datu sitingoan lalan tama bilik iato.
2Iatonna tiromi datu tu datu baine Ester bendan dio tarampak, bu’tumi kamamaliranna datu lako Ester, anna turoi tekken bulaan kadatuan, tu natoe; saemi tu Ester mengkareke’, nakaka’i tu tampak tekken kadatuan.
3Ma’kadami datu lako nakua: Apara mutungkanan datu baine Ester, sia apara mukamorai? Moi nasesena te kadatuan kuben dukako.
4Ma’kadami Ester nakua: Iake nakalo’i penaanna datu, nasae tu datu sola Haman allo iate lako pa’maruasan tu mangka kupasakkaran datu.
5Ma’kadami tu datu lako tau nakua: Tambai tu Haman madoi’, anta turu’i tu palakunna Ester. Saemi tu datu sola Haman lako pa’maruasan tu napasakka’ Ester.
6Ma’kadami datu lako Ester tonna marrassan mangiru’ anggoro’ nakua: Apara palakummu? Manassa la kupasituru’. Sia apara mukamorai? Moi anna sangsese kadatuan, kuben dukako.
7Mebalimi tu Ester nakua: Inde sia tu palakungku sia pa’poraiangku:
8Iake denni kamaturu-turuanna datu lako kaleku sia nakalo’i penaanna datu la umpasituru’i tu palakungku sia umpasiolai tu apa kukamorai, ke ma’dinni nasaepa tu datu sola Haman lako pa’maruasan, tu la kupasakkarangkomi; namasiangpa angku pogau’i susitu napokadanna datu.
Dipabendanmo tu lentong la dinii ussula Mordekhai
9Allo iato malemi tu Haman parannu sia sende penaanna, apa iatonna tiromi Haman tu Mordekhai lan babangan datu manoka bendan sia tae’ napanggega’ la umpekatabe’i, tarru’ re’dekmi ara’na lako Mordekhai.
10Apa napodoran Haman tu kalena, anna tarru’ male lako banuanna, anna tambai tu mintu’ sangmanena sia Zeresh, bainena.
11Nauleleanmi Haman lako tau iato mai tu kakapuanna kasugiranna sia kabudanna anakna muane sia kanapakala’biranna datu sia kanapamatandeanna na iatu mintu’ arung sia taunna datu.
12Sia nakuapa Haman: Moi misa’ tau tae’ natambai datu baine Ester la sae sola datu lako pa’maruasan napasakka’ sangadinna aku manna, sia masiang duka aku manna sola datu tu natambai.
13Apa mintu’na te tae’ gai’na lako kaleku, ke tontongpa’ untiroi tu Mordekhai to Yahudi iato unno’ko’pa lan babangan datu.
14Ma’kadami tu Zeresh, bainena, sia mintu’ sangmanena lako nakua: Melo ke digaragai tu misa’ lentong kayu, limangpulo siku langka’na ammi mela’bik umpokadanni datu masiang anna sulai tau tu Mordekhai inde to dao; namangkato mimane sende male sola datu lako pa’maruasan iato. Naporaimi Haman te kada iate, namesua unggaragai misa’ lentong.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel