Mordekhai dipakala’bi’
1Bongi iato pa’demi tu tikkaru’du’na datu. Mesuami umpopebaai tu sura’ kapengkilalan, iamotu sura’ ossoran, anna basai tau iato mai dio olona datu.
2Naapparammi tau disura’ lan, kumua iatu Mordekhai umpaombo’i tu diona Bigtan sola Teresh, to mase’ponna dua datu, tu naala bilangan to ma’kampa ba’ba, kumua iatu tau iato mai undaka’ lalan la umpata’pai lima datu Ahasweros.
3Ma’kadami datu nakua: Kamala’biran apara sia kadipangkaran apara mangka diben Mordekhai diona tu iannato? Mebalimi tu ba’tu pira-pira to mase’ponna datu tu lan diamanna nakua: Moi misa’ tae’ apa dibenni.
4Ma’kadami datu nakua: Mindara tu dio tarampak? Iatu Haman sirupangmo sae lako tarampak saliananna tongkonan layuk kadatuan, la umpokadai lako datu kumua nasulai tu Mordekhai dao lentong tu mangka napabendananni.
5Ma’kadami tu mai tomase’ponna datu lako datu nakua: Haman tu bendan dio tarampak. Ma’kadami datu nakua: Suai natama dio mai.
6Iatonna tamamo tu Haman nakuami datu lako: La dipatumbai tu tau tu nakalo’ penaanna datu la dipakala’bi’? Nasangami Haman lan penaanna: Minda tu la napakala’bi’ tongan datu ke tae’i naaku?
7Iamoto ma’kadami tu Haman lako datu nakua: Iatu tau tu nakalo’ penaanna datu la dipakala’bi’, la susite:
8La nabaa tau tu pakean kadatuan, tu biasa datu kalena umpakei sia misa’ darang, tu biasa datu kalena ussakei, tu dibeloi makota kadatuan ulunna.
9Na iatu pakean sia iatu darang la dipatoei sala umbannai tu mintu’ arungna datu, iamotu sala umbannai tu tau mala’bi’na, kumua anna papakei sia napakendekki langngan darang tu tau iato, tu nakalo’ penaanna datu la dipakala’bi’ sia narendenni tau tu darang nasakei unnolai tana lapang kota, anna metamba-tamba dio olona, nakua: Susimo dipogaurannito tu tau nakalo’ penaanna datu dipakala’bi’.
10Ma’kadami datu lako Haman nakua: Madoi’ko unnalai tu pakean sia darang, susitu mangka mupokada, ammu pogau’i susito lako Mordekhai, to Yahudi, tu unno’ko’ lan babangan datu. Moi misa’ tae’ muma’din tang umpogau’i dio mai tu mintu’ apa mangka mupokada.
11Naalami Haman tu pakean sia darang iato, anna papakei tu Mordekhai, anna rendenni unnolai tana lapang kota, nametamba-tamba dio olona nakua: Susimo dipogaurannito tu tau nakalo’ penaanna datu dipakala’bi’.
12Mangkato sulemi tu Mordekhai lako babangan datu, apa iatu Haman madoi’ sule lako banuanna, malallang ara’na sia mellullung.
13Nauleleanmi Haman lako Zeresh, bainena sia lako mintu’ sangmanena tu mintu’ apa dadi lako kalena. Ma’kadami tu mintu’ to paissan-issanna sia Zeresh, bainena, lako nakua: Iake bati’ to Yahudi tu Mordekhai, tu dio tingayona minii randuk talo, manassa tae’mo mibelai la unneai, sangadinna inang la talo tarru’mokomi dio tingayona.
14Marassan siapa sipa’kada-kada tau iato mai, saemi ba’tu pira-pira to mase’ponna datu, nasolanni madoi’ tu Haman lako pa’maruasan tu napasakka’ Ester.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel