1Napa’parentammi datu Darius undaka’i lan pa’rampunanna mintu’ sura’ dio Babel, tu dinii unnanna mintu’ ianan;
2diomi Ahmeta, iamotu kota benteng propinsi Media, dinii unnapparanni tu misa’ sura’ tilulun, tu dinii ussura’ kada nakua:
3Sura’ dianna batu silambi’: iatonna taun bunga’na datu Koresh ma’parenta, napatassu’mi datu Koresh te parenta iate nakua: Iatu banuanNa Puang Matua dio Yerusalem, banua iato sipatu dibangun sule, dadi misa’ inan la nanii tau umbaa pemala’; sia iatu parandanganna manassa la dioton; iatu langka’na annan pulona siku, iatu babana annan pulona siku.
4La tallung papa’ batu kapua sia sangpapa’ kayu. Mintu’ tu langgoso’na la dipatassu’ dio mai pa’rampunan doi’na kadatuan.
5Sia mintu’ pareanan bulaan sia salaka dio banuanNa Puang Matua, tu naala Nebukadnezar lan mai Banua Kabusungan dio Yerusalem, nabaa lako Babel, la dipasule, anna rampo lako inanna, lako Banua Kabusungan dio Yerusalem, sia la mupatorro lan banuanNa Puang Matua.
6Iamoto, e Tatnai, to maraa lompo dio lili’ sambalinna lu Salu, Syetar-Boznai sola sangpangka’na, iamotu mintu’ to diala parea lan lili’ sambalinna lu Salu, manassa la untoyangangkomi kalemi inde to dio mai;
7da midampai tu pengkarangan dio banuanNa Puang Matua; popa’elo’nai tu to maraanna to Yahudi sia pekaamberanna tau iato mai nabangunni tu banuanNa Puang Matua dao inanna.
8Sia misa’pa tu parenta kupatassu’ tu sipatu la mipogau’ lako te mintu’ pekaamberanna to Yahudi, tu marassan umbangun banuanNa Puang Matua iate: iatu doi’ tama pa’rampunanna kadatuan, iamotu sima lili’ sambalinna lu Salu, la dipasirundunan sia dipake umbaya’i madoi’ tu langgoso’na tau iato mai.
9Sia iatu apa naparalluipa tau iato, iamotu sapi laki mangura, domba laki sia anak domba la dipemalaran lako Puang Matua dao suruga, sia gandung, sia uai anggoro’ sia minna’ susi tu napokadanna mintu’ to minaa dio Yerusalem, kumua manassa la napaganna’ napadenan tau iato mai kiallo-kiallo,
10kumua anna pemalaranni tau iato mai tu pemala’ busarungngu’ lako Puang Matua dao suruga sia anna palakuanni kasalamaran tu datu sola mintu’ anakna muane.
11Sia kupa’parentanpa, kumua minda-minda ullendai te parenta iate, la dilampiran misa’ lentong lan mai banuanna, nadisula sia dipaku lako, nabannang iato nadipopendaun – lauan tu banuanna.
12Na Puang Matuamora tu umpaunnisung sanganNa inde to dio, ussabu’i tu mintu’ datu sia bangsa, tu ullendai te parenta iate sia unnangka’ limanna la ussanggangi te banuanNa Puang Matua dio Yerusalem. Akumo, Darius, tu umpatassu’i te parenta iate; manassa la dipalalo tongan.
Sundunmo tu banuanNa Puang Matua dibangun sia dirara. Pa’pasa bunga’na
13Napogau’mi Tatnai, to maraa lompo dio lili’ sambalinna lu Salu, sia Syetar-Boznai sia sangpangka’na, susi bang tu napa’parentan datu Darius lako tau iato mai.
14Iatu mintu’ pekaamberanna to Yahudi umpatarru’ marampa’ umbangunni tu Banua Kabusungan, tonna attunna ma’nubua’ tu nabi Hagai sia Zakharia, anakna Ido; anna sundunni umbangunni susi pepasanNa Kapenombanna to Israel sia susi parentana Koresh, Darius na Artahsasta, datu Persia.
15Napatarru’mi tu pengkarangan iato namalisan tonna allo ma’pentallun bulan Adar, iamo tonna taun ma’pennannan kaparentanna datu Darius.
16Nararami to Israel, iamotu mintu’ tominaa, to Lewi sia to senga’, tu mangkamo dipali’, tu banuanNa Puang Matua, situang kasendeanna.
17Iatonna rarai tau iato mai te banuanNa Puang Matua umpemalaran saratu’ sapi laki, duaratu’ domba laki sia a’pa’ratu’ anak domba, sia sangpulo duapa bembe’ laki la diposuru’ pengkalossoran lako mintu’ to Israel situru’ mintu’ suku to Israel.
18Nataa-taa dukami tu mintu’ to minaa lan boronganna sia to Lewi lan lu golonganna, la mengkarang mengkaola lako Puang Matua, tu unnisung dio Yerusalem, susitu disura’ lan sura’na Musa.
19Iatonna allo ma’pessangpulo a’pa’ bulan bunga’na, napogau’mi to mangka dipali’ tu Pa’pasa.
20Belanna mintu’ to minaa sia to Lewi usseroimo kalena butung to misa’ri, anna masero nasang. Natunuammi Pa’pasa tau iato mai tu mintu’ to mangkamo dipali’ sia mintu’ siulu’na, iamotu mai to minaa, sia iatu kalena.
21Nakandemi mintu’ to Israel, tu sulemo dio mai pa’paliran, susi dukato tu to umpatoyang kalena dio mai kamaruttakanna to kapere’ lan tondok iato lu lako tau iato mai la undaka’ PUANG, Kapenombanna to Israel.
22Napakaraya dukami tu pa’maruasan roti tang diragii parannu penaanna, belanna Napakarannu PUANG tu penaanna tau iato mai, sia Napatiakka’mi tu penaanna datu Asyur, anna masokan lako kalena, naurunganni untundui tu tau iato mai dio pengkarangan lako banuanNa Puang Matua, iamotu Kapenombanna to Israel.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel