Alkitab Mobile SABDA
[VER] : [TORAJA]     [PL]  [PB] 
 <<  Hakim-hakim 15 >> 

Simson sirari to Filistin

1Apa ba’tu pirang-pirang allo undinna to, tonna pegandungan, malemi tu Simson unto’longi bainena umbaa misa’ anak bembe’ laki, anna ma’kada, nakua: Palalona’ angku tama inan sitiro baineku, apa tae’ naeloranni ambe’na tama.

2Ma’kadami tu ambe’na baine nakua: Kusanga inang tae’ mupa’apai lenni; iamoto kubenni tu to pasolan tommu ma’rampanan kapa’. Tae’raka namandu melo tu adinna na iate? Iamo la mupobaine to, sondana.

3Ma’kadami tu Simson lako, nakua: Iate pissannate maserona’ dio mai kasalan, ke umpogau’na’ kadake lako to Filistin.

4Malemi tu Simson, anna tingkanni tu sindallung talluratu’, namane unnala bia’, napasipori sida’duai tu ikko’ sindallung, anna pannii sanguyun bia’ lan alla’na.

5Natutungimi tu bia’, anna ula’i tu mintu’ sindallung tama pa’lakna to Filistin tu nanii gandung matasak, naballai tu gandung la iatu mai dipatukunna la iatu mai te’dekna siapa sae lako pa’lak saitun.

6Ma’kadami tu to Filistin, nakua: Mindara umpogau’i te? Mebalimi tau, nakua: Simson, minintunna to Timna, belanna naala tu bainena Simson nabenni to pasolanna Simson tonna diparampo. Mangkato saemi to Filistin anna ballai tu baine iato sola ambe’na.

7Ma’kadami tu Simson lako tau iato mai, nakua: Iake mipogau’i susito, inang tae’ kula untorei, ke tae’pi kupembalaranni.

8Nale’toi tu bukunna, iamo misa’ kapapatean kapua. Malemi anna torro diong sapak buntu batu Etam.

9Ta’kala ke’de’mi tu to Filistin, anna ma’tenda lan Yehuda, sia titale’ sikandappi’ Lehi.

10Ma’kadami to Yehuda nakua: Ma’apari ammi saera la urrariikan? Mebalimi tu tau iato mai nakua: Iatu kasaeangki iamotu la umpungo Simson sia la kipogau’ lako susitu mangka nagaurangkanni.

11Mangkato malemi tu tallungsa’bu tau dio mai Yehuda rokko sapak buntu batu Etam, anna ma’kada lako Simson, nakua: Tae’raka muissanni kumua naparentakan to Filistin? Ma’apai mupasusikanni to? Apa mebali tu Simson lako tau iato mai nakua: Susitu apa nagauranna’, susi dukamoto tu kugauranni.

12Ma’kadami tu tau iato mai lako, nakua: Saemokan la umpungoko sia la ussorongko lako to Filistin. Apa ma’kada tu Simson lako, nakua: Palaokomi sumpa lako kaleku kumua tae’ mila ullaoina’.

13Mebalimi tu tau iato lako nakua: Tae’, sangadinna la kipungo bangroko, angki sorongko lako, apa tae’ sia kila umpateiko. Napungomi ulang ba’ru da’dua, anna solanni diong mai sapak buntu batu.

14Iatonna rampo Simson lako Lehi unnarrak-arrakmi tu to Filistin sae untammui; pakalan Narampoimi PenaanNa PUANG, anna mintu’ tu ulang lan lengo-lengona tenmoto batang rami nakande api sia iatu pepungona sisane’buan tilossok lan mai limanna.

15Naappa’mi tu buku parangka sadang keledai ba’ru bangpa, naului tu limanna, naalai, anna pateanni tu tau sangsa’bu.

16Ma’kadami tu Simson nakua: Misa’ buku parangka sadang keledai kupateanni tu kaponan keledai iato, misa’ buku parangka sadang keledai tu tau sangsa’bu.

17Iatonna mangkamo ma’kada susito, natibemi tu buku parangka sadang anna sangai tu inan iato Ramat-Lehi.

18Iatonna tarru’ ma’rangmo, metambami langngan PUANG, nakua: Mikamaseimo’ te kadirampanan kapua iate tu mangka kulopian, umbamo nakua totemo angku la mate ma’rangmo sia la tobangmo’ tama limanna to tang disunna’i.

19Napatibakkami Puang Matua tu to’ kalo’tok dio Lehi, natassu’ tu uai lan mai, nairu’mi Simson, namangingaran sule sia matoto’. Iamoto nasangai tu kalimbuang iato: Kalimbuangna To meongli’. Tu den dio Lehi sae lako allo iate.

20Naparentami Simson tu to Israel duangpulo taunna, tonna attunna to Filistin.



 <<  Hakim-hakim 15 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel