Simson dio Gaza
1Den pissan namale tu Simson lako Gaza, natiroi inde to dio tu misa’ baine kadake gau’, namale umpellambi’i.
2Iatonna dipokadammo to Gaza kumua: Saemo tu Simson, natalimbung tamami sia situ’turan bongi umpenniroi dio babangan kota; situ’turan bongi iato tae’ napatumba lenni sia nasanga kumua: Masiangpa melambi’ anta patei.
3Apa mamma’ bang tu Simson sae lako ma’tangngana bongi. Iatonna ma’tangngamo bongi millikmi, nasabakki tu ba’ba babangan kota iato sola ampang ba’ba da’dua, namane ullendokanni sola salli’na, anna passanni sia nabaa langngan botto buntu tu sitingoan Hebron.
Simson sola Delila
4Undinnato mamali’ bangmi tu Simson lako misa’ baine diong lombok Sorek, disanga Delila.
5Saemi tu mai arung kota to Filistin lako kalena, ma’kada nakua: Naranni, ammu issanni, apara napobannang tu kamatotoran kapuana sia umbara la kikua untaloi sia umpungoi la umpatundukki. Ianna dadi to, pantan la kibenko sangsa’bu saratu’ sikele’ salaka.
6Ma’kadami tu Delila lako Simson, nakua: Pokadanna’, apara napobannang tu kamatotoran kapuami susito sia apara la dipungoangkomi ammi ma’din dipatunduk.
7Mebalimi tu Simson nakua: Iake napungona’ tau tambuk barinni’na patuoan, tu ba’ru bangpa sia tae’pa namarangke, manassa la langga’na’ susito senga’.
8Nabammi arung kota to Filistin pitung lamba’ tambuk barinni’na patuoan, tu ba’ru bangpa sia tae’pa namarangke; anna pungoanni Simson.
9Iatu to ma’penniro lan bang bilik lanna lu. Metambami tu baine iato lako nakua: E Simson, nalaoimokomi to Filistin! Apa naka’tuan tu mintu’ tambuk barinni’na patuoan dipungoanni susito ungka’tuan rami nale’ke’i api. Diona duka te tae’ nakaissanan umba nanii tu kamatotoranna.
10Ma’kadami tu Delila lako Simson, nakua: Manassa mipakenana’ sia mibuttokkina’. Pokadan tonganna’ apara tu ma’din dipungoangkomi.
11Ma’kadami tu Simson lako, nakua: Iake diarra’i tonganna’ dipungo ulang ba’ru tu tae’ lenpa nadipake manassa la langga’na’ susito senga’.
12Naalami Delila tu ulang ba’ru, napungoanni tu Simson, sia metamba lako nakua: E Simson, nalaoimokomi to Filistin!; iatu to ma’penniro lan bang bilik lanna lu. Apa naka’tu Simson tu ulang iato natilendok lan mai lengo-lengona, susito bannang sanglamba’.
13Ma’kadami tu Delila lako Simson nakua: Sae lako totemo tontong bangna’ mipakena sia mibuttokki. Pokadanna’, apara tu ma’din dipungoangkomi. Ma’kadami lako baine iato nakua: Ianna dipakkanni pangrenden te pitu beluak tiampinni’ku anna dipasitannun.
14Napentangkirammi tu misa’ petangki’, namane metamba lako nakua: E Simson, nalaoimokomi to Filistin! Apa iatonna pana’dingmo, nasintakmi tu petangki’ pa’tannunan sia pangrendenan.
15Ma’kadami tu Delila lako nakua: Umba nakua tu kadammi kumua: Kukamaseiko, Anna iatu penaammi tae’ nalattu’ lako kaleku? Pentallunmo’ mipakena totemo natae’ mipokadanna’, apara napobannang tu kamatotoran kapuami susito.
16Iatonna paruku-rukumi ungkutanai sia napapussak, iamoto namasussa susito la bonno’.
17Napasomboan nasangmi tu mintu’ lanna penaanna nama’kada nakua: Tae’ bangpa nadiku’ku’i tu ulungku, belanna tempon lan mai pa’tambukanna indo’ku akumo nasirinNa Puang Matua. Iake diku’ku’i tu ulungku, manassa iatu kamatotorangku la soro’ dio mai kaleku, angku langga’ susito senga’.
18Iatonna issanmi Delila kumua napasomboan nasangmo tu mintu’ lanna penaanna, mesuami untambai tu mintu’ arung kota to Filistin, nama’kada lako nakua: Totemo te maimokomi, belanna napasomboan nasangmo’ tu mintu’ lanna penaanna. Saemi tu mai arung kota to Filistin umbaai tu doi’.
19Napamamma’mi Delila tu Simson diong to’ guntu’na, natambai tu misa’ tau anna suai ungku’ku’i tu pitu beluak tiampinni’na. Susimoto nanii umpatundukki, belanna iatu kamatotoranna soro’mo dio mai kalena.
20Ma’kadami tu Delila lako nakua: E Simson, nalaoimokomi to Filistin! Pana’dingmi sia ma’tangnga’ nakua: Susito lendu’na la tassu’na’ sia ussintakna’ kaleku; apa tae’pa natandai kumua soro’mo tu PUANG dio mai kalena.
21Natingkanmi to Filistin, nasu’be’i patomalii tu matanna, anna solanni lako Gaza, napungoi da’dua rante tambaga, sia diparuku unggirikki tu batu pangrissoan lan pa’tarungkuan.
22Apa mangkanna sia diku’ku’i tu ulunna, ta’pa tuomi sule tu beluakna.
Kamateanna Simson
23Attu iato sirampunmi tu mintu’ arung kota to Filistin la umpennoloan misa’ pemala’ kapua lako Dagon, kapenombanna sia la ma’marua’-rua’; ma’kadami nakua: Kapenombanta ussorongi te Simson, ualinta, tama limanta.
24Iatonna tiromi to buda tu Simson, napudi-pudimi tu deatanna, nametamba nakua: Nasorongmo kapenombanta tu ualinta tama limanta tu ussanggang tondokta sia iatu umpatei taunta buda.
25Iatonna marassan parannu-rannu tu tau iato, ma’kadami nakua: Tambai mai tu Simson, anna popetaaki’. Mesuami unnalai tu Simson lan mai pa’tarungkuan, anna popetaai tu tau iato mai; napake’de’mi lan tangnga lentong.
26Ma’kadami Simson lako tu pia urrendenni, nakua: Rampananna’ na aku bangmora ussasakki tu lentong untu’tunni te banua, angku nii sissare.
27Iatu banua iato ponno muane sia baine; mintu’ arung kota to Filistin dio ren, sia dao soto banua iato agi-agi tallungsa’bu muane sola baine, umpengkitai tu Simson maningo.
28Attu iato metambami tu Simson lako PUANG sia ma’kada nakua: O Puangku PUANG, kilalaina’, amMi pamatoto’na’ te pissan, o Puang Matua, angku pabala’i te pissan tu gau’na to Filistin diona te matangku patomali.
29Natoemi Simson tu lentong tangnga da’dua tu untu’tun banua iato, natakungkungi lima kananna tu lentong misa’ na lima kairinna tu senga’na.
30Ma’kadami tu Simson nakua: Da’ito angku mate sola te mai to Filistin. Malimukku tonganmi undudangi tu banua iato, nasongkai tu mintu’ arung dio lu kota sia mintu’ to buda lan. Iatu tau mate tu napatei tonna mateanni mandu buda na iatu to napatei tonna tuopa.
31Saemi tu mintu’ siulu’na sia mintu’ sangdadianna unnalai tu batang rabukna nabaai anna lamunni dio kasiallaranna Zora na Estaol, lan lamunanna Manoah, ambe’na. Duangpulo taunna nanii umparentai tu to Israel.
<< Hakim-hakim 16 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel