Kaditambaianna Gideon dadi to parengnge’
1Apa napogau’mo to Israel tu apa kadake dio pentiroNa PUANG; iamoto Nasorongi PUANG tama limanna to Midian pitung taun.
2Napandasa tongan to Midian tu to Israel. Belanna mataku’ lako to Midian, iamoto nagaragai tu pembunian dao lu buntu, lan lo’ko’ sia lan tambakuku.
3Iake mangambo’oi tu to Israel, saeomi tu to Midian sia to Amalek sia iatu mai suku dio mai rampe matallo ullaoi.
4Napabendanmi tu tendana lan lili’na tau iato mai, anna sanggangi tu bura padangna sae lako tu naninna tau rampo lako Gaza, tae’ natampeanni to Israel, tu la nakandena, tae’ duka domba, sapi sia keledai.
5Ke’de’mi tu tau iato mai umbaa patuoanna sia tendana, saemo susi batik budanna; tang dikemba’ dibilang la taunna la untana, sae ussanggangi padang,
6naurungan makario-rio tongan tu to Israel napobua’ to Midian. Attu iato metambami tu to Israel langngan PUANG.
7Iatonna metamba tu to Israel langngan PUANG belanna napakario-rio to Midian,
8Nasuami PUANG tu misa’ nabi male lako to Israel umpokadai, kumua: Inde sia tu kadanNa PUANG, Kapenombanna to Israel, nakua: Kusolammokomi lan mai Mesir sia Kutassu’imokomi lan mai inan minii dipokaunan.
9Sia Kurampanammokomi lan mai kuasanna to Mesir sia lan mai kuasanna to umpakario-riokomi, ondongpi Kurambaimo tu tau iato mai dio mai tingayomi sia iatu padangna Kupa’kamaseammo lako kalemi.
10Sia ma’kadaMo’ lako kalemi, Kukua: Akumo tu PUANG, Kapenombammi; da mipenombai deatanna to Amori, tu minii ma’tondok. Apa tang miperangii tu kadangKu.
11Undinnato saemi Malaeka’Na PUANG, anna unno’ko’ diong garonto’ tarpin dio Ofra, apanna Yoas, to Abiezer; na iatu Gideon, anakna muane, marassan ussambak-sambakki gandung lan to’ pa’parran anggoro’, la umpembunian to Midian.
12Attu iato ombo’mi tu Malaeka’Na PUANG anna ma’kada lako, nakua: Narondongmoko PUANG, e pa’barani lalong.
13Apa ma’kada tu Gideon lako nakua: O puangku, iake Narondongkan PUANG, ma’apai anna rampoimokan te mintu’na te? Umbamira tu tanda mangnga tu nauleleangkan nene’ to doloki, tu nakua: Tang PUANG raka ussolangkan lan mai Mesir? Apa totemo Nasualemokan PUANG sia Nasorongmokan tama limanna to Midian.
14Attu iato messailemi tu PUANG Nama’kada lako, Nakua: Ke’de’moko situang te kamatotorammu, ammu rampananni tu to Israel lan mai limanna to Midian. Tangiaraka Aku te ussuako?
15Ma’kadami tu Gideon lako, nakua: O Puang, apara la kupake la urrampananni tu to Israel? Manassa iatu pa’rapuangku iamo bitti’na lan suku Manasye na iatu aku te anak tampak dio to padadiangku.
16Ma’kadami PUANG lako Nakua: Manassa Aku urrondongko, iamoto la mutalo tu mintu’ to Midian susito misa’ri.
17Ma’kadami lako, nakua: Iake naala siana’ penaamMi, patiroammo’ misa’ tanda, kumua Puangmo tu ussipa’kadanna’.
18Dapa Mimale indete, ke tae’pi kusule unnalai tu apa la kupennoloan lako Kalemi. Ma’kadami Puang, Nakua: La torro siaNa’ sae lako sulemu.
19Malemi tama tu Gideon, napasakka’i tu misa’ anak bembe’ laki sia roti tang diragii sangepa ta’pung; napatamai misa’ bakku’ tu duku’ anna iatu uainna naparokko loyang, nabaanni lako diong to’ garonto’ tarpin, napalennaranni dio.
20Ma’kadami tu Malaeka’Na Puang Matua lako, nakua: Alai te duku’ sia iate roti tang diragii, ammu padaoi te buntu batu iate sia bolloanni tu uainna lako. Napogau’mi susito.
21Attu iato Naangka’mi Malaeka’Na PUANG tu tekken, narumbumi tampak tekken tu duku’ sia roti tang diragii; natassu’ tu api lan mai buntu batu, napura ungkandei tu duku’ sola roti tang diragii. Mangkato ta’demi tu Malaeka’Na PUANG natiro.
22Attu iato nakanassaimo Gideon, kumua iamo Malaeka’Na PUANG, ma’kadami nakua: Upu’ alloku, o Puangku PUANG! belanna mangkamo’ sitiro lindo Malaeka’Na PUANG.
23Apa ma’kada tu PUANG lako, Nakua: Makarimmanko, da mumataku’ tae’ mula mate.
24Inde to dio nanii Gideon umpabendananni PUANG tu misa’ inan pemalaran, anna sangai: PUANGmo tu oto’na kasalamaran. Bendanpa tu inan pemalaran iato sae lako allo iate dio Ofra, tondokna to Abiezer.
25Bongi iato ma’kadami tu PUANG lako, Nakua: Alako misa’ sapi laki dio mai sapinna ambe’mu, iamotu sapi laki ma’penduanna, tu pitung taunnamo, ammu rondonni tu inan pemalaran Baal, tu naampui ambe’mu sia lellengi tu lentong kayu dipodeata, tu bendan dio lu.
26Mangkato pabendanko misa’ inan pemalaran lako PUANG, Kapenombammu, dao buntu ditambakuku iate; pasilolonganni tu inan iato, sia alai tu sapi laki ma’penduanna, ammu pemalaranni dadi pemala’ ditunu pu’pu’ umpokayu tutungan lentong dipodeatanna, tu la mulelleng.
27Pakalan natambaimi Gideon tu solana sangpulo, anna pogau’i susitu kadanNa PUANG lako kalena; apa belanna mataku’ lako sangdadianna sia lako pa’tondokan iato la umpogau’ alloi, iamoto napogau’ bongii.
28Iatonna tibangka’ masiang, millikmi tu mintu’ pa’tondokan, natiroi tu inan pemalaranna Baal mangkamo dirondon, sia iatu lentong dipodeatanna, tu bendan dio lu, mangkamo dilelleng sia iatu sapi laki ma’penduan mangkamo dipemalaran dao inan pemalaran, tu mane mangka dibangun.
29Sipa’kada-kadami tu tau iato mai, nakua: Mindara mangka umpogau’i te? Iatonna paressami sia napekutanan, nakuami tau: Iatu umpogau’i te, iamotu Gideon, anakna muane Yoas.
30Ma’kadami tu pa’tondokan lako Yoas, nakua: Solanni lako salian tu anakmu muane, manassa la dipatei, belanna mangkamo urrondon inan pemalaranna Baal sia ullelleng lentong dipodeatanna, tu bendan dio.
31Apa nakua tu Yoas lako tu mintu’ to bendan sikandappi’ dio: La misanda tonganniraka tu Baal? Ba’tu la mitunduiraka? Minda-minda ussanda tonganni, la dipatei te melambi’ iate. Iake tongannai ia misa’ deata, da’ito natonganan kalenai tu kalena, belanna narondonnimo tau tu inan pemalaranna.
32Allo iato iatu Gideon nasangaimi tau Yerubaal, belanna ma’kada tu tau nakua: Da’ito na Baalmora nasikara-karan, belanna narondonnimo tu inan pemalaranna.
33Iatu mintu’ to Midian sia to Amalek sia suku dio mai rampe matallo saemo sirampun, anna ullamban salu lian sia ma’tenda diong padang marantena Yizreel.
34Attu iato Naponnoimi PenaanNa PUANG tu Gideon: anna pannonii tu napiri tanduk sia natambai tu to Abiezer undi urrundu’i.
35Sia nasua duka tu to disua lako mintu’ to Manasye, naditambai duka undi urrundu’i. Sia nasua duka tu to disua lako lili’na Asyer, Zebulon sia Naftali, nake’de’ nasang tu tau iato mai sae umpessitammui.
36Ma’kadami Gideon lako Puang Matua nakua: Iake la Mirampananni tu to Israel tete dio limangku, susitu mangka Mipokada –,
37manassa la kuballa’ tu misa’ balulang domba dio to’ panglulluran gandung. Iake ia manna tu balulang domba nanii damo’ dio, na iatu padang marangke nasang, kuissan tonganmoto kumua la Mirampanan tu to Israel tete dio limangku, susitu mangka Mipokada.
38Dadimi susito; belanna melambi’ pole’to, millik kale’mi, anna pula’i tu balulang, sia naparra tu balulang iato natassu’ tu damo’, ponno sangpindan.
39Ma’kadami Gideon lako Puang Matua, nakua: Da nare’dek ara’Mi lako kaleku: Ke ma’dinni kuma’kadapa te pissan; da’ito angku tobapi pissan te balulang iate; da’ito namarangke bang tu balulang, apa iatu mintu’ padang iato la damoran.
40Napogau’mi Puang Matua susito tonna bongi ia dukato, belanna ia manna tu balulang marangke, apa iatu mintu’ padang damoran nasang.
<< Hakim-hakim 6 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel