Alkitab Mobile SABDA
[VER] : [TORAJA]     [PL]  [PB] 
 <<  Hosea 11 >> 

KamamaseanNa PUANG sia ukunganNa lako bangsa iato

1Iatonna piapa tu Israel, Kupakaboro’ sia Kutambai tu anakku dio mai Mesir.

2Saditamba-tambainna tu tau iato mai, sauntoyang-toyanganora kalena; memala’ lako mintu’ Baal sia mantunu dupa lako mintu’ rapang-rapang dipodeata dipa’.

3Aku unnada’i lumingka tu Efraim, sia Kukayun, apa tae’ naakui, kumua Aku umpamalekei.

4Ulang tau Kurendenanni tu tau iato mai sia Kupori pepori kamamasean; iatu penggaurangKu lako kalena butung to manglendokan ayoka sia kambu dio mai popona. TukkuNa’ untiroi sia Kuben kande.

5Tae’raka pa’tangngaranna sule lako Mesir? Manassa Asyur la undatui, belanna manoka mengkatoba’ tu tau iato mai.

6Iatu pa’dang la unta’pai tu mai kotana sia la ussanggangi tu salli’ babangan kotana sia la naimbakan tiku lao, natumang pa’tangngaranna.

Iatu kamamasean undaoanni kama’paolaian salu

7Manassa iatu taungKu tontong bang memboko’ dio mai Kaleku. Moi anna meongli’ langngan PUANG, inang tae’ Nala unnendekanni.

8Umba la Kukua ussa’biangangko, e Efraim, umba la Kukua ussorongko, e Israel? Umba la Kukua ussa’biangangko susi Adma, sia la umpapadako Zeboim? Tibalik senga’omo tu penaangKu, anna tiakka’ tongan tu kamamaseangKu.

9Tae’ angKu la umpalanda’i tu kasengkean dukkungKu, tae’ra angKu tarru’ la ussanggangi tu Efraim. Belanna Akumo tu Puang Matua tangia tolino, maindanNa’ lan lu tangngami, sia tae’ angKu la sae situang kasengkean dukku-dukku.

10Iatu tau iato mai la undi urrundu’ PUANG, la umburrung-burrung susi singa. Iake umburrungI, iatu mintu’ pia muane la sae dio mai rampe matampu’ sipa’parondoan.

11La sae sipa’parondoan susito manuk-manuk dio mai Mesir sia susito bu’ku’ dio mai tondok Asyur, angKu patorroi lan banuanna, kadanNa PUANG.

Kasalanna Efraim sola Yakub, nene’ to dolona

12(12-1) Nalilingi bangMo’ Efraim ma’kada mo’rang sia bati’na Israel ma’pakena bang – na iatu Yehuda tontong bang umbali-bali Puang Matua sia To tarru’ maindan, tu maruru’ bang.



 <<  Hosea 11 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel