Alkitab Mobile SABDA
[VER] : [TORAJA]     [PL]  [PB] 
 <<  Kejadian 24 >> 

Ishak didakaran baine la nasangkalammaran

1Iatu Abraham matuamo sia masaimo tau, Naparongko’mo PUANG lan mintu’na.

2Ma’kadami tu Abraham lako ruranan matuanna lan banuanna sia umpoissan mintu’ apanna nakua: Padiongi to’ garonto’ pupungku tu limammu.

3Angku popenggatako ussa’bu’ PUANG Kapenombanna langi’ sola lino, kumua da mualanni anakku la napobaine tu misa’ baine dio mintu’ anak to Kanaan, tu kunii duka torro.

4Sangadinna la lu lakoko tondokku, lako sangdadiangku la unnalanni baine tu anakku Ishak.

5Nakuami tu rurananna lako: Iake manokai tu baine undi urrundu’na’ sae indete tondok iate, ma’dinraka kusolan sule tu anakmi lako tondok mangka mitampe?

6Ma’kadami Abraham nakua: Kanandai meloi, da musolan sulei lako tu anakku.

7Iatu PUANG, Kapenomban dao suruga, tu mangka ussuana’ sun lan mai banuanna ambe’ku sia lan mai tondokna sangdadiangku sia mangka ma’kada lako kaleku Nabassei kada Nakua: La Kukamasean bati’mu te padang iate, Ia dukamo la ussua malaeka’Na dolo dio to’ mupatunna, ammu alanni baine tu anakku dio mai.

8Apa iake manokai undi, masero pindanko dio mai te penggatamu lako kaleku; sangapaoi anna da musolanni lako tu anakku!

9Napadiongmi to’ garonto’ pupunna Abraham tu limanna tinde rurananna, anna menggata tu iannato.

10Naalami tinde kaunan tu untana puangna sangpulo, namale; iatu mai iananna puangna lan pala’na; ke’de’mi male lako Mesopotamia; tondokna Nahor.

11Napanno’ko’mi tu untana dio salian tondok, sikandappi’ misa’ bubun tonna makaroen sae, tonna attunna sun nasang tu baine meuai.

12Ma’kadami nakua: O PUANG, Kapenombanna puangku Abraham, pamaupa’na’ te allo iate sia tiroanni kameloan tu puangku Abraham.

13Tiromi, la bendan bangmo’ indete to’ bubun, na la sun nasangmo tu anak dara lan te kota meuai.

14Melo ke susii te dako’, iatu anak dara kukuan lako: Patorroi tu bussomu, angku iru’pi tu uai, namebali: Iru’mi sia ia duka tu untami la kupairu’ duka, iamora to tu Napasiuparanni Puang tu taumMi Ishak, na iannato kunii unnissanni kumua Natiroan kameloan Puang tu puangku!

15Dadimi susito tonna tang upu’pa ma’kada-kada, sun tonganmi tu Ribka ussompo busso, iamo anakna Betuel, dadi dio Milka, bainena Nahor, tu sangmanena Abraham.

16Iatu anak dara iato, iamo misa’ anak dara me’lok tongan pantarisanna, tae’pa natandai muane, malemi rokko bubun unnissii bussona, nakendek sule.

17Ma’dondomi lako tu ruranan iato nama’kada nakua: Benna’ dikka’ kuiru’i sidi’ tu uai lan mai bussomu.

18Nakuami: Iru’mi, puang! Ta’pa napatorromi tu bussona natoei, anna pairu’i.

19Iatonna mangka umbenni nairu’, nakuami: E kualan dukai uai tu mintu’ untami anna pemosoi nairu’.

20Nasarra’imi natua’ rokko pa’pairusan tu uai lan bussona, nama’dondo pole lako bubun untimba uai, anna alanni uai tu mintu’ untana.

21Kappa bangmi tinde tau untiroi lako, la morai unnissanni kumua Napamaupa’raka PUANG tu kalingkanna, tae’raka.

22Nasusito, iatonna mangka nasangmo unniru’ uai tu mintu’ unta, naalami tau iato tu baba’ bulaan sangbangunan, sangtangnga sikele’ timbangna, na sangbangunan komba bulaan, sangpulo sikele’ timbangna, napaluangi tu limanna patomali.

23Nakuami: Mindaroko anak? Pokadanna’. Den siaraka inan dio banuanna ambe’mu, tu ma’din kinii ma’bongi?

24Nakuami tu anak dara lako: Anaknana’ Betuel, anakna Milka, tu napadadian Nahor Milka.

25Sia nakua siapa tu anak dara lako: Den sia dalame sia silasa sia tu kande unta, sia den sia inan dinii ma’bongi.

26Tukkumi tinde tau, umpenombai PUANG.

27Nakua: Mintu’na kadipudian lu langngan nasang PUANG, Kapenombanna puangku Abraham, belanna tang Napamoro’ tu kamasokananNa sia kamarurusanNa lako puangku, Narenden marampa’mo’ PUANG lako to’ banuanna sangdadianna puangku!

28Ma’dondomi te anak dara male umpokada nasangi te ianna te lako to’ banuanna indo’na.

29Den anak muanena Ribka, disanga Laban; ma’dondomi tu Laban lao untammui tu tau iato lako to’ bubun.

30Belanna iatonna tiromi tu baba’ na komba lan limanna anak daranna sia narangimo tu mintu’ kadanna Ribka, anak daranna nakua: Susito tu kadanna tau iato, saemi tu Laban umpessitammui tu tau iato, tu bendan bangpa dio sa’de untana sikandappi’ bubun.

31Nakuami Laban: Tamakomi mai, to Napamasakke PUANG. Ma’apari mibendan bangra iti’ salian, namangkamo kupasakka’ tu inan sia inan la nanii tu mintu’ unta!

32Tamami banua tu tau iato, anna bukai tau tu lapik untana, nabenni dalame sia kande sia nabaan uai la nabasean lentekna sola tu mai to nasolan.

33Mangkato napalennarammi kande tau, apa nakua: Tae’pa kumorai kumande, ke tae’pi anna pura nasang kupokada tu kadangku dolo. Nakuami tu Laban: Pokadami.

34Nakuami: Aku te ruranannana’ Abraham.

35Napasundun rongko’ tonganmo PUANG tu puangku, naurunganni tarompo’mo, naben PUANG ba’tu sangapa budanna domba, bembe’ sia sapi, salaka, bulaan, kaunan muane baine, unta sia keledai.

36Na Sara bainena puangku, undadian misa’ pia muane tonna matuamo, anna ben nasangi to anakna tu mintu’ barang apanna.

37Nasuamo’ puangku menggata nakua: Da mualanni baine tu anakku dio mai anak dara to Kanaan, te tondok kunii torro.

38Sangadinna laoko lako to’ banuanna ambe’ku sia lako to’ pa’rapuangku, ammu dakaranni baine tu anakku dio.

39Mebalimo’ lako puangku kukua: Umbai anna tae’ namorai tu baine iato undi urrundu’na’.

40Nakuami lako kaleku: Iato PUANG kupengkaolaimo, tu la ussua malaeka’Na la musolan sia Ia duka la umpamaupa’ kalingkammu, ammu alanni baine tu anakku dio mai to’ pa’rapuangku sia dio mai banuanna ambe’ku.

41Iapi ammu masero pindan dio mai te penggatamu lako kaleku, ke rampomoko lako pa’rapuangku anna tae’ nabenko, manassa masero pindanmoko dio mai te penggatamu lako kaleku.

42Nasusi to, iate allo saemo’ lako to to’ bubun, angku massambayang kukua: O PUANG, o Kapenombanna puangku Abraham, pamaupa’i tu lalan kuolainna.

43Tiromi, bendanna’ indete to’ bubun, melo ke susii te: umbanna tu anak dara sun la meuai, angku ma’kada lako: Benna’ kuiru’i sidi’ tu uai lan mai bussomu,

44nakuami: Iru’mi sia ia duka tu mintu’ untami la kualan uai, iamoto tu baine Napasiuparanni PUANG tu anakna puangku.

45Tae’pa angku upu’ ma’kada lan penaangku, pakalan sunmi tu Ribka ussompo bussona namale rokko bubun unnala uai. Ma’kadamo’ lako kukua: Benna’ dikka’ angku iru’i.

46Madomi’mi nalendokan dao mai palempengna anna kuai: Iru’mi puang, sia la kupairu’ duka tu mintu’ untami. Mangkato kuiru’mi na iatu mintu’ unta napairu’.

47Kukutanaimi kukua: Mindaroko anak? Mebalimi nakua: Anaknana’ Betuel, anak dadianna Nahor, tu napadadianni Milka. Kupapasangimi baba’ lako, sia kupaluangi komba tu limanna patomali.

48Tukkumo’ umpenombai PUANG, angku pudii tu PUANG, iamo Kapenombanna puangku Abraham, tu mangka urrendenna’ lako lalan tongan, la unnalanni anakna sangdadianna tu anakna puangku.

49Na totemo, ke mitiroanni kameloan sia maruru’komi lako puangku, la mipokadanna’, angku issanni, kululako kanan, ba’tu lakoraka kairi.

50Mangkato mebalimi tu Laban sola Betuel nakua: Iate ianna te, bu’tu dio Ia mai PUANG, tae’ nama’din la kikua lako kalemi kumua melo ba’tu kadake.

51Iti’ sia tu Ribka, tambaimi misolanni, da’ito anna pobainei anakna puangmi susitu kadanNa PUANG.

52Iatonna rangimi rurananna Abraham tu mintu’ kadanna tau iato mai, tukkumi rapa’ rokko padang umpenombai PUANG.

53Napatassu’mi tu ba’tu sangapa pareanan salaka sia bulaan sia ba’tu sangapa pakean, anna benni Ribka, sia ba’tu sangapa dukapa pareanan ballo nabenni tu anak muanena sia indo’na.

54Kumandemi sia mangiru’mi sola solana nama’bongi dio. Mebongngi’mi millik, na ma’kada nakua: La messimanmo’ la sule lako puangku.

55Nakuami tu anak muanena sola indo’na: Da’ito angki torropa ba’tu sangapa sola te anak dara, susito, sangpulo allona, mimane male.

56Nakuami mebali: Da mitang unneloranna’ na Napamaupa’mo PUANG tu kalingkangku; da’ito kimalemo sule lako puangku.

57Nakuami tu mai tau iato: Da’ito kitambai titi’ anak dara, angki pepudukki.

58Natambaimi tu Ribka, anna kutanai lako nakua: Morairokoka la male sola tinde tau? Mebalimi nakua: La moraimo’ male.

59Naelorammi tu Ribka, anak daranna male sola to massarakna sia iatu rurananna Abraham na mintu’ solana.

60Napassakkemi tu Ribka nakua lako: E anak darangki, podo ammu membati’ massa’bu-sa’bu lampana, sia la nalapa’ nasang bati’mu tu babanganna ualinna!

61Ke’de’mi tu Ribka sola tu mai baine baananna, namale urrundu’i tu tau iato ussakei unta; nasolammi male tu Ribka.

62Ia toda tu Ishak sae lu dio mai bubun Lahai-Roi, belanna torro dio padang lo’na lu.

63Sunmi tu Ishak sumalong dio lu padang ma’tangnga’-tangnga’ tonna solo’ allo, naadonganni tu ulunna, pakalan anna tiroi tu ba’tu pira-pira unta sae.

64Naadonganni Ribka tu ulunna; na iatonna ta’paimi matanna tu Ishak, mengkalaomi dao mai untana.

65Nakuami tu Ribka lako rurananna Abraham: Mindara titi’ muane male dio padang sae untiroki’? Mebalimi nakua: Iamo puangku to. Naalami tu lullungna anna ma’lullung.

66Naulelean nasangmi tinde ruranan lako Ishak tu mintu’ apa mangka napogau’.

67Nasolammi Ishak tu Ribka tama tendana Sara, indo’na, napobainemi sia napakaboro’. Susimo kadipakatananna Ishak to tonna matemo tu indo’na.



 <<  Kejadian 24 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel