1Iatonna tiromi Rahel kumua tae’ anna padadianni tau tu Yakub, mangimburumi lako kakanna, anna ma’kada lako Yakub, nakua: Benna’ aku anak; iake tae’i, matena’ aku te!
2Re’dekmi tu ara’na Yakub lako Rahel, nama’kada nakua: Ussondara’ka Puang Matua, tu tang unnelorangko ma’tambuk?
3Nakuami tu Rahel: Tiroi, inde sia tu pa’dua’ku Bilha, sangampa’ko nakianak diong to’ riangku, anna dio mai kalena nanii bu’tu bati’ku.
4Nabenmi tu Bilha, pa’dua’na napobaine anna sangampa’.
5Ma’tambukmi tu Bilha, anna padadianni misa’ pia muane tu Yakub.
6Nakuami tu Rahel: Na sandatongannimo’ Puang Matua tu diona kaleku sia Natanding talingamo tu palakungku, Nakamaseina’ pia muane misa’, iamoto anna sangai Dan tu pia iato.
7Iatu Bilha, pa’dua’na Rahel ma’tambuk poleomi, anna padadianni misa’ pia muane ma’penduanna tu Yakub.
8Ma’kada tu Rahel nakua: Sieana’ kakangku lan kasiean maparrang, angku taloi. Nasangaimi Naftali tu pia iato.
9Iatonna tiromi Lea kumua radanmo ma’dadian tau, naalami tu Zilpa, pa’dua’na, nabenni Yakub napobainei.
10Napadadiammi Zilpa, pa’dua’na Lea misa’ pia muane tu Yakub.
11Nakuami tu Lea: Rongko’ tongan. Nasangaimi Gad tu pia iato.
12Undinna napadadiammi Zilpa, pa’dua’na Lea pia muane ma’penduanna tu Yakub.
13Ma’kadami tu Lea nakua: Maupa’na’, belanna mintu’ baine la ussangana’, rongko’. Nasangaimi Asyer tu pia iato.
14Iatonna peparean sunmi tu Ruben male, nakabu’tuimi tu bua mandragora, nabaai lako Lea indo’na. Nakuami tu Rahel lako Lea: Benna’ tu bua mandragorana anakmu.
15Mebalimi tu Lea nakua lako: Tae’paraka nasilasa tu mualaina’ muaneku? La morai siaporokoka unnala bua mandragorana anakku? Nakuami tu Rahel: Iamoto anna la sangamparangko te bongi, sonda bua mandragorana anakmu.
16Iatonna saemo tu Yakub dio mai padang tonna makaroen, sunmi tu Lea umpessitammui, anna ma’kada nakua: Tae’ nama’din tang torroko, belanna kupassaroi tongan-tonganko bua mandragorana anakku! Sangampa’mi tonna bongi.
17Natanding talingami Puang Matua tu palakunna Lea, naurunganni ma’tambuk anna padadianni pia muane ma’pellimanna tu Yakub.
18Nakuami tu Lea: Nabenmo’ Puang Matua tu saroku, belanna kubenmo muaneku tu pa’dua’ku. Nasangaimi Isakhar tu pia iato.
19Ma’tambuk polemi tu Lea, anna padadianni pia muane ma’pennannanna tu Yakub.
20Nakuami tu Lea: Naserongina’ Puang Matua misa’ pamengan mala’bi’; totemo la nakari’piina’ muaneku, belanna kupadadiammo pia muane annan. Nasangaimi Zebulon tu pia iato.
21Undinna undadiammi misa’ pia baine, tu nasangai Dina.
22Nakilalai dukami Puang Matua tu Rahel sia Natanding talinga tu palakunna anNa bungka’i tu inan taunna.
23Ma’tambukmi, anna dadianni tu misa’ muane, nama’kada nakua: Nasamboimo Puang Matua tu siri’ku.
24Nasangaimi Yusuf tu pia, nama’kada nakua: AnNa rangngannimira Puang Matua misa’ pia muane.
Kerangngan tu dombana sia bembe’na Yakub
25Denmi pissan tonna mangka undadian Yusuf tu Rahel, nama’kada tu Yakub lako Laban nakua: Eloranna’ male, angku sule lako tondokku sia lako padangku.
26Benna’ tu baineku sia mintu’ anakku tu kupa’rurananni lako kalemi, angku male, belanna miissan sia tu ra’ta’ku tu mangka kupogau’ mati’.
27Mebalimi tu Laban nakua: Melo ke mukamaseina’, belanna sombomo lako kaleku, kumua tete diori kalemu anNa parongko’na’ PUANG.
28Sia nakuapa tu Laban: Pokadanna’ saromu, tu sipatu kubaya’, angku benko.
29Mebalimi tu Yakub lako nakua: Miissan tumba tu ra’ta’ku mati’ sia tumbai tu mintu’ patuoammi tu kukampainna.
30Belanna sidi’ri tongku tang saepa, namemba’ka’ kalle-kalleammo, Naparongko’komi PUANG tu temponna aku umpoissanni; na totemo piran polepa angku la umposara’ kalena tananan dapo’ku?
31Nakuami tu Laban: Apara tu la kubenko? Mebali Yakub: Moi misa’ apa da’omo mibenna’; ke la mia’ga susimora’ te, kulaaimira sia kukampai polemira tu dombami sia bembe’mi.
32Iate allo la kulelei mintu’ dombami sia bembe’mi, angku sarakki tu domba sambo ra’tuk sia saleppang. Na iatu mararangna mintu’ domba sia saleppangna sia sambo ra’tukna tu mintu’na bembe’ iamo saroku.
33Na kamalamburangku la ussanda tongannina’ undinna, ke saekomi untiro saroku: na iake denni tang sambo ra’tuk ba’tu tang saleppang tu mintu’na bembe’ sia tang mararang tu mintu’na domba, iamo disanga bokoku to.
34Mebalimi tu Laban: Inaammu bang susitu kadammu.
35Iato allo iato, nasarakkimi tu mintu’ bembe’ laki balo sia saleppang sia mintu’ bembe’ birang sambo ra’tuk, sia saleppang sia iatu mintu’ ma’balo mabusanna sia mintu’ mararangna tu mintu’na domba, anna sorongi lako anakna.
36Napamambelai Laban tu mintu’nato lingkan tallung allo dio mai to’ naninna Yakub, na iatu senga’na dombana na bembe’na Laban nalaai Yakub.
37Naalami Yakub ba’tu pira-pira tangke mamatanna kayu awara’ sia kayu badan sia kayu kastala’ anna sosoi anna passura’-sura’ napayan tu mabusanna to dio tangke kayu iato.
38Iatu tangke kayu mangka nasosoi, naparokko pambo’bok sia rokko pa’pairusan, tu nanii domba sia bembe’ sae unniru’ uai, dio tingayona; iake saei unniru’ uai tu domba sia bembe’, sirundu’.
39Iake mangkai sirundu’ tu domba sia bembe’ sikandappi’ tangke kayu iato, anna kianak, den tu balo, den tu sambo ra’tuk, den tu saleppang.
40Nasarakkimi Yakub tu mintu’ anak domba iato, anna popentingoi tu mintu’ anak domba sia bembe’ lako ma’balona sia mararangna lan tu mintu’ dombana sia bembe’na Laban; susimoto nanii umpabu’tu ba’tu sangngapa domba sia bembe’ ma’baanan tu Yakub, tu tae’ anna pasisolai dombana sia bembe’na Laban.
41Susimoto, ke sirundu’oi tu domba sia bembe’ malappukna, naparokkomi pambo’bok Yakub tu tangke kayu dio tingayona domba sola bembe’, anna sirundu’ sikandappi’ tangke kayu iato.
42Apa iatu mintu’ domba sia bembe’ tang malappukna tae’ naparokkoi; susimoto, iatu mintu’ domba sia bembe’ tang malapu’ napotaa Laban, na iatu malappukna napotaa Yakub.
43Mandumi sakendek-kendekna tu kasugiranna Yakub, naurunganni unnampui ba’tu sangapa budanna domba sia bembe’ sia kaunan muane-baine sia unta na keledai.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel