1Ma’kadami tu PUANG lako Musa, Nakua:
2Pokadanni to Israel anna tibalik anna ma’tenda dio tingayona Pi-Hahirot, dio kasiallaranna Migdol na tasik; ammi ma’tenda sipatu Baal-Zefon dio biring tasik.
3Attu iato la ma’kada tu Firaun diona tu to Israel nakua: Pusamo tu tau iato mai sia nakapu’mo padang pangallaran.
4Aku la umpamakarra’i tu penaanna Firaun anna ula’i tu tau iato mai, anna attu iato la umpatarompo’Na’ Kaleku lako Firaun sia lako mintu’ surodadunna, naurunganni naissan mintu’ to Mesir, kumua Akumo tu PUANG. Napogau’mi to Israel susito.
5Iatonna parampomi tau lako datu Mesir, kumua mallaimo tu bangsa iato, membalimi tu penaanna Firaun sia penaanna mintu’ to mase’ponna lako to Israel, anna ma’kada nakua: Ma’apai anta ma’gau’ susito, anta rampananni tu to Israel, naurungan tae’mo anta pokaunanni?
6Naparandanmi tu keretana, anna solanni tu mai taunna male.
7Sia nabaapa tu annan ratu’ kareta pa’tonno’ sia mintu’ tu kareta senga’ dio tondok Mesir, iatu mintu’nato ganna’ nasang surodadunna.
8Belanna Napamakarra’ PUANG tu penaanna Firaun, datu Mesir, naurungan unnula’i tu to Israel. Apa iatu to Israel tassu’ umpatarru’ kalingkanna tete dio kuasa lu dao mai.
9Naula’ darangmi to Mesir tu tau iato mai sisola karetana Firaun sia pakkanarangna sia mintu’ surodadunna, anna lambi’i, tonna torropa ma’tenda dio biring tasik sikandappi’ Pi-Hahirot, sipatu Baal-Zefon.
10Iatonna reke’mi Firaun, nabangunammi to Israel tu matanna, natiroi tu to Mesir, undi dio mai boko’na. Lendu’mi mataku’na tu tau iato mai, anna meongli’ langngan PUANG,
11sia ma’kada lako Musa nakua: Tang ganna’raka tu lamunan dio Mesir, ammi solangkanni sae unturu’komi, kumua angki mate lan te padang pangallaran iate? Umbara susite penggaurammi diona te kamibangki tassu’ lan mai Mesir?
12Tae’raka kipokadangkomi dio Mesir, kumua: Popa’elo’na bangmokanni kami, dai’to napokaunan bangmokanni to Mesir. Belanna kila’biranmo napokaunan to Mesir na iatu la mate lan padang pangallaran iate.
13Apa ma’kada tu Musa lako to buda, nakua: Da mimataku’, pabatta’i tu penaammi, ammi tiroi tu kadilendokan kapua lu dio mai PUANG, tu Napadenangkomi allo iate; belanna iatu mintu’ to Mesir, tu mitiro allo iate, tae’mo ammi la untiro polei tontong sae lakona.
14PUANG duka iatu la parari ussondakomi, na iatu kamu la ma’pakappa bangkomi.
15Ma’kadami tu PUANG lako Musa, Nakua: Ma’apai ammu meongli’ lako kaleKu? Suai tu to Israel male indete.
16Na iatu iko angka’i tu tekkenmu pa’dulluanni tu limammu tama tasik, ammu pa’duai tu uainna, anna ma’din tu to Israel lumingka lan tangnga tasik unnolai tu marangkena.
17Apa Aku, la Kupamakarra’ tu penaanna mintu’ to Mesir, kumua anna tau iato mai undi unturu’ to Israel, angKu patarompo’ kaleku lako Firaun sia mintu’ surodadunna sia mintu’ karetana sia mintu’ pakkanarangna.
18La naissan mintu’ to Mesir kumua Akumo tu PUANG, ke umpatarompo’Na Kaleku lako Firaun sia lako mintu’ surodadunna sia mintu’ pakkanarangna.
19Iatu Malaeka’Na Puang Matua tu undoloan baanan to Israel, lele ma’palulako boko’na tau iato mai sia ia duka tu lentong gaun dio mai tingayona tau iato mai anna tulangdan dio boko’na.
20Saemi lan alla’na surodadu to Mesir anna baanan to Israel; iatu gaun iato malillin dio sangbalinna, unnarrang bongi dio sangbalinna, naurunganni iatu surodadu tae’ nasireke’ situ’turan bongi iato.
21Napa’dulluammi Musa tu limanna tama tasik anNa pasoro’i PUANG tu uai tasik iato Napairi’i angin bara’ lu dio mai rampe matallo situ’turan bongi iato Napopempadang marangkei tu tasik, anna tipa’dua tu uainna.
22Lumingkami tu to Israel lan tangnga tasik unnolai tu marangkena, na iatu uai butung to rinding tembo’ dio la’pekna patomali.
23Naula’mi to Mesir tu tau iato mai, naturu’i tama tangnga tasik, iamotu mintu’ darangna Firaun sia mintu’ karetana sia mintu’ pakkanarangna.
24Iatonna dannarimo Natiromi PUANG lan mai lentong api sia gaun tu surodadu to Mesir, anNa patirambanni tu surodadu to Mesir.
25Napalammak tu mintu’ roda karetana tau iato mai, sia Napamale’lan lumingka, naurunganni ma’kada tu to Mesir, nakua: Melo ke mallaiki’ dio mai to Israel, belanna PUANG urrondongi tu tau iato mai urrarii to Mesir.
26Ma’kadami PUANG lako Musa, Nakua: Pa’dulluanni tu limammu tama tasik, anna lolong sule tu uainna ungkabu’ mintu’ to Mesir sia lako mintu’ karetana sia pakkanarangna.
27Napa’dulluammi Musa tu limanna tama tasik, anna lolong sule tu uai tasik rokko salinna tonna berre’mo allo; mallaimi tu to Mesir nasitammu tu uai iato; susimoto tu PUANG unnula’ mintu’ to Mesir tama tangnga tasik.
28Lolongmi sule tu uai tasik ussamboi tu mintu’ kareta sia pakkanarang sia mintu’ surodadunna Firaun, tu unturu’mo to Israel tama tasik; mintu’i tu tau iato mai tae’ bangi misa’ tilendok.
29Apa iatu mintu’ to Israel unnola karangkean lan tangnga tasik, na iatu uainna butung rinding tembo’ umpetangngai dio kananna sia dio kairinna.
30Susimo kaNarampananna PUANG to tu to Israel dio mai limanna to Mesir to allo iato; anna tiroi to Israel tu to Mesir mate situlambenan dio biring tasik.
31Attu iato natiro to Israel tu penggauran matoto’ Napogau’ PUANG lako mintu’ to Mesir; anna kataku’i tau iato mai tu PUANG sia napatongan tu PUANG sia iatu Musa, taunNa.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel