Atoran diona kaunan to Ibrani
1Ia nasangmote tu mintu’ atoran, tu la muparampo lako tau iato mai.
2Iake unnallikomi misa’ kaunan to Ibrani, annanri taunna la dipopa’kurinan, apa iake taun ma’pempitu, manassa la mentorro to makakamo sule, apa tae’ nama’talla’.
3Iake misa-misai tama, sipatu duka ia la misa-misari tassu’; iake tamai sola bainena, sipatu la tassu’ sola.
4Iake napakebainei puangna na iatu baine iato umpadadianni muane ba’tu baine, iatu baine iato sola anakna la torro napotau puangna, anna sun tu muanena misa-misa.
5Apa iake napamanassai ma’kada, kumua: Kukamali’ tu puangku sia repokku, manokana’ la tassu’ mentorro to makaka,
6la napopengkareke’ puangna lako oloNa Kapenomban, mangkato nabaai lako to’ ba’ba banuanna ba’tu to’ ampang ba’bana, anna tossokki panusuk puangna tu talinganna, anna dadi pa’kurinanna angge tuona.
7Iake nabalukanni tau tu anakna baine dadi kaunan, tae’ ia na la tassu’ susi mintu’ kaunan muane.
8Ianna tae’ nakalo’i penaanna puangna, moi nadipamanassamo, sipatu naeloran dila’bak, tae’ nama’din nabaluk lako bangsa senga’, belanna tang nakaruru’i.
9Ianna pamanassai lako anakna, sipatu napalalo lako tu atoran pia baine.
10Ianna umpobaine pole’ to senga’, tae’ nama’din napasosso’ tu kandena sia pakeanna sia ada’ kasisangamparan.
11Ianna tae’ napogau’i te tallu kara-kara iate, ma’din tassu’ tang mamaya’ doi’.
Atoran ungkaritutui katuoan to lino
12Minda-minda ungkambei tau namate, manassa dipatei duka.
13Apa iake tae’ naangga’i tu kamateanna, sangadinna pangeloranNa Puang Matua naruai limanna. Aku la umpadulluangko tu inan ma’din la nanii lussu’ lako.
14Apa iake denni tau umpogau’ kadake la ussanggangi padanna ma’rupa tau sia natangnga’ la umpatei, sipatu la miala moi nadio mai to’ pemalarangKu, anna dipatei.
15Minda-minda ungkambei ambe’na ba’tu indo’na, manassa la dipatei.
16Minda-minda umboko tau, ba’tu mangkami nabalukan, ba’tu lan siapa limanna, manassa la dipatei.
17Sia minda-minda unggantan ambe’na ba’tu indo’na, manassa la dipatei.
18Iake denni tau sigaga, anna sileba’ batu ba’tu sitambusuk, apa tae’ sia namate, sangadinna masakiri dao inan mamma’na;
19ianna ke’de’mo sule sia ma’tekken lako salian, iatu to ungkambei tae’ nadiukung, sangadinna la nasondai bangri tu ruginna, belanna tang leto tu pengkaranganna sia napa’pedampian samondona.
20Sia iake den tau ullonga’ kayu kaunanna muane ba’tu baine, anna ta’pa mate, tae’ na la tang dipabala’i.
21Apa iake tuo siapi sangallo ba’tu duang allo, tae’ nadipabala’i belanna apanna.
22Na iake denni tau sikambean sia denni misa’ untambusuk baine ma’tambuk naurungan kanaoan, apa tae’ sia napomatumbai, manassa didosa pada natuntunna muanena, anna baya’i pada tu nasituru’ina to ma’paolai salu.
23Apa iake napomatumba-tumbai, manassa iake papateanni la dipatei duka,
24pabutanni la dibutai duka, pasimpoanni la disimpoi duka, pata’takan limai la dita’takki duka tu limanna, pale’toan lentekki la dile’to duka tu lentekna,
25kama’la’poan ussonda kama’la’poan, bangke ussonda bangke, lonto’ ussonda lonto’.
26Sia iake denni tau ussala’pa kaunanna muane ba’tu baine, naurunganni nabutai sangbali tu matanna, manassa la napopentorro to makaka belanna matanna.
27Sia iake nasala’pai tu kaunanna muane ba’tu baine, naurungan simpo misa’ tu isinna, manassa la napopentorro to makaka.
28Iake denni muane ba’tu baine nalaga sapi namate, manassa la ditumbui batu samatena tu sapi iato, na iatu duku’na tae’ nama’din dikande, apa iatu puangna tae’ nadipasala.
29Apa iake pa’burrusan tempon dioi mai tu sapi iato sia dipokadammo puangna tu iannato, apa tae’ nakampai, anna iake umpatei muane ba’tu baine tu sapi iato, manassa la ditumbui batu samatena, na iatu puangna diukung mate.
30Iake dipa’tuntunni doi’ pa’dosa, manassa la nabengan tu mintu’ apa dituntun lako kalena nala’bakan sunga’na.
31Ba’tu iake umburru’i misa’ pia muane ba’tu pia baine, manassa la susi duka a’gan ukunganna to.
32Iake naburru’i sapi tu misa’ kaunan muane ba’tu baine, manassa la diben doi’ salaka tallungpulo sikele’, tu puangna tau iato sia ditumbui batu tu sapi iato samatena.
33Iake denni misa’ bubun tae’ naditutu’i, ba’tu tau umbo’bok bubun, natae’ natutu’i, anna tobang misa’ sapi ba’tu keledai tama,
34manassa la nasonda puangna bubun tu karugian nabaya’i tu allinna lako puangna patuoan iato, apa iatu duku’ patuoan iato ia unnalai.
35Iake denni sapinna tau ullaga solana napomatei, manassa iatu sapi tuo dibalukan na iatu doi’ allinna dipa’dua, susi dukato tu matena la disese.
36Apa iake manassai, kumua pa’burrusan tempon dio mai tu sapi iato natae’ nakampai puangna, manassa la nasonda mintu’ tu sapi iato, apa iatu duku’ sapi iato ia unnalai.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel