Atoranna diona apanna padanta ma’rupa tau
1Ianna den tau umboko misa’ sapi ba’tu domba ba’tu bembe’, anna tunui ba’tu nabaluk, manassa la nasonda lima sapi tu misa’ sapi sia misa’ domba ba’tu misa’ bembe’ la nasondai a’pa domba, ba’tu a’pa’ bembe’.
2Iake den misa’ to boko diapparan marassan ma’kakei anna dilonga’ samatena, tae’ nadituntun tu rarana lako to umpatei.
3Ianna bu’tuimi allo, la dituntun tu rarana lako to umpatei. Na iatu to boko la ussonda nasangi; iake tae’mi dio kalena, ia la dibalukan belanna bokona.
4Iake tandanni tu apa naboko dilolongan tuopa dio kalena, la sapi la keledai, la domba sola bembe’, manassa la nasonda manglokkon penduan.
5Iake denni tau ompopa’elo’nai tu sapinna, ba’tu dombana umpepurai bela’na ba’tu pa’lak anggoro’na to senga’, belanna napangrambai tama, anna pepurai tu bela’ iato, manassa la napa’bengan tu bura pa’tonno’ dio mai bela’na sia dio mai pa’lak anggoro’na la nasondanni.
6Iake denni tau mamalla anna mellepa’ tu api ungkande duri, naurungan ussappii patuku gandung ba’tu gandung tuo ba’tu mintu’ pa’lak, manassa la nasonda mintu’, to mamalla iato.
7Iake denni tau umpa’penannan doi’na ba’tu apa-apanna lako solana, anna diboko lan banuanna tau iato, ianna dilambiran tu to boko, manassa la nasonda manglokkon penduan.
8Iake tae’i nadiapparan tu to boko, iatu to ma’banua la mengkareke’ lako oloNa Puang Matua, anna umpalao sumpa kumua tae’ narumbui limanna tu apanna solana.
9Iatu mintu’ kasite’geran diona apa disanga diboko la bannang dio misa’ sapi, ba’tu misa’ keledai, ba’tu misa’ domba sola bembe’, ba’tu sanglamba’ pakean, ba’tu mintu’ apa pa’de, tu nasanga tau apanna, la napopennolo lako Puang Matua tu kara-karana tau iato sola duai. Minda-minda tu napasala to ma’paolai salu, manassa la nasonda lako solana penduan manglokkon.
10Iake den tau umpa’pekambiran misa’ keledai ba’tu sapi ba’tu domba sola bembe’ ba’tu mintu’ patuoan senga’ lako solana anna mate, ba’tu bangke, ba’tu labu’, anna tae’ misa’ tau untiroi,
11manassa umpalao sumpa ussa’bu’ sanganNa PUANG la umpaolai salu sola duai, kumua narumburaka limanna tu apanna solana, tae’raka, manassa la natarima puangna tu iannato, natae’ nama’kasonda tu senga’na.
12Apa iake manassai diboko dio mai kalena, sipatu la nasonda lako puangna.
13Iake tisepak-sepakki, la nabaa napotanda sa’bi, na iatu tisepakna tae’mo na la ussondai.
14Iake denni tau mangindan lako solana, anna sanggang, ba’tu matei, anna tae’ nadioren tu puangna, manassa la nasonda nasang.
15Ianna dio ren tu puangna, tae’ nasondai. Ianna sewai, iatu karugianna dipasireken sewana.
16Iake denni tau unnaran-naran misa’ anak dara, tu tae’pa nasikampan, anna sangampa’ sola, manassa la nabaya’ mintu’ tu sombana, anna pobainei.
17Iake manokai tu ambe’na umbenni, inang la natimbangan salaka tu tau iato sama budanna somba anak dara.
Atoran diona kasalan masang
18Da mupatuoi tu baine balik mata.
19Minda-minda ungkaromok olo’-olo’, manassa la dipatei.
20Minda-minda memala’ lako deata, natae’ na lako manna PUANG, manassa la disabu’i.
Atoran diona to sipatu ditundui
21Da mupakario-rioi tu to sae ba’tu mupandasai, belanna mangkamokomi to sae dio tondok Mesir.
22Da mipakario-rioi tu baine balu ba’tu pia biung.
23Apa iake mupakario-rio bangi susito, anna meongli’ lako Kaleku, manassa la Kuperangii tu peongli’na,
24la re’dek tu ara’Ku, angKu pateikomi pa’dang sia mintu’ bainemi la balu sia anakmi la biung.
25Iake mupaindanni doi’ tu taungKu, iamotu mai to bongko musisolan, da mubutung to pa’tungka maparrang lako kalena sia da mutuntunni tu uainna.
26Iake unnala pentoeko bayu lamba’na solamu, manassa la mupasulean dolo, namane lambun allo.
27Belanna iamannato tu perampangna, tu narampangan kuli’na; apa pole’pa senga’na tu la napennammu’ mamma’? Tonganna ianna meongli’ lako Kaleku, manassa la Kuperangi tu peongli’na, belanna Aku te maturu-turuNa’.
Atoran diona to ma’parenta sia diona apa disorong lako Puang Matua sia diona patuoan nasepak olo’-olo’ masuru
28Da mugantanni tu Puang Matua sia da mutangdoi tu mai arungmu.
29Da mupatadangi tu bunga’ bura padangmu sia uai anggoro’mu lako Kaleku. Manassa la mubenNa’ tu pa’bunga’na dio mai mintu’ anakmu muane.
30Susi dukato la mugauranni tu mintu’ sapimmu sia mintu’ bembe’ sola dombamu: pitung allori la mupasibaa indo’na, apa ianna allo ma’pengkaruamo sipatu la mupenomban lako Kaleku.
31La dadikomi to masero lako Kaleku, iamoto da mikande duku’ tisepak-sepak dio lu padang; sipatu la mibuangan asu.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel