Atoran umba nakua to Israel lolang lako padanna ma’rupa tau
1Da mupatale’ kareba tang tongan sia tae’ muma’din sa’bi kadake untundui kara-karana to sala.
2Da muturu’ bangi tu to buda umpogau’ kakadakean sia da mudadi sa’bi diona apa disikara-karai la unturu’ to buda umputa’-puta’i tu sukaran aluk.
3Sia da mupalosongi tu to bitti’ lan kara-karana.
4Iake unnappa’ko sapinna ualimmu ba’tu keledainna pusa, manassa la mupasulean.
5Iake untiroko keledainna to ungkabiri’ko, tibambang nai’pinni passampena, tae’ nasipatu mutiro-tiro bang tu tau iato, sangadinna la mutundui unnalai tu passampena.
6Da muputa’-puta’i tu katongananna to bongkomu lan kara-karana.
7Toyangangko kalemu dio mai kakelokan. Iatu to tae’ salana sia malambu’, da muukungi la dipatei, belanna tae’ Kusanda tonganni tu to kadake.
8Sia da mutarima pappe’, belanna iatu pappe’ umpabuta to pakita sia umputa’-puta’ kara-karana to tang sala.
9Sia da mupandasa to sae, apa mitandaimo tu penaanna to sae, belanna mangkamokomi to sae dio tondok Mesir.
10Annan taunna la muambo’i banne tu pa’lakmu sia urrampunni tu burana,
11apa taun ma’pempitu la mueloran talo, tang la mukarang, kumua anna iatu to bongko lan lu bangsamu ma’din ungkandei, sia iatu torrona ma’din nakande mintu’ angge menono’. Susimo la mugauranni to tu mintu’ pa’lak anggoro’mu sia saitunmu.
12Annan allona munii ungkarangi tu pengkarangammu, apa allo ma’pempitu sipatuko la torro, kumua anna iatu sapimmu sia keledaimmu ma’din melayo sia anna iatu anak pa’kurinammu baine sia ia duka tu to mempue la umpasule penaanna.
Atoran umba nakua to Israel la lolang dio oloNa PUANG
13Iatu mintu’ apa Kupokada lako kalemi la mikanana’i; iamotu tae’ muma’din la ussa’bu’ sanga deata senga’, da natassu’ len dio pudukmu to.
14Lan sangtaun pentallunko la umpogau’ pa’gauran umpakarayaNa’.
15La mukaritutui tu allo kapua roti tang diragii; pitung allo la munii ungkandei tu roti tang diragii, susitu Kupa’pepasanan lako kalemu, lan tu attu dipamanassa, bulan Abib, belanna lan bulan iato munii tassu’ lan mai tondok Mesir; da naden tau mennolo lako Kaleku ma’pala’ lo’bang.
16Sia iapa tu pa’gauran pegandungan, iamotu bunga’ bura padangmu, tu muambo’ dio pa’lakmu: sia iapa tu pa’gauran pangrampunan bua-bua, ketappu’ taunmi ke urrampunko kara’tasammu dio mai pa’lak.
17Lan sangtaun la pentallun tu taummu muane umpennoloi Puangmu PUANG.
18Da mupemalaran rara pemala’ lako Kaleku sola apa diragii, sia lompo pemala’ lako Kaleku lan allo pa’gauran da nadipaalai bongi sae lako melambi’.
19Mintu’ tu bunga’ bura padang me’lokmu la mubaa tama banuanNa PUANG, Kapenombammu. Da mutollo’i tu anak bembe’ muuai pangandu’na indo’na.
20Tonganna la ussuaNa’ misa’ malaeka’ lako tingayomu la ungkaritutuiko dio lu lalan sia la ussolangko lako inan Kuparandanangko.
21Kanandai tu kalemu dio oloNa, turu’i tu kadanna sia da mubali-balii, belanna tae’ na la umpa’dei tu kapatodotintingammi, belanna iatu sangangKu lan kalena.
22Apa iake muperangii tonganni tu kadanna sia muturu’ tu mintu’ kadangKu, manassa Aku la dadi ualinna tu mintu’ ualimmu sia Aku la umpandasai tu mintu’ to umpandasako.
23Belanna iatu malaeka’Ku la undoloangko sia la ussolangko tama tondokna to Amori sia to Het sia to Feris sia to Kanaan sia to Hewi sia to Yebus sia Aku la ussanggang nasangi tu tau iato mai.
24Da mutukku umpenombai tu deatanna tau iato mai sia da mupengkaolai sia da muturu’i tu penggauranna, sangadinna la musabu’i nasang tu iannato sia la musanggang-sanggang tu mintu’ batu napa’deatainna.
25La menombakomi lako PUANG, Kapenombammi na Ia la umpasikambi’i kamasakkean tu kandemu sia uaimmu, sia mintu’ saki la Kupatoyang dio mai kalemu.
26Lan tondokmu tae’ kanaoan sia tamanang sia Aku la umpaganna’i tu mintu’ taun kadadiammu.
27Iatu kama’parondoan lako Keleku la Kusua undoloangko sia Aku la umpamarambai tu bangsa murampoi, sia iatu mintu’ ualimmu la Kurambai dio mai olomu.
28Sia la ussuaNa’ tabuan balo undoloangko anna ula’i tu mintu’ to Hewi sia to Kanaan sia to Het dio mai tingayomu.
29Tae’ nasangtaun manna Kunii urrambai tu tau iato mai dio mai tingayomu, kumua da namakarorrong tu mai tondok sia da nasakerangngan-rangnganna tu olo’-olo’ untaloiko.
30La Kurambai pela’-pela’ tu tau iato mai dio mai tingayomu sae lako samemba’ka’-ba’ka’mu muurunganni umpomana’i tu tondok iato.
31Iatu lili’ tondokmu la Kukamaseangko randuk dio mai tasik Teberau sae lako tasik to Filistin sia dio mai padang pangallaran sae lako salu Efrat belanna mintu’ tau lan tondok iato la Kusorong tama limammu, ammu rambai tu tau iato mai dio mai tingayomu.
32Da’ musibasse tu tau iato mai ba’tu deatanna.
33Da’ natorro tu tau iato mai lan tondokmu, da’ naada’iko kasalan lako Kaleku. Iake menombai lako deatanna, manassa iatu iannato la dadi poya lako kalemu.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel