1Iatu Bezaleel sia Aholiab sia mintu’ to manarang tu Nakamasei PUANG kakinaan sia pa’inaan diona tu apa iato, anna issanni ungkarangi tu mintu’ pengkarangan kamenomban lan inan maindan la nakarang susitu mintu’ apa Napepasanan PUANG.
2Natambaimi Musa tu Bezaleel sia Aholiab sia mintu’ to manarang, tu Napatamai PUANG kakinaan tu ba’tengna, tu mintu’ to dipatiakka’ penaanna la sae ungkarangi tu pengkarangan iato.
3Natarimami dio mai Musa tu mintu’ pa’duruk tu nabaa to Israel la dipake lako pengkarangan, tu dikarang menomba, lan inan maindan, kumua anna karangi tu pengkarangan iato. Apa iake melambi’oi tontongpa nabaa tau iato mai tu pamengan langngo’ penaa.
4Sia iatu mintu’ to manarang, tu ungkarang mintu’ pengkarangan diona inan maindan iato, pantan sae lu dio mai to’ pengkaranganna,
5anna ma’kada lako Musa nakua: La’bi maro’ nabaa tu tau iato mai na iatu la dipakena lako pengkarangan tu Napepasanan PUANG ungkarangi.
6Mesuami Musa metamba-tamba lan lu to’ tenda, nakua: La muane la baine damo namasara’ la umbaa pa’duruk lako inan maindan. Susimoto nanii unta’tanni tu to buda umbaapi.
7Belanna ganna’mo tu mintu’ pareanan lako kalena, kumua anna karangi tu mintu’ pengkarangan iato, ondongpi la’bimo.
Diona garaganna kema
8Nagaragaimi to manarang dio mai mintu’ pande tu kema umpake kulambu sangpulo lamba’na, dio mai bannang lenang melo dikaridi’ sia bannang ma’rupa lango-lango sia lango-lango makaseda sia karamisi; natannun melo tongan sia napopa’karubion lan.
9Iatu landona kulambu iato ke misa’oi duangpulo ngkarua siku na iatu sangka’na patang siku sia la sangsukaranri tu mintu’ kulambu iato.
10Iatu limang lamba’ kulambu napasikande-kande nasang na iato limang lamba’na napasikande-kande duka.
11Nagaragan dukapa ba’tu pira-pira kale’ke’ lango-lango dio biringna tu kulambu misa’ dio tampak kulambu tu dipasikandenamo, susi dukato nagaragan dio biring kulambu dio tampakna misa’nao tu dipasikandenamo.
12Limangpulo kale’ke’ nagaraga dio to’ biring kulambu sanglamba’ na limangpulo kale’ke’ dio biring kulambu misa’nao tu dipasikandenamo; mintu’ tu kale’ke’ iato sipatu nasang.
13Nagaragampa limangpulo pekadang bulaan, anna pekadang iato napasikandeanni tu kulambu, naurunganni mendadi misa’ tu kema iato.
14Sia nagaragaipa tu kulambu tenda bulu bembe’ la dipotenda dio salianna tu kema iato; iatu kulambu tenda iato nagaraga sangpulo misa lamba’na.
15Iake sanglamba’i tu kulambu tenda la tallungpulo siku tu landona na patang siku tu babana; la sangsukaranri tu kulambu tenda sangpulo misa lamba’na.
16Iatu limang lamba’ kulambu tenda napasipatu napamisa’, susi dukato tu annannapa lamba’na napamisa’.
17Nagaragaimo tu limangpulo kale’ke’ dio biringna to kulambu sanglamba’, tu kulambu dio iringna tu dipasikandenamo, sia limangpulo kale’ke’ dio kulambu, misa’nao tu dipasikandemo.
18Nagaragammo limangpulo pekadang tambaga, anna pasikandei tu tenda iato mendadi misa’.
19Sia nagaragan dukamo misa’ pesambo kuli’ domba laki pa’damorro’ mararang nasamboanni tu tenda iato, na daona lu tu pesambo iato misa’ pole’pa pesambo kuli’ taka’.
20Nagaragammo papan kayu simmin, dipabendananni tu kema iato;
21iatu landona papan iato sangpulo siku ke misa’oi sia iatu babana sangsiku sangtangnga ke misa’oi.
22Dio misa’ papan den da’dua petangki’na, tu dipasitoe-toe; napasusi nasang to tu mintu’ papan kema iato.
23Napasusite tu mintu’ papan kema iato: duangpulo papan tu rampe sau’na.
24Nagaragaimo tu patangpulo lette’ salaka, diongna lu to duangpulo papan; da’dua lette’ diong misa’ papan, dinii umpellasukanni tu da’dua petangki’ sia da’dua pole’o diong misa’ papan dinii umpellasukanni tu da’dua petangki’.
25Nasusi dukato nagaragan duangpulo papan tu sa’de senga’na kema, iamotu rampe rekkena,
26sia nagaragan lette’ salaka patangpulo tu papan iato: da’dua lette’ diong misa’ papan na da’dua pole’o diong misa’ papan.
27Apa iatu boko’ kema tu rampe matampu’ nagaragan annan papan.
28Sia nagaragammo da’dua papan la untutu’i tu da’dua lette’ kema tu diona boko’.
29Pada bang tu papan iato da’dua tu diongna lu sia daona lu sae langngan komba bunga’na. Napasusimoto tu papan da’dua, anna padadii tu da’dua tetuk.
30Iamoto na iatu mintu’ papan la karua sola lette’ salakana: sangpulo annan tu lette’na; da’dua diong ke misa’oi papan.
31Sia nagaragammo ba’tu pira-pira pesa’pi’ kayu simmin: limang batang lako mintu’ tu papan dio sangsesena kema,
32nalimang batang lako mintu’ papan dio sangsesena pole’o, sia limapa lako tu mintu’ papan dio boko’ kema rampe matampu’na.
33Nagaragaimo tu pesa’pi’ lan tangngana lan tangnga papan la untarru’i tu mintu’ papan iato randuk dio mai tampakna sae lako tampak sangbalinna.
34Sia nakallasa’mo bulaan tu mintu’ papan sia bulaan nagaraga, tu mintu’ komba dinii unnulu pesa’pi’, sia nakallasa’ bulaan tu mintu’ pesa’pi’.
35Nagaragammo tu kulambu bannang lango-lango makaseda sia karamisi sia bannang lenang melo dikaridi’; iatu sampin iato natannun melo tongan sia napopa’karubion lan.
36Sia nagarammo a’pa’ lentong kayu simmin sia nakallasa’ bulaan; sia iatu pekadangna bulaan digaraga, sia napati’noran lentek salaka a’pa’.
37Nagaragammo ba’ba tenda tu misa’ kulambu bannang lango-lango sia lango-lango makaseda sia karamisi sia bannang lenang melo dikaridi’: misa’ pa’tannun paruki’.
38Sia nagaragammo lima lentong kayu simmin sola pekadangna; sia nakallasa’ bulaan tu tampak daona lu sia tokeranna, sia iatu lentekna lima tambaga digaraga.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel