Peada’ lako to ullopian tondok
1Ma’kadana’ kukua: Perangiimi, e kamu pangulunna Yakub sia to ullopian to Israel, tang sipaturokomika untandai tu salunna?
2Mikagi’gi tu melona, ammi kabarii tu kadakena, mikalekei tu kuli’na sia issinna dio mai bukunna tau iato mai.
3Ondongpi nakande tau iato mai tu duku’na taungKu, sia napekuli’i sia nale’to tu bukunna, anna ira’-ira’i susi duku’ lan kurin ba’tu lan panti.
4Attu iato la metamba-tamba tu tau iato mai lako PUANG, apa tae’ Nabalii, sangadinna la Nabunian lindoNa, belanna ma’gau’ kadakemo tu tau iato mai.
5Inde sia tu kadanNa PUANG diona mintu’ nabi, tu umpapusa taungKu, sia iatu ma’kada nakua: maupa’, ke denni apa nakeke’, apa iatu to tae’ bang apa nasuak, nasa’buran rari, nakua:
6Iamoto la nasikapu’ikomi bongi natae’ patiro mendeata, sia la den kapittukan natae’ kapakita-kitan, la nalambunni mata allo tu nabi, sia iatu allo la membali pittuk lako tau iato mai.
7Mintu’ to patanda-tandan la kasirisan sia mintu’ to pakita-kita la bangngo ara’, anna samboi tu puduk daoanna, belanna tae’ Napebalii Puang Matua.
8Apa iatu aku, naponnoina’ kamatotoran, sia PenaanNa PUANG, sia salunna sia kamawatangan, la umpokadanni Yakub tu kapatodo-tintinganna sia Israel tu kasalanna.
9Iamoto perangiimi te, e mintu’ pangulunna bati’na Yakub sia mintu’ to ma’lopianna bati’na Israel, tu ungkasorro salunna sia umpakelok tonganna,
10tu umbangun Sion umpato’do rara sia Yerusalem umpogau’ kakelokan.
11Iatu mintu’ pangulu ma’paolai salu ungkande pappe’, sia mintu’ to minaa mangada’ umpalaku saro sia mintu’ nabi pakita-kita umpalaku doi’. Moi na susito iatu tau iato mai sande’ duka lako PUANG sia ma’kada nakua: Tae’raka PUANG dio lu kaleta? Tae’ nala urrampoiki’ kamandasan!
12Iamoto kamu napobannang na iatu Sion la ditengko susi misa’ pa’lak, sia iatu Yerusalem la mendadi misa’ inan daun launan, ondongpi iatu buntu Banua Kabusungan la membuntu pangala’.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel