Passambayang umpangandoan Sion
1Passambayangna to mandasa bang, ke tang naattami sia untua’ sarrona dio oloNa PUANG. (102-2) O PUANG, tananni talinga tu passambayangku, sia sangapaoi anna rampo mati’ Kalemi tu pengkamoyaku.
2(102-3) Da Mibunianna’ lindoMi ke nalambi’na’ attu kamandasan; tanannina’ talingamMi; sia perangiina’ madomi’, ke meongli’na’.
3(102-4) Belanna iatu katuoangku labu’ butung rambu, sia mintu’ bukungku malassuk susi api dukku.
4(102-5) Iatu penaangku malayu butung riu nala’da’ allo, belanna tang kupoinaa kumande.
5(102-6) Iatu kuli’ku la’ka’ lako bukungku, napobua’ sarro budangku.
6(102-7) Butungna’ kayo dio lu padang aak, sia tenmo’ langau to’ batu dio tondok daun lauan.
7(102-8) Maroyana’ sia butungna’ Manuk-manuk torro misa dao bubungan.
8(102-9) Kiallo-kiallo nabe’sena’ mintu’ ualingku, sia mintu’ tu to sumadang-madang lako kaleku, unggatai tau, umpotandaran kada sangangku;
9(102-10) Belanna ungkandena’ au butung bo’bo’, sia kuto’bo’ uai mata tu kuiru’na,
10(102-11) Diona kare’dekamMi sia kasengkeamMi. Belanna mangkamo’ Miangka’, amMi tibe polena’ sule.
11(102-12) Iatu katuoangku susito bayo-bayo kalando, sia malayuna’ ten to riu.
12(102-13) Apa Kamu, o Puang, unnisung tontong sae lakona, sia iatu kadiannamMi batu silambi’ disituran-turananni.
13(102-14) La ke’deKomi sia la ungkaturu-turui Sion, belanna iatu attu ungkaturu-turui, tu attu pura dilampak nalambi’mo!
14(102-15) Belanna mintu’ taumMi ungkamali’ batunna Sion, sia tang namasean tu barra’-barra’na.
15(102-16) Susinnamoto la nanii mintu’ bangsa ungkataku’ sanganNa PUANG, sia mintu’ datu lan te lino la ungkataku’ kamala’biramMi.
16(102-17) Belanna Nabangunmo PUANG tu Sion, anna payan tu Puang situang kamala’biranNa.
17(102-18) Napalempeimo talinga tu passambayangna to dipangrampai, na iatu passambayangna tae’ anNa tiro baitti’i.
18(102-19) Iatu iannate la disurasan to dadi undi, kumua anna iatu bangsa la dipaden undinna la umpudi PUANG.
19(102-20) Belanna Natiro lumbangmo Puang dao mai masuanggana inan maindanNa. Ondongpi lan mai suruga Naniimo ma’pemantang tama te lino.
20(102-21) La umperangii sarrona mintu’ to dipattang, sia la urrampanan mintu’ to dilampakmo la dipatei.
21(102-22) Kumua anna pa’peissananni tau dio lu Sion tu sanganNa PUANG, sia dio lu Yerusalem tu kadipudianNa,
22(102-23) To ke sangsirampunanni tu mintu’ bangsa sia mintu’ parenta la umpengkaolai PUANG.
23(102-24) Iamo umpamoro’ kamawatangangku dio lu lalan, sia umpamadenge’ sunga’ku.
24(102-25) Kukuami: O Kapenombangku, da Mibaana’ lako kamatangnganna sunga’ku. Iatu mintu’ taunMi sipapa’ sae lakona.
25(102-26) Iatonna dolona Kamumo unnoton parandangan lino, na iatu langi’ lalan limamMi.
26(102-27) Mintu’na to la pa’de, apa iatu Kamu tontong sae lakona; mintu’nato, la buruk susi tamangkale, sia butung misa’ bayu lamba’ la Misondai anna bali’.
27(102-28) Apa iatu Kamu tang tileluk len, sia mintu’ taun bilanganMi tae’ upu’na.
28(102-29) Mintu’ bati’ taumMi la torro marampa’, sia iatu lanto mimi’na la tontong bantang dio oloMi.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel