Alkitab Mobile SABDA
[VER] : [TORAJA]     [PL]  [PB] 
 <<  Mazmur 119 >> 

Kamala’biranna Sukaran alukNa Puang Matua

1Maupa’ tu mintu’ to malolo lalanna, sia to unturu’ mana’pa Sukaran alukNa PUANG.

2Maupa’ mintu’ to unnanna rara’i tu kasa’bianNa, sia to kalebu tallang penaanna undaka’ Puang.

3Tu to tang umpogau’ duka kelok, sangadinna unturu’ mana’pa lalanNa Puang.

4Mintu’ parentaMi Mipa’parentammo, kumua anna karitutui meloi tau.

5Sangapaoi anna matontongan tu mintu’ tengkaku, unturu’ aluk mangka Mipondok.

6Tae’ angku la kasirisan, ke kupalan ara’i tu mintu’ pepasanMi.

7Ma’bulo lollongna’ la umpudiKomi, ke kupelada’i tu atoran maloloMi.

8La kukaritutui tu apa Mipondok, da Mitampe tarru’na’.

9Umba la nakua ungkaritutui gau’na tu to mangura anna masero? Iapi ke nakaritutui susitu kadamMi.

10Kalebu tongan penaangku undaka’Komi, da Mieloranna’ pusa dio mai mintu’ pepasanMi.

11Iatu kadamMi kuanna rara’ lan batu ba’tengku, dikua da angku kasalan mati’ Kalemi.

12Kamumo sipatu dipudi, o PUANG; patuduna’ tu mai apa Mipondok.

13Napa’peissanammo tongka’ dililaku tu mintu’ atoran ombo’ dio randan pudukMi.

14Kuposende tu lalan kasa’biamMi, susina’ to umposende kasugiran.

15La kutangnga’-tangnga’ tu mai parentaMi sia la Kupalan ara’ tu mintu’ lalanMi.

16Kupoparannu tu apa Mipondok, sia tae’ angku la ungkalupai lenni tu kadamMi.

17Pogau’i tu kameloan lako taumMi, angku tuo; kukaritutui mana’pai tu kadamMi.

18Bungka’i tu matangku angku tiroi tu apa kalle-kalleanna lan sukaran alukMi.

19Aku te to saena’ lan lino, da Mibunianna’ tu mintu’ pepasanMi.

20Bonnong tu penaangku, belanna tontong bang mamali’ lako atoramMi.

21Miada’mo tu to matampo ditampakki ropu, tu pusa dio mai mintu’ pepasanMi.

22Pa’dei tu attangan sia kamatunan dio mai kaleku, belanna kukaritutui tu mintu’ kasa’biamMi.

23Moi namarassan tu mai mintu’ tedong pariu’na tondok ma’kombongan la unneana’, apa iate taumMi mukkun untangnga’-tangnga’ aluk Mipondok.

24Mintu’ tu kasa’biamMi kuposende, sia iamoto ma’pakilalaku.

25Merrandanmo’ lako litak, patuona’ susitu kadamMi.

26Kuparampo nasangmo Mati’ tu diona torro ke’de’ku, amMi perangiimo’, patudumo’ tu mai apa Mipondok.

27Paissannina’ lalanna tu mai mintu’ parentaMi, angku tangnga’-tangnga’i tu mintu’ penggauran kalle-kalleamMi.

28Bonnong tu penaangku napobua’ rosso inaa, pabantangna’ susitu kadamMi.

29Patoyangi dio mai kaleku tu lalan kamo’rangan, sia kamaseina’ kapaissanan diona sukaran alukMi.

30Iamo kupilei tu lalan kamanapparan, sia mintu’ atoranMi kuallonni bang,

31la’ka’ lakona’ kasa’biamMi, o PUANG, da Mieloranna’ kasirisan.

32La kuturu’ tu lalan pepasanMi, belanna Mipamalosangmo tu penaangku.

33O, PUANG ada’ina’ tu lalan aluk Mipondok, angku karitutui landa’ lako ma’katampakanna.

34Benna’ tangnga’ kinaa, angku karitutui tu sukaran alukMi, sia angku kanannangi situang penaa kalebungku.

35Pate’tena’ unnola lalan pepasanMi, belanna iamo pa’poraiangku.

36Pamalang lakoi kasa’biamMi tu penaangku, sia da Mipalulakoi ianan bu’tu kadake.

37Patipero’i tu matangku, da anna ta’pai tu mai apa tang kebattuan. Sia patuona’ diona lalanMi.

38Pamanda’i tu pangallu’Mi lako taumMi, tu to matinuru’ ungkataku’Komi.

39Patoyangi dio mai kaleku tu kadilangdoan kukataku’, belanna maelo tu mintu’ atoramMi.

40Iatu penaangku ungkamali’ mintu’ parentaMi, patuona’ tete dio kamaloloamMi.

41Sangapaoi anna rampoina’ kamasokanamMi, o PUANG, iamotu kasalamaran lu dio mai Kalemi, susitu Miallu’na.

42Angku belai umpebalii tu to ullangdona’, belanna umposande’na’ kadamMi.

43Da Mipasisayuran tarru’i pudukku tu kada situru’ tonganna, belanna umposande’na’ mintu’ atoramMi,

44angku tontong untoe manda’ sukaran alukMi, landa’ sae lakona.

45Angku la lolang malona’, belanna undaka’na’ parentaMi.

46Sia tang masiri’na’ umpokada mintu’ kasa’biamMi dio olona mintu’ datu.

47Sia kuposande’ tu mintu’ pepasanMi, tu kupa’buda-budai.

48Iamoto angku mempala’ lako mintu’ pepasanMi tu kupa’buda-budai; sia kutangnga’-tangnga’ tu mintu apa Mipondok.

49Kilalai tu kadamMi lako te taumMi. Belanna Mibenmo’ kapa’rannuanan;

50iamote tu pa’pakatana lako kaleku lan kamandasangku, kumua napatuomo’ pangallu’Mi.

51Lendu’ natelle-telleku to matampo, apa tae’ angku sepang dio mai sukaran alukMi.

52Iake kukilalai tu atoramMi sangbara’ padang, matanami tu ba’tengku.

53Nakendekkina’ palla napobua’ tu mai to tang mekaaluk tu umboko’imo sukaran alukMi.

54Mintu’ tu apa Mipondok kuposengo, lan inan pempueangku.

55Iake bongi kukilalai bang tu sangamMi, o PUANG, sia kuallonni tu sukaran alukMi,

56Iamo kataanangku to, belanna kukaritutui tu parentaMi.

57Iatu PUANG iamo kataanangku, kuallu’mo la ungkaritutui kadamMi.

58Lantuk penaangku umpalaku pa’kamaseamMi, katuru-turuina’ susitu pangallu’Mi.

59Kutimbang-timbang tu diona lalanku, angku palulakoi mintu’ kasa’biamMi tu tengkaku.

60Madomi’na’ sia tang panandakanna’ unturu’i tu mintu’ pepasanMi.

61Natekkemo’ poyana mintu’ to tang mekaaluk, apa tae’ angku kalupai tu sukaran alukMi.

62Iake ma’tangngai bongi millikna’ umpudiKomi, belanna mintu’ atoran malambu’Mi.

63Akumo tu solana mintu’ to ungkataku’Komi, sia mintu’ to ungkaritutui parentaMi.

64O PUANG, iate lino naponnoi kamasokanamMi, ada’ina’ tu mai apa Mipondok.

65MangkamoKomi umpogau’ melo lako taumMi, o PUANG, sitinaya tu pangallu’Mi.

66Ada’ina’ kamatarrusan sia kapaissanan, belanna kukatappa’i tu mintu’ pepasanMi.

67Iatonna tang urrampoipa’ parri’, pusana’, apa totemo umpengkaolaimo’ kadamMi.

68Masokan tonganKomi, sia umpogau’Komi melo; ada’ina’ tu mai apa Mipondok.

69Napasussuimo’ kadake to matampo apa kukaritutui tu mintu’ parentaMi situang penaa lantukku.

70Babun tu tau iato mai butung to nakapu’ lompo tu penaanna, apa iatu aku te umposendena’ sukaran alukMi.

71Melo duka sia angku mangkamo narua parri’, kumua angku ma’din umpelada’i tu mintu’ apa Mipondok.

72Iatu atoran Sukaran aluk ombo’ dio randan pudukMi mandu maelo lako kaleku, anna iatu bulaan sia salaka massa’bu-sa’bu.

73LimamMimo tu ungkombongna’ sia umpatepuna’, benna’ kapaissanan angku issanni umpelada’i tu mai pepasanMi.

74Iatu mintu’ to ungkataku’Komi la sende untirona’, belanna kurannuan tu kadamMi.

75Kuissan, o PUANG, kumua mintu’ pangra’ta’Mi malolo nasang. Sia tete dio kamarurusamMi ammi pa’dikkimo’.

76Sangapaoi anna iatu kamasokanamMi kupomatana, susitu pangallu’Mi lako taumMi.

77Sangapaoi anna rampoina’ tu mintu’ mamaseMi angku tuo, belanna iatu sukaran alukMi iamo kuposendena.

78Da’ito anna kasirisan tu mintu’ to matampo, belanna tae’ bannangna nanii umpakario-riona’; apa iatu aku la untangnga’-tangnga’na’ mintu’ parentaMi.

79Sangapaoi anna lu lako kaleku tu mintu’ to ungkataku’Komi, iamotu to unnissan mintu’ kasa’biamMi.

80Sangapaoi anna kalebu tallang tu penaangku umpengkaolai mintu’ apa Mipondok, da angku kasirisan.

81Mamali’ tungka tu penaangku lako kasalamaran dio mai Kalemi, sia urrannuanna’ kada pangallu’Mi.

82Mata’ka’ tu matangku umpemanta pangallu’Mi, angku ma’kada: Piranra amMi la umpakatanana’?

83Moi susimo’ to bila ditapai, apa tae’ duka sia angku kalupai tu mintu’ apa Mipondok.

84La sangapapi lambe’na tu sunga’na te taumMi? Sia piranra amMi paolai salunna tu mintu’ to unnula’ sumpuna’?

85Nagaragammo’ patuang lambe’ to matampo, tu mai to tang unturu’ sukaran alukMi.

86Tang balle tu mintu’ pepasanMi; iatu tau iato mai tae’ bannangna nanii unnula’ sumpuna’, tunduina’ dikka’.

87Sidi’mora anna sabu’ina’ lan mai lino, apa tae’ angku rampanan lenni tu mintu’ parentaMi.

88Patuona’ sitinaya kamasokanamMi, angku toe manda’i tu kasa’bian ombo’ dio pudukMi.

89O PUANG, tang tiberu susuk tu kadamMi, dao suruga tontong sae lakona.

90Sia iatu kamarurusamMi landa’ lako disituran-turananni, mangkamo Miparandanganni te lino anna bantang pole’.

91Tete dio atoranMi anna bantang tu mintu’nato, sae lako totemo, belanna mintu’nato mengkaola lako Kalemi.

92Iakenna tang la ia kuposende tu sukaran alukMi, manassa sabu’na’ lan kamaparrisangku.

93Inang tae’ angku la ungkalupai len parentaMi, belanna tete diori amMi patuona’.

94Akumo tu taumMi; lendokanna’ dikka’, belanna umpengkaolaimo’ mintu’ parentaMi.

95Naaungammo’ to tang mekaaluk la nasanggangi, apa la kuparinaa tu mintu’ kasa’biamMi.

96Iatu mintu’na moi anna sundun, kutiromo tu anggenna, apa iatu pepasanMi tae’ randanna.

97Lendu’ kukamali’na tu sukaran alukMi! Kiallo-kiallo kunannung bang.

98PepasanMi mandu umpakinaana’ anna iatu mai ualingku, belanna tontong bang kuselle’.

99Sia mandu matarru’na’ aku anna gurungku, belanna mintu’ kasa’biamMi iamo kutangnga’-tangnga’.

100Mandu paisanna’ anna to matua-tua, belanna umpengkaolaina’ mintu’ parentaMi.

101Kupamari’pimo tu lentekku tang la unnola lalan kakadakean, kumua angku belai ungkaritutui kadamMi.

102Tae’ angku sepang len dio mai mintu’ atoramMi, belanna Kamu tu mangka umpatuduna’.

103Lendu’ ia marasanna kusa’ding tu mintu’ kadamMi, mandu matappa’ lan sadangku anna tani’ enoan.

104Dio mai parentaMi kunii unnappa’ kapaissanan; iamo bannangna to, angku kabiri’i tu lalan kamo’rangan.

105Iatu kadamMi sitinti palita diong to’ lentekku, sia butung bia’ unnarrang lalanku.

106Mangkamo’ umpalao sumpa sia la kupakatua te iannate: La kukaritutui tu mintu’ atoran malambu’Mi.

107Lendu’ masangna tu parri’ urruana’, o PUANG, patuona’, susitu pangallu’Mi.

108O PUANG, timangi tu mintu’ pemala’ tanning inaa nasa’bu’ tongka’ dililaku; sia patuduna’ tu mai atoranMi.

109Tontong bang narandanni kasanggangan tu sunga’ku, apa tae’ angku kalupai len sukaran alukMi.

110Natanannimo’ poya to tang mekaaluk, apa tae’ angku sepang dio mai parentaMi.

111Mintu’ kasa’biamMi kualamo kupokataanan matontongan, belanna naposende penaangku.

112Kupamalang tu penaangku la tontong umpogau’ apa Mipondok, landa’ sae lako ma’katampakanna.

113Kukabiri’ tu mai to ma’ranga’-ranga’ penaanna, apa kukamali’ tu sukaran alukMi.

114Kamumo tu pentirerungangku sia balulang toto’ku, kurannuan tu kadamMi.

115MallaiKomi dio mai kaleku, e kamu to umpogau’ kakadakean, Angku kullei ungkaritutui pepasanna Kapenombangku.

116Sande’na’ susitu pangallu’Mi, angku tuo, sia da Mieloranna’ kasirisan diona tu kapa’rannuangku.

117Tulakna’ angku makarimman, angku tontong umposendei tu apa Mipondok.

118Mitibe tu mintu’ to sepang dio mai apa Mipondok, belanna tang kebattuan tu mintu’ pakira-kiranna.

119Iatu mintu’ to tang mekaaluk Miroto’i lan mai te lino butung bura-bura, iamo bannangna to, angku kamali’i tu mintu’ kasa’biamMi.

120Rumonting tu kaleku diona kametakuramMi, sia mataku’na’ belanna mintu’ pa’paolaimMi salu.

121Mangkamo’ umpogau’ katonganan sia kamaloloan, da Misorongna’ lako to umpakario-riona’.

122Payo-payoi tu taumMi anna pomeloi, da anna pakario-riona’ to matampo.

123Mata’ka’ tu matangku untayan kasalamaran lu dio mai Kalemi, sola tu kada kamaloloamMi.

124Pogau’i lako taumMi sitinaya kamasokanamMi, sia ada’ina’ tu mintu’ apa Mipondok.

125Akumo tu taumMi; benna’ kapaissanan, angku belai unnissanni tu mintu’ kasa’biamMi.

126Nalambi’mo tu tanda allu’na, sipatu Nanii PUANG ma’pogau’, belanna nalendaimo tau iato mai tu sukaran alukMi.

127Iamoto angku pa’buda-budai tu mintu’ pepasanMi, ondong anna bulaan, bulaan tasak.

128Iamoto angku bilang maloloi lan mintu’na tu mai parentaMi, angku kabiri’i tu mintu’ lalanna to mo’rang.

129Kalle-kallean tu mintu’ kasa’biamMi. Iamoto anna pengkaolai penaangku.

130Kadipapayananna kadamMi umpamasiang sambu’ penaanna tau. Sia umbenni tangnga’ kinaa tu to tang unnampui tangnga’ kinaa.

131Mengangana’ sia mangussu’na’ belanna ungkamali’na’ mintu’ pepasanMi.

132Sailena’ sia katuru-turuina’, susitu inang pato’na lako mintu’ to ungkamali’ sangamMi.

133Pabantangi tu mintu’ tengkaku situru’ pangallu’Mi, sia da anna den kakadakean umparentana’.

134Lendokanna’ dio mai pa’pakario-riona tolino, kuturu’ mana’pai tu mintu’ parentaMi.

135Paarrangi rupamMi te taumMi, sia ada’ina’ tu apa Mipondok.

136Iatu uai matangku lolong susi uai salossok, belanna tae’ tau umpengkaolai sukaran alukMi.

137O PUANG, Kamumo tu tang pakayun bimbang, sia iatu mintu’ atoramMi manappa’.

138Iatu kasa’biamMi Mipalao situang kamaloloan sia kamarurusan tongan.

139Nabonnongmo’ kamukkunangku, belanna naboko’imo mintu’ ualingku tu kadamMi.

140Iatu kadamMi masallo’ tongan, iamoto anna kamali’i taumMi.

141Aku te to bitti’ sia to tang disaile, apa tae’ angku kalupai tu parentaMi.

142Iatu kamaloloamMi iamo kamaloloan tang tileluk sae lakona, sia iatu sukaran alukMi sanda tonganna.

143Iake naruana’ kapussakan sia kadipakario-rioan, apa mintu’ pepasanMi kuposende.

144Iatu mintu’ kasa’biamMi malolo sae lakona, benna’ dikka’ kapaissanan, angku tuo.

145Meongli’na’ situang penaa lantukku: Perangiina’ dikka’, o PUANG! Angku karitutui tu mintu’ apa Mipondok.

146Meongli’na’ Mati’: Lendokanna’ dikka’! Angku pengkaolai tu mintu’ apa Mipondok.

147Tae’pa anna tilalek masiang, angku inang mangkamo mengkamoya, sia urrannuanna’ kada pangallu’Mi.

148Kutu’turan bongi tang mamma’ kumua angku ma’din untangnga’-tangnga’i tu pangallu’Mi.

149Perangii tu peongli’ku sitinaya kamasokanamMi; o PUANG, patuona’ situru’ tu mintu’ apa Mipantok.

150Iatu to umparri-parri kakadakean, mengkareke’mo, tau iato mai toyangmo dio mai sukaran alukMi.

151O PUANG, mareke’ duka sia Komi, sia mintu’ pepasanMi sanda tonganna.

152Tempon diopa mai angku issanni lan kasa’biamMi. Kumua Mipabantangmo tontong sae lakona.

153Tiroi tu kamandasangku, amMi rampananna’! Belanna tae’ angku kalupai tu sukaran alukMi.

154Pasanda salunnana’ diona kasipakkangku tau, amMi lendokanna’; patuona’ susitu pangallu’Mi.

155Toyang ia tu kasalamaran dio mai to tang mekaaluk, belanna tae’ anna anga’ lenni tu apa Mipondok.

156Kapua tongan tu mamaseMi, o PUANG, patuona’ situru’ tu mintu’ atoramMi.

157Buda tu tau unnula’ sumpuna’ sia unneana’, apa tae’ angku lesangi tu kasa’biamMi:

158Magi’gi’na’ untiroi tu mai to balik, belanna tae’ natoe manda’i tu kadamMi.

159Tiromi, umba kukua umpa’buda-budai tu mintu’ parentaMi; o PUANG, patuona’ sitinaya kamasokanamMi.

160Makalima’na kadamMi sanda tonganna nasang. Sia mintu’ atoran malambu’Mi tang tileluk sae lakona.

161Mintu’ tedong pariu’na tondok unnula’ sumpuna’ natae’ bannangna, apa lendu’ ia ma’parondona tu penaangku diona mintu’ kadamMi.

162Sendena’ diona kada pangallu’Mi, butung to unnala buda pangrampa.

163Na iatu mo’rang kukabiri’ sia kukagi’gi’, apa kukamali’ tu sukaran alukMi.

164Pempituna’ lan sangallo umpudiKomi, diona atoran malambu’Mi.

165Iatu to ungkamali’ sukaran alukMi, unnappa’ kamarampasan kapua, belanna tae’ apa umpatitodoi tu tau iato mai.

166O PUANG, kurannuan tu kasalamaran lu dio mai Kalemi, sia kukaritutui mintu’ pepasanMi.

167Natoe manda’ deatangku tu kasa’biamMi, sia kupa’buda-budai tongan.

168Kutoe manda’ tu mintu’ parentaMi sia kasa’biamMi. Belanna mintu’ lalanku payan nasang dio oloMi.

169Sangapaoi anna rampo mati’ oloMi tu peongli’ku, o PUANG, sia benna’ kapaissanan susitu kadamMi.

170Sangapaoi anna lattu’ mati’ oloMi tu pengkamoyaku, sia rinding pala’na’ susitu pangallu’Mi.

171La ma’uai lolong tu pa’pudi-pudian dio mai randan pudukku, belanna Miada’ina’ tu mintu’ apa Mipondok.

172La naposengo tongka’ dililaku tu kadamMi, belanna kamaloloan tu mintu’ pepasanMi.

173Sangapaoi anna tumayo tu limamMi untunduina’, belanna iamo kupilei langsa’ tu parentaMi.

174O PUANG, kukamali’ tu kasalamaran lu dio mai Kalemi; na iatu sukaran alukMi iamo kuposende.

175Patuoi tu sumanga’ku, anna pudiKomi; sia sangapaoi anna tunduina’ tu mintu’ atoramMi.

176Pusamo’ susi domba natampe solana, daka’i te taumMi; belanna tae’ angku kalupai tu mai pepasanMi.



 <<  Mazmur 119 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel