Mazmur 135 (TORAJA)

[VER] : [TORAJA] [PL] [PB]

<< Mazmur 135 >>

Lu lakona manna Puang Matua tu mintu’na kadipudian

1Haleluya! Pudimi tu sanganNa PUANG, pudimi, e mintu’ taunNa PUANG,

2tu kamu to tongkon lan banuanNa PUANG, lan tarampak banuanNa Kapenombanta.

3Pudimi tu PUANG, belanna iatu PUANG masokan, pakendekanni pa’pudian tu sanganNa, belanna mala’bi’ tu sanga iato.

4Belanna Napilean langsa’mo Kalena PUANG tu Yakub, sia Natonnoran bua kayumo tondon to batangNa tu Israel.

5Kuissan, kumua pasareongan tu PUANG, sia iatu Puangta untongloi mintu’ deata.

6Iami Naporai, iamo Napogau’, la dao langi’ la lan lino, la diong tasik ba’tu diong lu liku mandalan.

7Ia umpakendek damo’ dio randan langi’, sia umpaden kila’ situang uran, sia umpasun angin lan mai pa’palumpunanNa.

8Iamo mangka umpatei mintu’ anak pa’bunga’ dio Mesir, sae lako patuoan.

9Sia tu umpaden tanda kalle-kallean sia tanda mangnga lan tangngamu, e Mesir, lako kalena Firaun sia lako taunna.

10Iamo mangka ussabu’i ba’tu sangapa bangsa kapua, sia umpatei ba’tu pira-pira datu tarompo’:

11La Sihon, datu to Amori, la Og, datu Basan, sia mintu’ kadatuan dio Kanaan;

12tu umpa’ba’gian padangna tau iato mai la torro mana’, misa’ mana’ Naba’gian to Israel, taunNa.

13O PUANG, masae lako tu sangamMi, sia iatu kadiannamMi batu silambi’, o PUANG, landa’ lako disituran-turananni.

14Belanna la Nasanda-tonganni PUANG tu taunNa, sia la Nakaturu-turui tu orangNa.

15Iatu rapang-rapang dipodeatanna to kapere’ bulaan sia salaka digaraga, iamo panggaraga tolino.

16Tonganna den tu pudukna, apa tae’ anna ma’kada, den matanna, apa tae’ anna pakita.

17Den talinganna, apa tae’ anna parangi, sia tae’ duka penaa sun lan mai sadangna.

18Iatu to unggaragai to, la ten to apa iato, susi dukato tu to umposande’i.

19E mintu’ bati’na Israel, pudimi tu PUANG! E mintu’ bati’na Harun, pudimi tu PUANG!

20E mintu’ bati’na Lewi, pudimi tu PUANG! E kamu to ungkasiri’ PUANG, pudimi tu PUANG.

21Mintu’na kadipudian lan mai Sion lako PUANG, tu unnisungi Yerusalem! Haleluya!

<< Mazmur 135 >>

Bahan Renungan: SH - RH - ROC