Passambayang umpalakui dennoupa’ anna iatu datu, datu pasali rampa’
1Pa’pudianna Salomo. O Puang Matua ada’i katonganamMi tu datu, sia ada’i kamaloloamMi tu taruk bulaanna to kabarre-alloan.
2Anna tang pakayun bimbang umpaolai salunna tu taumMi, sia tang ussembe’ beko-beko to dipandasamMi.
3Sangapaoi anna mintu’ buntu, sia tanete duka umpabu’tu kamarampasan lako tau iato diona kamaloloan.
4Sangapaoi anna ussanda tonganni tu to dipandasa lan bangsa iato, sia urrampanan to mase-mase, anna lullu’ parapai tu to sala’ kedo.
5Sangapaoi anna mintu’i ussiosso’i ungkasiri’Komi, ke dellek siapi tu allo, sia ke parrang siapi tu bulan.
6Sangapaoi anna sitinti uran dilangi’ unta’pai padang dibela’i, sia sitinti uran umbanasa ussakka’i kuli’na padang.
7Sangapaoi, ke attunnami dako’, la maupa’ tu to malambu’, sia sebo tu kamarampasan sae lako pa’dena tu bulan.
8Sangapaoi anna ma’parenta umpasilamban-lamban tasik, sia umpasitarru’ Salu landa’ lako randan langi’.
9Sangapaoi anna mintu’ tu to torro dio padang pangallaran sae menomba dio olona, sia angganna ualinna la unnudung padang.
10Sangapaoi anna mintu’ datu Tarsis sia datunna tu mai lebukan la umpennoloan pamenganna, sia mintu’ datu Syeba sia Seba la umpakendek pa’kasianna.
11Sangapaoi anna mintu’ datu tukku sae rokko padang dio olona, sia angganna bangsa la mengkaola lako,
12belanna ia la ungkaduttu’ to mase-mase, tu mengkamoya, sia to mandasa sia to tae’ to patunduanna.
13Ia la ungkaturu-turui to bongko sia to mase-mase, sia la ungkarimmanni deatanna to mase-mase.
14Ia la ullendokan sunga’na tau iato mai dio mai kadipakario-rioan sia kadipandasan, sia iatu rarana tau iato mai kapua angga’na dio pentirona.
15Sangapaoi anna marendeng; anna pennoloanni tau lako tu bulaan dio mai Syeba. Sia tang ka’tu kapassambayangan, sia umpalakuanni kamauparan kiallo-kiallo.
16Sangapaoi anna untonda alanna tu gandung dio lu padang, sia anna lo’le-lo’le tu buanna dao lu mentanetena susi kayu dio Libanon, sia ia duka tu to ma’tondok marumbo butung riu dio lu padang.
17Sangapaoi anna tontong sae lakona tu sanganna, ondongpi, ke den siapi tu allo, la maupa’ tu sanganna. Tete dio kalena anna marudindin tu mintu’ bangsa, sia la nasanga kumua rongko’ ia.
18Mintu’na kadipudian lu langngan nasang PUANG Kapenomban, tu Kapenombanna Israel, Ia mannari ia tu umpogau’ penggauran kalle-kallean.
19Sia mintu’ kadipudian lu langngan nasang sanga mala’bi’Na tontong sae lakona, mintu’ nalili’ lino nasamboi kamala’biranNa. Amin, ya, amin.
20Sudunmo langngan lolokna tu pangandona Daud, anakna Isai.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel