Mazmur 73 (TORAJA)

[VER] : [TORAJA] [PL] [PB]

<< Mazmur 73 >>

SURA’ MA’PENTALLUNNA: (PA’PUDIAN 73–89) ;Ma’apari nakeupa’ to tang mekaaluk

1Pa’pudianna Asaf. Manassa tongan masokan tu Puang Matua lako to Israel, iamotu lako to bannang pute penaanna.

2Apa iatu aku te sidi’mora anna tisorong tu lentekku, sia kondemora angku tilende’.

3Belanna ungkemburuna’ to matampo, tongku tiroi tu upa’na to tang mekaaluk.

4Belanna tae’ namaparri’ len, sangadinna manaman bang tu kalena sia pore.

5Tae’ namandasa len susito senga’, sia tae’ anna rumbui parri’ susito senga’.

6Iamo bannangnato anna luangi kamatampoan tu barokona butung manik, sia umpengkalemu’ pa’pakario-rio ten to tamangkale:

7Lombon tu matanna napobua’ lompona, sia tarru’ ponno tangnga’ matampo tu penaanna.

8Tau iato mai ma’telle-telle sia malla’ penaanna umpokada pa’pakario-rio; sia madongnga’ ma’kada.

9Tau iato mai mematu-matu manna kadanna sae langngan langi’, sia iatu lengko lilana untapa’ mintu’ apa lan lino.

10Iamoto anna lu lako kalena tau iato mai tu taunNa Puang, anna satta’i namimmi’ tu uainna tau iato mai.

11Anna ma’kada nakua: Ma’apai anNa la unnissanni Puang Matua tu iannato? sia ma’apai anna la den paissanna tu To patodoranna?

12Tiromi, iamote tu a’ganna to tang mekaaluk, saurrangngan-rangnganninna iananna belanna manaman bang.

13Manassa tae’ gai’na tu penaa maputeku kukaritutui, sia umbasei limangku dio mai mintu’ kedo sala.

14Belanna kiallo-kiallo naruana’ parri’, sia iake melambi’ naruana’ peada’.

15Iake la lanni penaangku kumua: La ma’kada susina’ to, manassa ussolangina’ to tama bilangan bati’Mi’.

16Susito ma’tangnga-tangnga’mo’ la morai unnissanni, apa masu’sak duka kutangnga’.

17Sae lako tamana’ inan maindanNa Puang Matua, namane masero lan penaangku tu ma’katampakanna tau iato mai.

18Manassa Mipatete batu malangngo’ tu tau iato mai, sia Misumbanan anna songka tipa’ramu-ramu.

19Umba nakua tu tau iato mai narua kasanggangan metakuran lan sangkappidian mata, sappi, mangsan napobua’ apa pasanggangan:

20Sitinti to tindo ta’pa tang dikilalai, ke pana’dingmiki’, ten dukamoto, o Puang, Mipaboko’i penaa tu rupanna tau iato mai, ke pana’dingKomi.

21Iatonna mapalla penaangku, sia sikaro-karo tu ba’tengku.

22Attu iato bagana’ sia tang paissan, butungna’ olo’-olo’ tae’ inaanna dio oloMi.

23Apa tontongna’ mase’pon dio Kalemi, sia manda’ Mitoe tu lima kananku.

24Kamu la umpatudu lalanna’ tete dio pa’timbangamMi, naundinna to Mipatamana’ kamala’biran.

25Mindara kuposande’ dao suruga? Tae’ apa senga’ lan lino kuporai, sangadinna Kamu mannari.

26Moi anna sanggang tu batang kaleku sia ronta’ tu penaangku, apa Puang Matuari buntu batunna penaangku sia kupomana’ tontong sae lakona.

27Belanna mintu’ to untoyangammoKomi, manassa la sanggang, ondongpi, iatu to untampeKomi ma’baliara’ senga’ la Miroto’i.

28Apa iatu akunna melo aku tu mase’pon lako Puang Matua, iatu Puangku PUANG kupoperinding pala’, dikua angku pa’peissananni tu mintu’ penggauramMi.

<< Mazmur 73 >>

Bahan Renungan: SH - RH - ROC