Alkitab Mobile SABDA
[VER] : [TORAJA]     [PL]  [PB] 
 <<  Mazmur 77 >> 

Iatu penggauranNa Puang Matua te lendu’namo mepakatana ba’teng

1Lu lakona pangala sengo; lako Yedutun. Misa’ sengo pa’pudianna Asaf. (77-2) Meongli’na’ langngan Puang Matua sia mengkamoyana’, sia inang meongli’na langngan Puang Matua, sangapaoi Natanannina’ talinga.

2(77-3) Iatongku pussak undaka’mo’ Puang, sia ia duka kebongi tang mata’ka’na’ umpatado pala’ku, sia tang pakatana-tananna tu penaangku.

3(77-4) Ia angku kilalai tu Puang Matua urrantangmo’ sarro; ia angku ma’pasibuyu’-buyu’, rossomi tu penaangku. Sela

4(77-5) Kamumo tang umpasidullikna’ bulu mata, mangla’na’ sia tang tiku’bi’na’.

5(77-6) Kukilalaimi tu attu mangka diboko’, sia mintu’ taun malaunmo.

6(77-7) Sia ta’ka’ lan penaangku tu sengo pa’pudi-pudiangku ke bongi, ma’pasibuyu’-buyu’mo’ lan ba’tengku sia napelalan kumman penaangku, kumua:

7(77-8) Ma’apai anna la metampe tarru’ tu Puang, sia tang la mekaturu-turuimo?

8(77-9) Tae’ tarru’moraka tu kamasokananNa, sia sipapa’ bangraka ka’tu tu pangallu’Na?

9(77-10) Tang Nakilalaimoraka Puang Matua tu kamaturu-turuanNa, sia Natampunmoraka tu mamaseNa diona sengkeNa? Sela

10(77-11) Kukuami: Inde sia tu karossoangku, kumua iatu penggauran lima kananNa To patodoranna lelukmo.

11(77-12) La kukilalai tu mintu’ penggauranNa PUANG, ondongpi la kukilalai tu mintu’ penggauran kalle-kalleamMi to attu mangka diboko’.

12(77-13) Sia la untangnga’-tangnga’na’ lalan limamMi, sia la kutimbang-timbang tu penggauramMi.

13(77-14) O Puang Matua, iatu lalanMi naepun kamaseroan; mindara tu Kapenomban pada tande Puang Matua?

14(77-15) Kamumo tu Puang umpogau’ apa kalle-kallean, sia mangka Mipapayan tu kuasamMi dio lu mintu’ bangsa.

15(77-16) Tete dio lima matoto’Mi amMi lendokanni tu taumMi, Iamotu bati’na Yakub sola bati’na Yusuf. Sela

16(77-17) Iatu mintu’ uai natiromoKomi, o Puang Matua, sia mintu’ uai rumonting untiroKomi, sae duka lako uai mandalanna ma’parondo.

17(77-18) Iatu mai saliu’ umbarrakan uai, sia iatu langi’ gumalugu, sia iatu tinaranMi sipendelok-delokan.

18(77-19) Iatu oni guntu’Mi menanan, sia iatu kila’ unnarrang lino, na iatu lino rumonting sia tiseno.

19(77-20) Iatu lalanMi lan tasik, sia lan to’ uai buda, sia iatu lalan lentekMi tae’ napayanan.

20(77-21) Misolammo tu taumMi butung domba sia bembe’ ma’baanan. Lan lisu pala’na Musa sola Harun.



 <<  Mazmur 77 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran