Pangando malaku anna dipasule tama dandanna tu to Israel
1Lu lakona pangala sengo. Unturu’ baenan sengo bunga bakung. Kasa’bianna Asaf. Misa’ pa’pudian. (80-2) O Pangkambi’na to Israel, patananni tu talingamMi! Tu umpatudu lalan bati’na Yusuf butung domba, o Kamumo tu unnisungi karubion, patiarrangi tu rupamMi.
2(80-3) Angkarammi dio tingayona Efraim sia Benyamin na Manasye tu kalalongamMi, amMi mai ullendokangkan.
3(80-4) Pasulekanni, o Puang Matua, tama dandanki, paparrangi tu lindoMi, angki dilendokan.
4(80-5) O PUANG, Kapenombanna mintu’ ma’dandan maritik, sangapapira tu kasengkeamMi ungkanoka passambayangna taumMi?
5(80-6) Uai mata mannamo Mibenni napotuo, ondongpi uai mata mannamo Mipamosoanni nairu’.
6(80-7) Mitananmokanni napenggaronto’i kasigaganna bali lembangki, sia nasitelleikan mintu’ ualingki.
7(80-8) O Kapenombanna mintu’ ma’dandan maritik, pasulekanni tama dandanki, paparrangi tu lindoMi, angki dilendokan.
8(80-9) Mibuakmo sia Mipalengka’ tu sangto’ anggoro’ dio mai tana Mesir, ammi ula’i lao tu mintu’ bangsa, Mitananni tu kayu iato.
9(80-10) Mipalapparammo inan, naurunganni mennuaka’ melo sia ussitutu’i padang.
10(80-11) Mintu’ duka buntu naonganni ongan-onganna, sia mintu’ tangkena ungkapu’ kayu arasi’ sangbara’ padang.
11(80-12) Napopendolok tu mai tangkena sae tama tasik, sia mintu’ lolona sae tama Salu.
12(80-13) Ma’apari amMi lo’po’ri tu tembo’na, naurunganni minda-minda lendu’ inde to lalan iato napeloloi bang.
13(80-14) Napepuraimo bai lampung, sia angganna olo’-olo’ dio lu padang pura ungkandei.
14(80-15) O Kapenombanna mintu’ ma’dandan maritik, suleKomi. Tiro lumbangi dao mai suruga, sia penunui, sia parinaai te mintu’ garonto’ anggoro’.
15(80-16) Tu pa’tado’ natanan lima kananMi, iamotu muane, Mipeloboran Kalemi.
16(80-17) Iatu kayu iato diballa butung rompon; sia mintu’ tau iato sabu’mo diona kaumpalessekamMi matamMi.
17(80-18) Rondongi limamMi tu to diona kananMi, iamotu to Mipeloboran Kalemi.
18(80-19) Iake susito, tae’mo angki la balik dio mai Kalemi, patuokanni angki meongli’ ussa’bu’ sangamMi.
19(80-20) O PUANG Kapenombanna mintu’ ma’dandan maritik, pasulekanni, melo ke parrangi tu rupamMi, angki dilendokan.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan