Tang tontongraka pangallu’Na Puang Matua lako Daud?
1Misa’ gelong bangunan ada’na Etan, to Ezrahi. (89-2) La tontongna’ sae lakona umpopenanian tanda mamaseNa PUANG, sia iatu kamarurusamMi napa’peissanan tongka’ dililaku landa’ lako disituran-turananni.
2(89-3) Belanna susimoto tu kadangku: Iatu kamasokanan tontong bang dibangun, iatu kamarurusamMi ten langi’ tang tiberu.
3(89-4) Nakua kadamMi: MangkaMo’ sibasse to Kupilei langsa’, sia basse Kupaallonni sumpa lako Daud, taungKu:
4(89-5) Tang la Kuparoto’ tu bati’mu sae lakona, sia la Kubangun tu kambuno kapayungammu landa’ lako disituran-turananni. Sela
5(89-6) Iamoto anna mintu’ tu daona langi’ umpudi penggauran kalle-kalleamMi, o PUANG, sia kamarurusamMi dipudi lan kombonganna to masallo’.
6(89-7) Belanna mindara lan ba’tangna langi’ tu ma’din la dipasitenderan PUANG? Sia mindara tu mai disanga pekapuangan tu la sitinti batunna PUANG?
7(89-8) Iamotu Kapenomban metakuran tongan lan tinimbunna to masallo’, sia lendu’ nakataku’na mintu’ to untalimbungi.
8(89-9) O PUANG, Kapenombanna mintu’ ma’dandan maritik, mindara tu sumpu kuasa susi Kamu, o PUANG? Iatu kamarurusamMi untalimbung tamaKomi.
9(89-10) Kamumo tu umparenta mariakna tasik, Iake umbassan lenni tu bombangna, Kamuri tu umparadanni.
10(89-11) Mangkamo Miratoi tu Rahab butung to dipatei, sia mangka Mipasisarak-sarak lima mawatangMi tu ualimMi.
11(89-12) Kamumo puangna langi’ sia Kamu duka puangna lipu daenan; iatu lino sola mintu’ issinna, Kamumo unnotonni tu parandanganna.
12(89-13) Iatu ulunna salu kalua’ sola pollo’na uai Kamu umpadenni: Iatu buntu Tabor sola Hermon mela’tek tete dio sangamMi.
13(89-14) Kamumo tu ma’takia’ bassi. Mawatang tu limamMi, sia matande tu lima kananMi.
14(89-15) Iatu kamaloloan sia tang pakayun bimbang iamo parandanganna isungan kapayungamMi, na iatu kamasokanan sia kamarurusan dolo dio oloMi.
15(89-16) Maupa’ tu bangsa unnissanNi mela’tek tanda kasendean, tau iato mai lolang naarrangi rupamMi, o PUANG;
16(89-17) Tu belanna sangamMi anna mela’tek tu tau iato mai kiallo-kiallo, sia tete dio kamaloloamMi anna dipamatande.
17(89-18) Belanna Kamuri tu napomala’bi’ kamatotoranna, sia diona kamasorokamMi amMi pataranggai tu tandukki.
18(89-19) Belanna iatu balulangki lu dio mai PUANG, sia iatu datungki lu dio mai To maserona to Israel.
19(89-20) Tonna attu iato ma’kadamoKomi lako to masallo’Mi lan patiro mendeata, susite: Mangkamo Kulampakan pa’tunduan tu misa’ lalong, sia Kupamatandemo tu misa’ to dipilei langsa’ lan mai bangsa iato.
20(89-21) Kuappa’mo tu Daud, taungKu, sia Kutokko minna’ maseroKu.
21(89-22) Natontong ussande’i limangKu, sia anna pabantang takia’Ku:
22(89-23) Tae’ anna la ullaoi uali, sia tae’ anna la umpandasai to bulituk.
23(89-24) Sangadinna la Kupipping tu ualinna dio olona, sia la Kutalo tu mai to ungkabiri’i.
24(89-25) La narondong kamarurusangKu sia kamasokanangKu, sia tete dio sangangKu anna dipatarangga tu tandukna:
25(89-26) La Kupaalai limanna tu tasik, sia lima kananna tu mai minanga.
26(89-27) La ma’kada lako Kaleku kumua: Kamumo tu Ambe’ku, Kapenombangku sia buntu batu kasalamarangku.
27(89-28) La Kupatongkon anak pa’bunga’ duka, untongloi mintu’ datu lan te lino.
28(89-29) La Kukaduttu’ tu kamasokanangKu lako kalena tontong sae lakona, sia iatu basseKu sola tang la tileluk:
29(89-30) La Kupamasae lako tu tarukna, sia iatu kambuno kapayunganna sipuli langi’.
30(89-31) Iake naboko’i bati’na tu Sukaran alukKu, sia tae’ anna karitutui tu atorangKu,
31(89-32) Iake natengkai tu Kupondokna, sia tae’ nakaritutui tu pepasanKu.
32(89-33) Manassa la Kupapakkanni pebamba tu salana, sia la Kupapakkanni parri’ tu kakadakeanna.
33(89-34) Apa tae’ angKu tang umbenni kamasokanangKu, sia iatu kamarurusangKu tae’ angKu la urriu’ sulei.
34(89-35) Tae’ angKu la umpamatuna basseKu, sia tae’ angKu sondai tu kada sunmo dio randan pudukKu.
35(89-36) PissanKu umposumpa kamaseroangKu: Tae’ Kula ungkamorangi len Daud!
36(89-37) La tontong masae lako tu tarukna, sia iatu kambuno kapayunganna butung matanna allo dio oloKu.
37(89-38) La tulangdan tang tiberu tontong sae lakona butung bulan, sia iatu sa’bi dao langi’ tang leluk. Sela
38(89-39) Moi anna susito, mangkamo Misuale sia tang Mibilangmo, sia sengkemoKomi lako to Mitokko.
39(89-40) Mangkamo Mipoka tu basseMi sola taumMi, sia Mipamatunamo tu makotana naurunganni ronno’ sala rokko padang.
40(89-41) Mintu’ benteng batunna Misaeran, sia mintu’ tambakukunna Misanggang.
41(89-42) Mintu’ to unnolai lalan iato, umpangrampai, sia kadibelleran lako sangbanuanna:
42(89-43) Mipamatandemo tu lima kananna balinna, sia Mipasendemo tu mintu’ ualinna.
43(89-44) Sia Mipatibalikmo tu mata la’bo’na lako kalena, sia tang Mieloran parrang lan tananan ra’.
44(89-45) Mipapa’demo tu arrangna, sia Misongkan rokko padang tu isunganna.
45(89-46) Mipamadoi’ bangmo matua, sia Mipakabu’imo siri’. Sela
46(89-47) O PUANG, sangapapoKomi la tontong bang membuni, sia sangapapi la dukku susi api tu kasengkeamMi?
47(89-48) Kilalai kumua tumba madenge’na tu sunga’ku, tumba torro salana tu kaungkombongamMi rupa tau?
48(89-49) Mindara tu tolino tang sitiro kamatean, sia ma’din urrampanan kalena, dio mai kuasanna lino to mate? Sela
49(89-50) O Puang, umbamira tu mintu’ kamasokanamMi pirambongi’, tu mangka Mialluran Daud, Mipasiindo’ sumpa diona kamarurusamMi?
50(89-51) O Puang, kilalai tu mintu’ napomatunanna tu mai taumMi, tumba ia kupatarinna lan ba’tengku (tu pebe’se) dio mai mintu’ bangsa kapua.
51(89-52) Iamotu pa’be’sena mintu’ ualimMi, o PUANG, tu umbe’se mintu’ tengkana to Mitokko!
52(89-53) Mintu’na kadipudian lu lako nasang PUANG tontong sae lakona! Amin, ya amin.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel