1Ma’kadami tu PUANG lako kaleku Nakua: Pa’ranni kalemu te da’dua papan batu susi tu dolona, mukendek langngan buntu umpellambi’iNa’, sia garagangko kalemu misa’ patti kayu.
2Angku sura’i dao papan iato tu mintu’ kada, tu tisura’ dao papan dolo, tu mangka mutesse, ammu palanni patti iato.
3Kugaragaimi misa’ patti kayu simmin, angku pa’i tu da’dua papan batu, susitu dolona. Attu iato kendekmo’ langngan buntu sitangke tu da’dua papan batu.
4Nasura’mi Puang dao papan iato situru’ passura’ dolona, tu Sangpulo Kada, tu mangka Napokada PUANG lako kalemi dao buntu lan mai tangnga to’ api tonna allo kasirampunan.
5Pakalan tibalikmo’ sule, angku mengkalao dao mai buntu, sia Kupatorro tu da’dua papan lan patti, tu kugaragai, anna torro dio, susitu mangka Napepasanan PUANG lako kaleku.
6Ke’de’mi tu to Israel dio mai Beerot Bene-Yaakan lako Mosera. Indemoto nanii mate tu Harun sia inde to dinii ullamunni, anna iatu Eleazar, anakna, iamo ussondai to minaa.
7Inde to dio mai ke’de’mi lako Gudgod, nadio mai Gudgod lako Yotbata, tu lili’ nanii buda salu’-salu’.
8Attu iato Napamarimbangan PUANG tu suku Lewi, kumua anna bullei tu patti basseNa PUANG, sia tau iato la bendan dio oloNa PUANG la umpengkaolai sia la ma’passakke tete dio sanganNa sae lako allo iate.
9Iamoto iatu suku Lewi tae’ naappa’i tu napoapanna sia taa mana’na sola siulu’na, belanna iatu PUANG. Iamo taa mana’na, susitu mangka Napokadanni PUANG, Kapenombammu.
10Bendanna’ dao buntu susitu dolona patangpulo allona patangpulo bonginna, sia ia duka te attu iate Naperangiina’ PUANG, anna tae’ Namorai PUANG ussanggangko.
11Ma’kadami tu PUANG lako kaleku Nakua: Ke’de’ko, ammu male undoloanni tu bangsa iato, anna tama tu tondok sia la naala napoapai, tu mangka Kualluran nene’ to dolona Kupalaoi sumpa, kumua la Kukamasean tau iato.
Pa’pakilala diona ma’kurre sumanga’ sia menturu’
12E to Israel, apara Natuntun PUANG, Kapenombammu, dio mai kalemu, sangadinna la mukasiri’ tu PUANG, Kapenombammu, unturu’i tu mintu’ lalanNa, sia la mukamali’, sia ponno penaammu sia kalebu deatammu umpenombai tu PUANG, Kapenombammu,
13sia ungkaritutui tu pepasan sia aluk Napondok PUANG, tu kupapassanangko allo iate, kumua mumalaga’-laga’.
14Manassa iatu PUANG Kapenombammu, Iamo Puangna langi’, ondongpi ma’iringanna langi’ dao, sia lino sia mintu’ apa lan.
15Sangadinna ia manna tu nene’ to dolomu Naala penaanNa PUANG sia ia manna tu tau iato Nakamasei, sia kamu, tu bati’na, Natonno’ dio mai mintu’ bangsa, susitu a’ganna allo iate.
16Iamoto sunna’i tu kuli’ penaammi sia damo mimatoro.
17Belanna iatu PUANG, Kapenombammi, Iamo Puang Matua undaoanni mintu’ deata sia Puangna mintu’ puang, iamotu Kapenomban pasareongan sia mawatang sia metakuran, tu tang umpelindo rupa tau sia tang untarima pamengan,
18tu untonganan kara-karana pia biung sia baine balu sia umpa’petiroan kamamasean lako to sae, ke Nabenni roti sia pakean.
19Iamoto la mikamasei tu to sae, belanna iatu kamu mangkamokomi to sae lan tondok Mesir.
20La mukataku’ tu PUANG Kapenombammu, sia la mupengkaolai sia la’ka’ko lako sia umpalaoko sumpa tete dio sanganNa.
21Puang Iamo kadipudiammu sia Puang Iamo Kapenombammu, tu mangka umpogaurangko te mai apa tarompo’ sia metakuran tu mutiro kalena.
22Den pitung pulo tau, tonna ke’de’ tu nene’ to dolomu lako Mesir, na totemo Napopemba’ka’moko PUANG, Kapenombammu, susito bintoen dao langi’.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel