Ma’rupa-rupa pa’pote dibolong dipa’gagai
1Kamumo tu anakNa PUANG, Kapenombammi; da mitori’-tori’i tu kalemi, ba’tu miku’ku’i tu beluakmi dio kidemi belanna kamatean.
2Belanna iatu iko misa’ bangsa masero dio PUANG, Kapenombammu, sia iatu iko Natonno’ko PUANG kumua ammu dadi bangsa marimbanganNa Puang dio mai mintu’ bangsa, tu untorroi kuli’na padang.
Diona olo’-olo’ masero sia olo’-olo’ maruttak
3Da mukande len moi misa’ apa megallian.
4Inde sia tu olo’-olo’ ma’din mikande iamotu sapi, domba sia bembe’,
5donga, kijang, anuang, bembe’ lampung, tangali, sapi laki lampung sia domba lampung.
6Mintu’ olo’-olo’ tu ma’kasapak kalungkungna – iamotu tipa’dua kalungkungna – sia lenga’ dio lu olo’-olo’, iamoto tu ma’din mikande.
7Apa inde sia tu olo’-olo’ lenga’ ba’tu tipa’dua kalungkungna tae’ nama’din la mikande, iamotu unta, kalinti sia kalinti to’ batu, belanna moi anna lenga’, apa tae’ natipa’dua tu kalungkungna; manassa la maruttak to lako kalemi.
8Sia ia duka tu bai, belanna moi natipa’dua tu kalungkungna, apa tae’ nalenga’; maruttak to lako kalemi. Iatu duku’na tae’ mila ungkandei sia da mikaka’i tu batang rabukna.
9Inde sia tu ma’din mikande tu mintu’ apa kepenaa diong to’ uai, iamotu mintu’ apa kekaa-kaa sia kesissik, ma’din mikande to,
10apa da mikandei tu tae’na nakekaa-kaa, ba’tu kesissik; maruttak to lako kalemi.
11Mintu’ manuk-manuk masero ma’din mikande.
12Apa inde sia tu tae’ mima’din la ungkandei, iamotu langkan maega, langkan, sia langkan tasik,
13tengnge’, pa’bulan sia mintu’ kadoya sanda rupanna;
14kadoya kapua sanda rupanna;
15burung unta, totosik, manuk-manuk tasik sia mintu’ tarru’ sanda rupanna;
16langau to’ batu, langau sia langau mabusa;
17kayo, alo sia koro’-koro’;
18tambolang ballau sia mintu’ tambolang sanda rupanna, dora’ na ledo.
19Sia ia duka tu mintu’ olo’-olo’ pandiu, tu kepani’ – iamoto tu maruttak lako kalemi, tae’ nama’din dikande.
20Iatu mintu’ manuk-manuk masero ma’din mikande.
21Da mikande batang rabuk; ma’din mupakandean to sae, tu torro lan babangan kotamu, ba’tu ma’din mubaluk lako to salian bangsa, belanna ikomo tu misa’ bangsa tu masero lako PUANG, Kapenombammu. Da mutollo’i tu anak bembe’ laki lan to’ pangandu’na indo’na.
Diona taa sangpulona
22Iatu mintu’ bura padang, tu muambo’, dio pa’lakmu, ke taunoi, la mupennoloan tu taa sangpulona.
23La mukande dio oloNa PUANG, Kapenombammu lan inan tu Napilei, la Napannii sanganNa, tu taa sangpulona bura padangmu, uai anggoro’ ba’rummu sia minna’mu, sia anak pa’bunga’na sapimmu sia anak pa’bunga’na dombamu sia bembe’mu, kumua ammu pelada’i ungkataku’ PUANG, Kapenombammu, lan mintu’ allo katuoammu.
24Iake tarru’ mambelai tu lalan muolai, muurungan tae’ mukullei umbaai tu iannato, belanna iatu inan tu Natonno’ PUANG, Kapenombammu, la Napannii sanganNa, mambela tongan dio mai kalemu, ke Napamasakkeko PUANG, Kapenombammu,
25manassa la mubalukan bang, na iatu doi’ allinna la mubaa, ammu male lako inan, tu la Natonno’ PUANG, Kapenombammu.
26Sia iatu doi’ iato la muallian mintu’ apa muporai, iamotu sapi ba’tu domba sia bembe’ ba’tu uai anggoro’ ba’tu pangiru’ mepamalango, ba’tu iatu apa muporai, sia la kumandeko inde to dio, dio oloNa PUANG, Kapenombammu, sia parannu-rannuko, la iko la iatu mai to lan banuammu.
27Ia duka tu to Lewi, tu torro lan babangan kotamu, tae’ ammu la ussa’bianganni, belanna tae’ apa mipoapa ba’tu mipotaa mana’ sola.
28Iake upu’mi sitallung taun la mubaa tu mintu’ taa sangpulona tu bura padangmu lan taun iato, ammu patorroi lan to’ babanganmu.
29Attu iato la sae tu to Lewi, belanna tae’ apa mipoapa sia mipotaa mana’ sola sia iatu to sae sia pia biung sia baine balu, to torro lan babangan kotamu, la kumande sadia’na – anNa pamasakkeko PUANG, Kapenombammu, lan mintu’ pengkarangan, tu mukarang.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel