Taana to minaa sia to Lewi
1Iatu to minaa to Lewi, iamotu mintu’ suku Lewi, tae’ apa napoapa ba’tu napotaa mana’ sola to Israel; la nakande tu taana dio mai pemala’ pantunu dipemalaran lako PUANG sia dio mai taa mana’na Puang,
2apa dio lu siulu’na tae’ taa mana’na, belanna PUANG tu taa mana’na, susitu mangka Naalluranni Puang.
3Iamote tu taana la napotaa to minaa dio mai pa’tondokan, iamotu dio mai to umpennoloan pemala’ pangrere’, la sapi la domba sia bembe’. Manassa la napa’bengan tau lako to minaa tu pesesena, popona patomali sia tumabangna.
4Iatu bua bunga’na gandungmu, sia uai anggoro’ ba’rummu sia minna’mu sia bunga’ bulu dombamu, la musorong nasang lako.
5Belanna iatu PUANG, Kapenombammu, umpilei lan mai mintu’ sukummu, kumua anna tunannang dio oloNa PUANG, untoe kamenomban tete dio sanganNa, la ia la iatu mai anakna muane, tontong kiallo-kiallo.
6Iake tassu’i tu to Lewi dio mai sala umbanna kotamu lan mintu’ Israel, tu nanii umpatuo rambu, sia male unturu’ lalan inaanna lako inan, tu la Napilei PUANG,
7sia untoe kamenomban tete dio sanganNa PUANG, Kapenombanna sia mintu’ siulu’na, to Lewi, tu tunannang dio inan iato dio olona PUANG,
8iamoto la napotaa pada taana tu tau dio, tae’ nadipasibilang tu taana dio mai ambe’na, tu mangka nabalukan.
Diona kapakita-kitan sia pa’nubua’
9Iake rampomoko tama tondok, tu la Nabenko PUANG, Kapenombammu, da mupelada’i unturu’ gau’ megallianna tu bangsa iato.
10Da naden misa’ tau dio lu kamu diapparan tu umpatama to’ api tu mai anakna muane ba’tu anakna baine tu umpogau’ kapakita-kitan, to ma’biangi, to umbattuananni tanda, ba’tu to unnampui balik mata,
11to ma’basa-basa, da naden to sola-sola bombo, ba’tu sola-sola deata ba’tu umpalaku pa’pentimbangan lako to mate.
12Belanna minda-minda umpogau’i tu apa iate, iamo misa’ to Nakagalli PUANG, sia diona te kamagallian iate, Napobannang PUANG, Kapenombammu, unnula’i tu tau iato mai dio mai tingayomu.
13La tang sayuan tu gau’mu dio oloNa PUANG, Kapenombammu.
14Belanna iate bangsa iate, tu la muula’i, umperangii to ma’biangi sia to pakita-kita, apa lako kalemu tae’ Naeloranni PUANG, Kapenombammu.
15La Napabu’tuangko PUANG, Kapenombammu, tu misa’ nabi dio lu kamu dio mai siulu’mu, susite aku; lako kalena la minii ma’perangi.
16Manassa susitu mangka mupalaku lako PUANG, Kapenombammu, dao Horeb, tonna allo kasirampunan, tu munii ma’kada mukua: Tae’mo kula urrangi gamaranNa PUANG, Kapenombangku, sia tae’mo kula untiroi tu api kapua iate, da kumate.
17Attu iato ma’kada tu PUANG lako kaleku, Nakua: Melo tu apa mangka napokada tau iato mai.
18La Kupabendanan misa’ nabi tu tau iato dio mai mintu’ siulu’na, susitu iko; la Kupadio pudukna tu kadangKu, sia la napokadan nasang tu apa Kupepasanan.
19Minda-minda tae’ naperangii tu mintu’ kada, tu la napokada tete dio sangangKu, manassa la Kupa’tuntunni tu tanggunganna.
20Apa iake den misa’ nabi umpamadao penaanna la umpokada misa’ kada tete dio sangangKu, tu tang Kusua umpokadai, ba’tu ma’kada tete dio sanganna kapenomban senga’ – manassa nabi iato la mate.
21Iake ma’kadako lan penaammu, kumua: Umbara kikua untandai kada, tu tang Napokada PUANGs-
22Iake ma’kadai tu misa’ nabi tete dio sanganNa PUANG, anna tae’ nadipalanda’ tu kadanna sia tae’ nabuai, manassa apa iato misa’ kada tang Napokada PUANG. Matampo penaanna tu nabi iato, anna pokadai tu iannato, da mukataku’i tu nabi iato.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel