1Undinnato tibalikmoki’ anta ke’de’ lako padang pangallaran, ma’palulako tasik Teberau, susitu Napokada PUANG lako kaleku; ba’tu sangapa-apa allona tanii ullilingi tu ma’buntunna Seir.
2Pakalan ma’kadami tu PUANG lako kaleku, Nakua:
3Ganna’mo to tu minii ullilingi te ma’buntunna, la tibalikkomi ma’pa-lurekke.
4Pasanni tu bangsa iate, kumua: Totemo malekomi ullendu’i tu lili’ tondokna siulu’mi, bati’na Esau, tu umpa’tondokki Seir; manassa la nakataku’komi tau iato; kanandaikomi kalemi.
5Da mirosoi, belanna iatu padangna tae’ Kula umbenkomi moi sangpellesean, belanna Kubenmo Esau tu ma’buntunna Seir la napoapa.
6Iatu kande la mialli lako tau iato mai mimane ungkandei; ia duka tu uai la miiru’ la mialli lako.
7Belanna iatu PUANG, Kapenombammi, umpamasakkemoko lan mintu’ pengkarangammu. Natandaimo tu kalingkammu ullendu’i padang pangallaran kapua iate; lan te patangpulomo taunna Nanii PUANG, Kapenombammu urrondongki, moi misa’ apa tae’ mukakurangan.
8Iamoto tatarru’ male, anta toyang dio mai siulu’ta, tu bati’na Esau, tu umpa’tondokki Seir, tassu’ dio mai Araba-Yordan, iamotu dio mai Elat sia Ezion-Geber. Tamane tibalik ma’palulako padang pangallaran Moab.
9Attu iato ma’kadami tu PUANG lako kaleku, Nakua: Da mupamasussai tu to Moab sia da murosoi la sirari, belanna iatu padangna tae’ Kula umbenko mupoapa, belanna mangkamo Kuben Ar lako bati’na Lot, anna poapai.
10– Iatu to Emim iamo umpa’tondokki dolona tu tondok iato, misa’ bangsa kapua sia marapuan, malangka’ susito Enak.
11Ia duka tu tau iato disanga to Refaim, susito Enak, apa nasangai to Moab tu tau iato to Emim.
12Sia dio Seir napa’tondokki to Hori dolona, apa naalamo bati’na Esau tu lili’na napoapai sia naula’i anna sanggangi sia napa’tondokki tu inanna, susitu napogau’ to Israel diona tondok, tu Napa’benganmo PUANG lako kalena la napoapa.
13Ke’de’mokomi totemo ammi lambanni tu salu’-salu’ Zered. Attu iato take’de’ ullamban salu’-salu’ Zered.
14Iatu attu tanii ma’lingka dio mai Kadesh-Barnea sae lako ullambanni salu’-salu’ Zered, den tallungpulo ngkarua taunna – sae lako pura mate mintu’ te bati’ iate, iamotu mintu’ surodadu dio to’ tenda, susitu PUANG mangka umpalao sumpa lako kalena.
15Ondongpi limanNa duka PUANG mangka ullaoi la ussabui’ lan mai to’ tenda sae lako pura mate.
16Iatonna matemo tu mintu’ surodadu dio mai bangsa iato,
17ma’kadami tu PUANG lako kaleku, Nakua:
18Totemo la maleko unnupu’ lili’na Moab, iamotu Ar,
19ammu rampo sikandappi’ to Amon; da mupamasussai tau iato sia da murosoi, belanna iatu tondokna to Amon, moi sangbidang tae’ Kula umbenko, belanna Kusorongmo lako bati’na Lot la napoapa.
20Ia duka te tondok iate disanga tondok to Refaim, tu nanii ma’tondok to Refaim dolona, apa nasangai to Amon tu tau iato to Zamzumim,
21misa’ bangsa kapua sia marapuan, malangka’ susito Enak, apa Naula’mo PUANG sia Nasanggang tu tau iato, naurungan naalamo to Amon tu lili’na napoapai, anna ma’tondok dio ussondai tu tau iato;
22susitu mangka Napogau’ Puang lako bati’na Esau, tu umpa’tondokki Seir. Mangka Naula’i sia Nasanggang Puang tu to Hori dio tingayona tau iato, naurungan naalamo bati’na Esau tu lili’na napoapai, anna ma’tondok dio ussondai tu tau iato sae lako allo iate.
23Iatu to Kaftor, tu sae dio mai Kaftor, ussanggangmo to Awi, tu ma’kampong sae lako Gaza, anna ma’tondok dio ussondai tu tau iato.
24Ke’de’mokomi ammi male ullamban salu’-salu’ Arnon. Manassa Kusorong tu Sihon, datunna Hesbon, to Amori, sia tondokna tama kuasammu; la muparanduk unnalai sia urrosoi la sirari.
25Allo iate Kuparandukki umparampoi katirambanan sia kamatakuran tu mintu’ bangsa nasambo langi’, anna kataku’komi, naurungan ma’parondo sia ma’pagu’gu’ ungkataku’komi, ke narangimi tu kareba diona kamu.
26Mangkato kusua tu sumbungan puduk dio mai padang pangallaran Kedemot lako Sihon, datunna Hesbon, umparampo kada marampa’, kumua:
27Eloranna’ ullendu’i tondokmi; la unturu’ bangna’ batatta, tang sepang kanan ba’tu kairi.
28Iatu kande la kikande la mibalukan lako kaleki sia iatu uai la kiiru’ la mibenkan kialli; eloranna’ ma’lingka ullendu’i tondokmi,
29susitu bati’na Esau, tu umpa’tondokki Seir, unneloranna’ sia iatu to Moab tu umpa’tondokki Ar – sae lako kulambanna tu Yordan lako tondok, tu la Nabenkan PUANG, Kapenombangki.
30Apa iatu Sihon, datunna Hesbon, tae’ naelorangkan ullendu’i lili’na, belanna PUANG, Kapenombammu umpamakarra’i tu penaanna sia umpabattuk ba’tengna, kumua anNa sorongi tama kuasammu, susitu a’ganna totemo.
31Ma’kadami tu PUANG lako kaleku, Nakua: Manassa la Kuparanduk ussorongi tu Sihon sola tondokna lako kalemu; la muparanduk untaloi tu tondokna, ammu alai mupoapa.
32Tassu’mi umpessitammuiki’, la ia la to budanna, la sirari dio Yahas.
33Apa iatu PUANG, Kapenombanta, ussorongi lako kaleta, taurungan untaloi sola tu mai anakna sia mintu’ bangsana.
34Attu iato taalamo tu mintu’ kotana, anta sabu’i mintu’ kota, la muane, la baine, la pia; moi misa’ tae’ tapalussu’.
35Sangadinna iatu patuoanna tarampan kaleta, susi duka tu pangrampa lan mai kota, tu mangka taala.
36Randuk dio mai Aroër, dio biringna salu’-salu’ Arnon, sia kota diong lombok, sae lako Gilead, moi misa’ tae’ kota tu tang la takulle untaloi. Iatu PUANG, Kapenombanta, Nasorong nasangmo lako kaleta tu mintu’nato.
37Ia manna tang mureke’ tu tondok to Amon; sae lako mintu’ biringna salu’-salu’ Yabok, ba’tu lako mintu’ kota dao ma’buntunna, ba’tu lako misa’ inan, tu Nanii PUANG, Kapenombanta, unggagaiki’.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel