Diona tu tau tae’ nama’din tama kombonganNa PUANG
1Iatu to sanggangmo kamuaneanna, ba’tu to dibalianni, tae’ nama’din tama kombonganNa PUANG.
2Iatu to nadadian to sikande rara, tae’ nama’din tama kombonganNa PUANG; moi sae lako osso’ ma’pessangpulo tae’ nama’din tama kombonganNa PUANG.
3Iatu to Amon ba’tu to Moab tae’ nama’din tama kombonganNa PUANG; moi sae lako osso’ ma’pessangpulo tae’ nama’din len tama kombonganNa PUANG,
4belanna iatommi tassu’ lan mai Mesir, tae’ natammuangkomi roti sia uai dio lalan sia belanna nasaroi tu Bileam, anakna Beor, dio mai Petor lan Aram-Mesopotamia umbaliko sia untampakkiko ropu.
5Sangadinna iatu PUANG, Kapenombammu, tae’ Namorai umperangii Bileam sia iatu PUANG, Kapenombammu, umpopembali pa’passakkei tu tampak ropu, belanna iatu PUANG, Kapenombammu, ungkamaseiko.
6Tempon tuomu da mudakaran lenni kamarampasan sia kameloan tu tau iato mai.
7Iatu to Edom da mukagi’gi’i, belanna iamo siulu’mu. Iatu to Mesir da mukagi’gi’i, belanna to saemoko lan tondokna.
8Iatu bati’na, tu osso’ ma’pentallunna, tu nadadian, ma’din tama kombonganNa PUANG.
Kamaseroanna to’ tenda
9Iake tassu’ko messurodadu urrarii ualimmu, la ungkanandaiko kalemu dio mai mintu’ apa kadake.
10Iake den misisolan misa’ muane, tu tae’ namasero napobua’ apa urrampoi ke bongi, manassa la male tassu’ dio mai to’ tenda, tae’ nala tama to’ tenda sule.
11La membase tu tau iato, ke la mabongimi, sia lambunmi allo ma’dinmo tama to’ tenda.
12La den inanmu dio salian to’ tenda, tu munii lao ma’to’kayu.
13Iatu mai oonganmu la muampui misa’ pesodok, sia iake unno’ko’ko ma’to’kayu, iamoto la mubo’bokan patuang, mumane ussamboi tu kadakemu.
14Belanna iatu PUANG, Kapenombammu, ussalongi to’ tendamu, la urrampanangko dio mai kamandasan, anNa sorongi tu ualimmu lako kalemu; iamoto la masero tu to’ tendamu, kumua da Natiro lenni tu apa tang sipatu dio kalemu sia da Nasepang tu Puang dio mai kalemu.
La den kamamaseanta lako misa’ kaunan mallai dio mai puangna
15Da musorongi tu misa’ kaunan lako puangna, tu mallai dio mai puangna lako kalemu.
16Ma’din torro dio kalemu misisolan umba-umba naporai, lan misa’ kotamu, umba tu naala penaanna; da mumakarra’ bang lako.
Digagai ma’gau’ sala dio to’ dipa’deatainna
17Dio lu baine to Israel tae’ nama’din den tu baine ma’gau’ sala dio to’ dipa’deatainna, sia dio lu muane to Israel tae’ duka nama’din den tu muane ma’gau’ sala dio to’ dipa’deatainna.
18Da mubaai tama banuanNa PUANG, Kapenombammu, tu saro killangan dodo ba’tu saro pa’gau’ asu, la umpalanda’ misa’ pangallonan, belanna iate da’dua gau’ misa’ apa Nakagalli PUANG, Kapenombammu.
Da muala denne’ dio mai sangbangsamu
19Da muala denne’ dio mai sangmuanemu, la diona pa’pedenne’ doi’ la kande ba’tu apa-apa tu dipa’pedenneran.
20Dio mai to salian bangsa ma’dinko unnala denne’, apa dio mai sangmuanemu tae’ muma’din unnala denne’, – anNa pamasakkeko PUANG, Kapenombammu, lan mintu’ pentoeammu lan tondok tu la muala mupoapa.
Diona pangallonan
21Iake mangallonangko lako PUANG, Kapenombammu, da mumarempa umpalanda’i, belanna iatu PUANG, Kapenombammu, inang Natuntunko kumua la mupalanda’, sia manassa kasalangko.
22Apa, iake tae’ len mumangallonan, tae’ mukasalan.
23Iatu apa tassu’mo dio pudukmu, la mupalanda’ tongan, belanna lalan penaammu tonganmo mangallonan lako PUANG, Kapenombammu, tu mangkamo nasa’bu’ pudukmu.
Mebua anggoro’ sia ungkalette’ gandung dio pa’lakna tau
24Iake tamako pa’lak anggoro’na solamu, ma’din mukande sadia’mu tu buanna sanamosomu, apa tae’ muma’din umpatamai pa’panniammu.
25Iake tamako pa’lak gandungna solamu, tu maririmo, ma’din mukalette’, apa da muka’ta’i pesae’ tu gandungna solamu, tu maririmo.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel