Atoran ussorong bua bungaran
1Iake tamako tondok, tu la Nabenko PUANG, Kapenombammu, la mupotaa mana’, sia muala la mupoapa sia munii ma’tondok,
2manassa la muala dio mai bunga’na mintu’ bura padang, tu murampun dio mai padang, tu la Nabenko PUANG, Kapenombammu, sia la mupatama baka, mumale lako inan tu la Napilei PUANG, Kapenombammu, la umpannii sanganNa dio.
3Iake rampomoko lako to minaa tu den attu iato, la ma’kadako lako mukua: Umpa’peissananna’ totemo lako PUANG, Kapenombammi, kumua rampomo’ lan tondok, tu Napalaoan sumpa PUANG unnallu’i lako nene’ to dolota, kumua manassa la Nabenki’.
4La natarima to minaa tu baka musoronganni, anna patorroi dio tingayona inan pemalaranNa PUANG, Kapenombammu.
5Mumane ma’kurre sumanga’ dio oloNa PUANG, Kapenombammu, mukua: Iatu ambe’ku misa’ to Aram salamba salao; ke’de’ lako Mesir sola to tang pira, anna torro dio susito sae, apa dadi misa’ bangsa makamban, makuasa sia marapuan.
6Iatonna pandasakan to Mesir sia napakario-rio sia napapassannikan pa’diaman magasa tongan,
7metambamokan lako PUANG, Kapenombanna nene’ki, anNa perangii PUANG tu gamarangki sia Natiro tu kamandasangki sia kamasussangki sia kadipakario-rioangki.
8Pakalan Nasolammokan PUANG lan mai Mesir tete dio lima matoto’ sia takia’ tie’te’ sia apa metakuran tongan sia tete dio tanda kalle-kallean sia tanda mangnga.
9Nasolammokan sae inde te inan sia Nabenmokan te tondok, misa’ tondok sebo pangandu’ sia tani’ enoan.
10Totemo, manassa kusorong tu bunga’na bura padang, tu mangkamo’ Mikamasean, PUANG. La mupatorro dio oloNa PUANG, Kapenombammu, te baka, ammu tukku menomba dio oloNa PUANG, Kapenombammu,
11sia la mupoparannu tu mintu’ kameloan mangka Nasorong PUANG, Kapenombammu, lako kalemu sia to lan banuammu; la iko la to Lewi sia to sae tu misisolan.
Diona taa sangpulo
12Iake tappumi murampun mupatorro senga’ tu mintu’ taa sangpulona dio mai bura padangmu lan taun ma’pentallun, iamotu disanga taun taa sangpulona, attu iato la musorong lako to Lewi, to sae sia pia biung sia baine balu, anna kandei sia napa’pediaran lan kotamu.
13Ammu ma’kada dio oloNa PUANG, Kapenombammu, mukua: Kualamo te apa marimbangan lan mai banua; kuben dukamoto Lewi, to sae, pia biung sia baine balu, mintu’nato situru’ tu pepasan Misorong lako kaleku. Moi misa’ pepasanMi tae’ kutengkai ba’tu kukalupai.
14Iatongku ma’pote dibolong tae’ kukandei sia tae’ kualai moi misa’ tu apa tongku maruttak, sia tae’ kusorongi tu misa’ apa lako pa’tomatean, sangadinna kuperangii tu gamaranNa PUANG, Kapenombangku, sia kupogau’ unturu’i tu mintu’na apa Mipasan lako kaleki.
15Pemarangai dao mai isungan maindanMi, dao mai suruga, sia pamasakkei tu taumMi Israel, sia tondok tu mangka Misorong lako kaleki, – susitu Miallu’ Mipalaoi sumpa lako nene’ to doloki – iamotu misa’ tondok sebo pangandu’ sia tani’ enoan.
Tampak kada
16Totemo Napa’parentan PUANG, Kapenombammu, lako kalemu, unturu’i te mintu’ aluk dipondok sia atoran; la ponno penaammu sia kalebu deatammu ungkaritutui tonganni.
17Allo iate mupekaioimo tu kadanNa PUANG, kumua Iamo Kapenombammu sia muturu’ tu lalanNa sia la mukaritutui tu mintu’ aluk Napondok sia pepasanNa sia atoranNa, ammu perangii tu gamaranNa.
18Allo iate Napasiola PUANG tu kadammu, kumua ikomo tu taunNa, susitu Napokadangko, sia la mukaritutui tu mintu’ pepasanNa.
19Iamoto la Napalayukko, ammu kapudian sia kalelean sia kamala’biran untongloi mintu’ bangsa, tu Nakombong Puang sia la dadiko misa’ bangsa maseroNa PUANG, Kapenombammu, susitu mangka Napokada.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel