Pa’nubua’ diona arungna Tirus
1Rampomi tu kadanNa PUANG lako kaleku Nakua:
2E ma’rupa tau, pokadanni arungna Tirus kumua: Inde sia tu kadanNa Puangta PUANG, Nakua: Belanna mupamatampo tu penaammu ammu ma’kada kumua: Akumo misa’ deata, untorroina’ misa’ banua deata lan atena tasik, – moi ammu misa’ tolino, tangiako deata –, sia umpapadako kalemu misa’ deata lan penaammu.
3Manassa matarru’ko anna Daniel, moi misa’ rasia tae’ kabunian dio paissanmu;
4belanna kamatarrusammu sia kapaissananmu ammu appa’ ianan sia urrampun bulaan sia salaka lan inan pangnannammu.
5Diona kamatarrusammu sia kamaluteammu ma’balili mutontong umpakerangngan iananmu, sia napomatampomo penaammu tu iananmu.
6Iamoto, inde sia tu kadanNa Puangta PUANG belanna mupapada kalemu tu misa’ deata lan penaammu,
7iamoto manassa la Kuparampoiko to sae, iamotu masa’ga’na mintu’ bangsa, tau iato mai la unnonok pa’dangna la unnea kamatarrusan mala’bi’mu sia la urruttakki arrangmu.
8La napembuangangko rokko posi’ tana lambe’, anna mapalla tu kamateammu, belanna mate ditobokko lan atena tasik.
9La ma’kada siaporokoka kumua: akumora te tu misa’ deata – moi ammu tolino, tangia misa’ deata –, ke dioko tingayona to umpateiko sia lan kuasanna tu mai to untobokko?
10Manassa iatu kamateammu la susiko to tang disunna’i napatei to salian lembang, belanna Kupokadamo tu iannato, kadanNa Puangta PUANG.
Bating diona arungna Tirus
11Rampomi tu kadanNa PUANG lako kaleku Nakua:
12E ma’rupa tau, sa’buranni misa’ bating tu datunna Tirus sia ma’kadako lako kumua: Inde sia tu kadanNa Puangta PUANG: Iatu pa’kaleammu sundun garaganna, naponnoiko kapaissanan, sia sundun kamaballoammu.
13Lanko Eden, pa’lakNa Puang Matua, ma’rupa-rupa parimata ussitutu’i kalemu; iamotu parimata yaspisi’ mararang, parimata krisoli’ sia parimata yaspisi’ maido, parimata pirusa’, parimata ake’ maido sia parimata nepri’, parimata lasuri’, parimata ake’ malotong sia parimata malaki’. Bulaan panggaraga tu ussa’pi’i sia umpasila’ka’i lako kalemu; iatommu dipadadi, sakka’ nasangmo tu iannato.
14Ikomo tu misa’ karubion, tu umpatiballa’ pani’na sia parerung. Mangkamoko Kuparandanan inan: iatu buntu maindanna deata iamo munii torro, lolangko lan lu to’ parimata dukku-dukku.
15Tang sayuangko lan kalolangammu, randuk allo munii dipadadi, sae lako dikabu’tui tu kakadakean dio kalemu:
16Belanna kabudanna balukammu, anna kabu’ko pa’pakario-rio sia tobangko rokko kasalan. Iamoto Kusualeko dao mai buntunna deata, sia Kupatoyangko, e karubion parerung lan mai to’ batu dukku-dukku.
17Matampomo tu penaammu diona kamaballoammu iamoto muputtaimo kakinaammu sia kamala’birammu. Kupembuangangko rokko padang, sia Kupopentingayoko dio olona mintu’ datu anna telle-telleko.
18Belanna kabudanna kakadakeammu, sia kakelokammu ma’balili, ammu ruttakki tu inan maindanmu. Iamoto Kupadukkui tu api lan tangngamu anna pura ungkandeko! Kupopendadiko au diong padang dio pentirona mintu’ to untiroko.
19Iatu mintu’ to untandaiko dio lu mintu’ bangsa, tiramban untiroko; dadimoko misa’ apa megiangan, lanna’moko sae lakona!
Pa’nubua’ diona ukunganna Sidon
20Rampomi tu kadanNa PUANG lako kaleku Nakua:
21E ma’rupa tau mentingo lakoko Sidon, ammu ma’nubua’ unneai
22sia ma’kadako kumua: Inde sia tu kadanNa Puangta PUANG, Nakua: Manassa aku la ullaoiko, Sidon! La dipakala’bi’Na’ lan tangngamu, anna tandai, kumua Akumo tu PUANG ke Kuparampoi ukungan tu kota iato sia Kupamanassa lako kalena, kumua Akumo tu To masero.
23La Kuparampoi ra’ba biang sia to’doan rara dio lu batattana; anna mate tibambang tu tau nakande pa’dang, tu sae ullaoi tiku lao. Anna tandai tau iato mai, kumua Akumo tu PUANG.
24Apa iatu to Israel tae’mo duri la untossokki ba’tu a’da’ la umpa’di’i dio lu mintu’ tau untikui, tu umpamatunai. Anna tandai tau iato mai kumua Akumo tu Puangta PUANG.
25Inde sia tu kadanNa Puangta PUANG, Nakua: Iake Kupasipulungi tu to Israel dio mai mintu’ bangsa, tu lan tondokna nanii tisambo’, attu iato la Kupamanassa lako tau iato mai, kumua Akumo tu To masero dio pentirona mintu’ bangsa, sia la torro tu tau iato mai lan tondokna, tu mangka Kukamasean Yakub, taungKu.
26La torro marampa’ tu tau iato mai inde to dio sia la umbangun banua sia unggaragai pa’lak anggoro’; ondongpi la torro marampa’ tu tau iato mai, ke Kuparampoimi ukungan tu mintu’ tau tiku lao, tu mangka umpamatunai. Anna tandai tau iato mai, kumua Akumo tu PUANG, Kapenombanna.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel