Yeremia umpemaranga to ma’tampa kurin
1Inde sia tu kada dio mai PUANG lako Yeremia, Nakua:
2Ke’de’ko ammu male rokko banuanna to ma’tampa kurin, na inde to Kunii umpokadangko tu kadangKu.
3Ta’kala malemo’ rokko banuanna to ma’tampa kurin iato, anna marassan unggaragai misa’ panggaraga dao pa’tampan kurin.
4Iake susinna salai tu kurin natampa, susitu biasa dadi diona sanglemong losso’ pitti’ lan limanna to ma’tampa kurin, natampa pole’omi dio mai to tu misa’ kurin senga’, susitu nasanganna melo la nagaraga.
5Saemi tu kadanNa PUANG lako kaleku, Nakua:
6Tae’raka Kuma’din umpogau’i lako kalemi susite to ma’tampa kurin iate, e to Israel? KadanNa PUANG. Tonganna susi losso’ pitti’ lan limanna to tumampa kurin, susi dukamokomi to lan limangKu, e to Israel.
7Den attunna pissan angKu paolai salunna tu misa’ bangsa sia misa’ kadatuan, la unnurakki sia la ussanggangi sia la ussabu’i.
8Apa iake mengkatoba’mi dio mai kakadakeanna tu bangsa mangka Kupaolai salu, manassa la Kupenassanni tu kasanggangan la Kuparampoanni.
9Denno pissan attunna angKu paolai salunna tu misa’ bangsa sia misa’ kadatuan la umbangunni sia la umpondokki.
10Apa iake umpogau’i apa kadake dio pentiroKu, anna tae’ naperangii tu gamarangKu, manassa Kupenassanni tu kameloan mangka Kupokada la Kukamaseanni.
11Totemo pokadai te lako mintu’ to Yehuda sia lako mintu’ to lan Yerusalem, kumua: Inde sia tu kadanNa PUANG Nakua: Manassa Kuparandanmo tu kasanggangan lako kalemi sia Kutangnga’mo tu la miposanggangna; iamoto pada mengkatoba’komi dio mai lalan kadakemi sia pemeloi tu kedomi sia penggaurammi.
12Apa nakua tu tau iato mai: Tae’ gai’na to, belanna la unturu’ bangmokan lalan penaangki sia pada la unturu’ kamakarrasan penaa kadakeki.
13Iamoto, nakua kadanNa PUANG: Pekutananni dio lu mintu’ bangsa, mindamo mangka urrangii tu susinna te? Lendu’ ia megi’giranna tu apa napogau’ anak dara Israel!
14Denraka nasalai ambun makko Libanon tu mintu’ buntu batu se’ponna Libanon, ba’tu denraka nabelai marangke tu uai masakka’na uran kamban tu tang tore sae?
15Moi anna susito, tang nakilalai dukaNa’ taungKu; memala’ duka lako apa tae’ gai’na. Iamoto anna titodo tu tau iato mai dio lu lalanna, iamotu lalan masainna, belanna unnola lalan tang dibatatta,
16naurunganni napopendadi apa napotiramban tau tu tondokna sia tontong dadi misa’ apa natelle tau; minda-minda ullendu’i la tiramban sia unniling-iling.
17Susito angin rampe matallo, susi dukato la Kupasisarak-sarak tu tau iato mai dio tingayona ualinna; na iake allo kapussakannai, la Kutananni sokkong tangia lindo.
18Attu iato ma’kadami tu tau iato mai nakua: Maikomi tadakaran tangnga’ Yeremia, belanna tae’ lenpa napa’de tu pangadaran dio lu mintu’ to minaa ba’tu pa’timbangan dio lu mintu’ to matarru’ ba’tu kada dio lu mintu’ nabi. Maikomi taotton kadai; sia da taperangii moi misa’ tu kadanna.
19Perangiina’, o PUANG, sia tananni talinga tu kadanna mintu’ to unneana’.
20Sipaturaka tu kameloan dipabala’i kakadakean? Belanna nabo’bokanna’ patuang tu tau iato mai. Kilalai dikka’ umba kukua bendan dio oloMi umpengkamoyanni sia undampai tu kare’dekamMi lako tau iato mai.
21Iamoto popa’elo’nai tu anakna tau iato mai karorian, sorongi tu tau iato mai lako kandean pa’dang, naurunganni sisayuran anak sia balu tu mintu’ bainena, sia mangsan tu mai muanena napobua’ kamatean, sia mate tu mai to manguranna nakande pa’dang lan kasirarian.
22Nake dirangii tu kasilallakan lan mai banuanna tau iato mai, ke ta’pa Mipasaemi tu uali buda ullaoi. Belanna mangkamo umbo’bokanna’ patuang la untingkanna’ sia natananan buni poya tu lette’ku.
23Apa Kamu, o PUANG, unnissanni tu tangnga’na tau iato mai la umpateina’, da Miseroi tu kakadakeanna sia da Mipa’dei tu kasalanna dio mai oloMi, sangadinna la tibambang dio oloMi. Ukungi tu tau iato mai, ke nalambi’mi tu attu kasengkeamMi.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel